नवरात्रीचा सहावा दिवस कात्यायनी देवीला समर्पित, जाणून घ्या पूजेची पद्धत

आज नवरात्रीचा सहावा दिवस आहे. नवरात्रीच्या सहाव्या दिवशी देवी कात्यायनीच्या रूपाची पूजा केली जाते. कात्यायनी देवी ही नवदुर्गेमधील सहावी देवी मानली गेली आहे. शक्ती, धैर्य आणि विजयाचं प्रतीक म्हणून देवीकडे पाहिलं जातं. भक्तीभावाने पूजा करून सुख, समृद्धी आणि आरोग्यासाठी देवीकडे प्रार्थना केली जाते.

देवीच्या स्वरूपाचं वर्णन असं आढळतं की, तिचं वाहन सिंह आहे आणि तिला चार हात आहेत. एका हातात तलवार, एका हातात कमळ असून इतर हातांमध्ये अभयमुद्रा आणि वरदमुद्रा आहे. हे वर्णन देवीच्या या रूपाबद्दल सांगितलं जातं.

यंदा नवरात्रीच्या सहाव्या दिवशी हिरवा रंग परिधान केला जाणार आहे. हिरवा रंग निसर्ग, समृद्धी आणि नवचैतन्याचं प्रतीक मानला जातो. या दिवशी हिरव्या रंगाचे वस्त्र परिधान करून देवीची आराधना करण्याची प्रथा आहे.

पूजेसाठी सकाळी लवकर उठून घराची आणि देवघराची स्वच्छता करावी, मग देवीसमोर दिवा लावावा. माता कात्यायनीची पूजा करून तिला फूल अर्पण करावं. देवीला दूध, साखर किंवा साखरेचे पदार्थ नैवेद्य म्हणून अर्पण करावेत. घरातील परंपरेनुसार एखादा पदार्थ अर्पण करावा.

कात्यायनी देवीला मधाचा नैवेद्य अर्पण केला जातो. मात्र मध उपलब्ध नसेल, तर आपल्या परंपरेनुसार खीर, पेढे किंवा इतर गोड पदार्थ नैवेद्य म्हणून अर्पण करता येऊ शकतात.

पूजेच्या वेळी "ओम देवी कात्यायनी नमः" या मंत्राचा जप करावा. शक्य असल्यास दुर्गा सप्तशक्ती, देवीची आरती किंवा नवरात्रीतील संबंधित स्तोत्राचं पठण करावं.

कात्यायनी देवी ही दुर्गेच्या नवदुर्गांपैकी सहावं रूप आहे. पौराणिक कथेनुसार, महर्षी कात्यायन यांनी देवीची कठोर तपश्चर्या केली होती. त्यांच्या तपश्चर्येमुळे प्रसन्न होऊन देवीने त्यांच्या घरी कन्यारूपात जन्म घेतला. त्यामुळे देवीला कात्यायनी हे नाव पडलं, अशी मान्यता आहे.

माता कात्यायनी यांना आदिशक्तीचं तेजस्वी आणि पराक्रमी रूप मानलं जातं. त्या अन्यायाचा नाश करून धर्माचं रक्षण करतात, अशी भक्तांची श्रद्धा आहे. देवीचं हे रूप शक्ती, निर्भयता आणि दुष्ट प्रवृत्तींवर विजय मिळवण्याचा संदेश देतं.

धर्म, ज्योतिष, वास्तु यांसारख्या विषयांवरील माहिती केवळ वाचकांच्या माहितीसाठी आहे. यासंबंधी कोणताही प्रयोग करण्यापूर्वी तज्ज्ञांचा सल्ला आवश्यक आहे.