नेवपूरच्या पाच विद्यार्थिनींना सायकली; रोटरी क्लबकडून शाळेला हँडवॉश स्टेशनही भेट

ग्रामीण भागातील विद्यार्थिनींचा शाळेपर्यंतचा प्रवास सोपा व्हावा आणि त्यांच्यात स्वच्छतेच्या सवयी रुजाव्यात, या उद्देशाने रोटरी क्लब छत्रपती संभाजीनगर पूर्वच्या वतीने नेवपूर येथील जिल्हा परिषद प्राथमिक व उच्च माध्यमिक शाळेला पाच सायकली आणि एक हँडवॉश स्टेशन भेट देण्यात आले. शनिवारी (दि. १७) 'एज्युराईड' उपक्रमांतर्गत हा कार्यक्रम झाला.

शाळेची सायकल बँक समृद्ध करण्यासाठी या सायकली देण्यात आल्या आहेत. इयत्ता दहावीतील सरू चिकणे, सप्तेश्वरी ससे, कोमल मुरमुडे, दिपाली ठाकरे आणि वैष्णवी चिकणे या विद्यार्थिनींना चिठ्ठी काढून सायकलींचे वाटप करण्यात आले. अशा प्रकारे नेवपूरच्या जिल्हा परिषद शाळेतील पाच विद्यार्थिनींना सायकली मिळाल्या असून, सायकली आणि हँडवॉश स्टेशनमुळे शाळेच्या भौतिक सुविधांमध्ये भर पडली आहे.

या सायकलींमुळे ग्रामीण भागातील विद्यार्थिनींना शाळेत ये-जा करताना होणारा त्रास कमी होऊन त्यांच्या नियमित उपस्थितीला प्रोत्साहन मिळणार आहे. स्वच्छतेसाठी हँडवॉश स्टेशनही देण्यात आले आहे. विद्यार्थ्यांमध्ये वैयक्तिक स्वच्छतेची सवय वाढावी आणि आरोग्याबद्दल जागरूकता यावी, हा त्यामागचा उद्देश आहे.

कार्यक्रमाला रोटरी क्लबचे अध्यक्ष पवन गुट्टे, माजी अध्यक्ष निवृत्ती गजभारे, प्रदीप पटेल, सतीश भालशंकर, दिनेश जायसवाल, केंद्रप्रमुख के. आर. सपकाळ, शालेय व्यवस्थापन समितीचे अध्यक्ष अशोक सोळुंके, मुख्याध्यापक नरेश पेद्दी, शिक्षक, पालक आणि गावकरी उपस्थित होते.

या वेळी रोटरी क्लबचे विद्यमान अध्यक्ष पवन गुट्टे यांनी पुढेही शाळेच्या गरजा लक्षात घेऊन भौतिक सुविधा उपलब्ध करून देण्याचा आणि शाळेला सहकार्य करण्याचा मानस व्यक्त केला. सामाजिक बांधिलकी जपत शैक्षणिक संस्थांना मदत करण्याच्या रोटरी क्लबच्या भूमिकेचे उपस्थितांनी स्वागत केले. कार्यक्रमाचे सूत्रसंचालन शिवनाथ वाढेकर यांनी केले, तर हनुमान जाधव यांनी आभार मानले.