नवरात्रोत्सवासाठी मैदान नाकारल्याचा आरोप; मीरा-भाईंदर महापालिकेला सरनाईकांचा सवाल

मीरा-भाईंदरमधील पद्मभूषण मेजर ध्यानचंद मैदान यंदाच्या नवरात्रोत्सवासाठी मिळावे, अशी मागणी नेहमीप्रमाणे करण्यात आली होती. महासभेचा ठराव झालाय, असे कारण देऊन महापालिकेने मैदान भाड्याने द्यायला नकार दिला, असा आरोप राज्याचे परिवहन मंत्री आणि शिवसेना नेते प्रताप सरनाईक यांनी केला. पत्रकार परिषदेत बोलताना त्यांनी महापालिका प्रशासन आणि सत्ताधाऱ्यांना थेट प्रश्न विचारला: "भाडे भरून महापालिकेची मैदाने घेतो, मग हिंदूंच्या सणाला विरोध का?"

महासभेच्या ठरावाच्या एक दिवस आधीच मैदानाचे बुकिंग झाले होते, असा दावा सरनाईक यांनी केला. वर्षभर होणाऱ्या सांस्कृतिक कार्यक्रमांसाठी काही मैदानांची मागणी महापालिका आयुक्तांकडे केली होती, त्यातले एक मैदान मिळाले आहे, असेही त्यांनी सांगितले.

सरनाईक म्हणाले, "आम्ही महापालिकेची मैदाने भाडे भरून घेतो आणि महापालिकेला निधीही देतो. मग नागरिकांच्या भावनांशी का खेळले जात आहे? स्वतःला हिंदुत्ववादी म्हणवून घेणारे सत्ताधारी हिंदूंच्या सण-उत्सवांनाच अडथळे निर्माण करत असतील, तर याचा विचार झाला पाहिजे." विरोधी पक्षातील सदस्य, कार्यकर्ते आणि नेत्यांना मैदान किंवा महापालिकेच्या सुविधा मिळवण्यासाठी परवानगीकरता वारंवार पाठपुरावा करावा लागतो, असाही आरोप त्यांनी केला. सत्ताधारी आणि विरोधक असा भेद न करता सर्वांना समान नियम आणि समान वागणूक मिळाली पाहिजे, अशी मागणी त्यांनी केली.

मैदानाच्या वापराच्या धोरणावरून सत्ताधारी आणि विरोधक यांच्यात याआधीही आरोप-प्रत्यारोप झाले आहेत. धार्मिक, सामाजिक आणि सांस्कृतिक कार्यक्रमांसाठी मैदान वापरावर निर्बंध आणायच्या भूमिकेमुळे नवरात्रोत्सव, दहीहंडी अशा सार्वजनिक कार्यक्रमांचा मुद्दा चर्चेत आला होता. मैदानांचा वापर खेळांसाठी व्हावा आणि मोठ्या कार्यक्रमांमुळे मैदानांचे नुकसान होऊ नये, अशी प्रशासनाची भूमिका असल्याचे सांगितले जाते.

यंदाचा नवरात्रोत्सव फक्त मनोरंजनापुरता न ठेवता दुष्काळग्रस्त शेतकऱ्यांच्या मदतीसाठी वापरायचा संकल्प आहे, असे सरनाईक यांनी सांगितले. शेतकरी कुटुंबांना जीवनावश्यक वस्तू, अन्नधान्य, वैद्यकीय मदत आणि इतर गरजेचे साहित्य देण्यासाठी वैयक्तिक पातळीवर ८ ते १० कोटी रुपये खर्च करण्याचा मानस असल्याचे त्यांनी स्पष्ट केले. गेल्या वर्षी धाराशिव जिल्ह्यातील भूम आणि परंडा परिसरातील १०१ शेतकरी कुटुंबांना गायी वाटल्या, असा दावा त्यांनी केला. कुटुंबांना उत्पन्नाचे साधन मिळावे म्हणून सुमारे सव्वा कोटी रुपयांची आर्थिक मदत केल्याचेही त्यांनी सांगितले.

नवरात्रोत्सवाच्या ठिकाणी मुख्यमंत्री सहायता निधीची माहिती देणारा स्टॉल उभारला जाणार आहे. आर्थिक मदत करायची असेल तर ती थेट मुख्यमंत्री सहायता निधीमार्फत करावी, असे आवाहन तिथे केले जाईल. अन्नधान्य, मेडिकल किट, सायकल किंवा इतर उपयुक्त साहित्याच्या रूपात मदत करू इच्छिणाऱ्यांसाठी जिल्हाधिकाऱ्यांकडे आवश्यक परवानगी मागितल्याचे सांगण्यात आले. मदत स्वीकारताना पारदर्शकता ठेवली जाईल आणि कसलाही गैरसमज होणार नाही याची काळजी घेतली जाईल, असेही स्पष्ट करण्यात आले.

आयोजकांनी सांगितले की, यंदाचा नवरात्रोत्सव आणि गरबा कार्यक्रम पूर्णपणे मोफत असेल आणि नागरिकांकडून प्रवेश शुल्क घेतले जाणार नाही. प्रवेशासाठी क्यूआर कोडची व्यवस्था केली असून त्याद्वारे नागरिकांना उत्सवात सहभागी होता येईल. "नवरात्रोत्सव हा सर्वसामान्य जनतेचा उत्सव आहे. नागरिकांनी मोठ्या संख्येने सहभागी होऊन सांस्कृतिक कार्यक्रमांचा आनंद घ्यावा आणि त्याचबरोबर दुष्काळग्रस्त शेतकऱ्यांच्या मदतीसाठीही योगदान द्यावे," असे आवाहन करण्यात आले.

मैदानाच्या परवानगीचा प्रश्न आता राजकीय वादाचा मुद्दा झाला आहे. या प्रकरणी राज्य शासनाकडे पत्रव्यवहार केल्याचे सरनाईक यांनी सांगितले. त्यामुळे महापालिका प्रशासन मैदानाबाबत पुढे काय निर्णय घेते, याकडे मीरा-भाईंदरच्या राजकीय वर्तुळाचे लक्ष लागले आहे.