नाना पाटेकर यांचे निधन; हर्षवर्धन सपकाळ यांचा शोकसंदेश, "संवेदनशील व्यक्तिमत्त्व हरपले"

मुंबई : ज्येष्ठ अभिनेते नाना पाटेकर यांचे निधन झाले आहे. वयाच्या ७५व्या वर्षी या दिग्गज अभिनेत्याने गोव्यात अखेरचा श्वास घेतला. गोव्यातील डोना पावला येथील घरी असताना त्यांना हृदयविकाराचा झटका आला होता.

झटका आल्यानंतर त्यांना तातडीने मणिपाल रुग्णालयात दाखल करण्यात आले. पण रुग्णालयातच त्यांची प्राणज्योत मालवली. या दिग्गज अभिनेत्याच्या जाण्याची बातमी आल्यावर अनेकांनी हळहळ व्यक्त केली. नाना पाटेकर यांच्या निधनानंतर महाराष्ट्र प्रदेश काँग्रेस कमिटीचे अध्यक्ष हर्षवर्धन सपकाळ यांनी आपल्या शोकभावना व्यक्त केल्या आहेत.

नाना पाटेकर यांच्या निधनाची बातमी अतिशय दुःखद आणि मनाला वेदना देणारी आहे, असे सपकाळ यांनी सांगितले. उत्कृष्ट अभिनय, सामाजिक जाणीव आणि माणुसकीचा स्पर्श असलेले संवेदनशील व्यक्तिमत्त्व म्हणून नाना पाटेकर कायम स्मरणात राहतील, असेही ते म्हणाले. त्यांच्या जाण्याने कला आणि सामाजिक क्षेत्राची मोठी हानी झाली आहे, असे सपकाळ म्हणाले.

सपकाळ पुढे म्हणाले की, नाना पाटेकर यांनी आपल्या दमदार अभिनयातून नाटक आणि चित्रपटांमध्ये स्वतःची वेगळी ओळख निर्माण केली होती. त्यांनी आधी मराठी नाटक आणि चित्रपटांत काम केले, त्यानंतर हिंदी चित्रपटांतही ते झळकले. पुरुष आणि हमीदाबाईची कोठी या नाटकांत त्यांनी साकारलेल्या भूमिका अजरामर ठरल्या. क्रांतीवीर, परिंदा, तिरंगा, वेलकम, प्रहार, सिंहासन, नटसम्राट आणि देऊळ या चित्रपटांतील त्यांच्या भूमिकाही लक्षवेधी ठरल्या, असे सपकाळ यांनी नमूद केले.

अभिनयाबरोबरच नाना पाटेकर यांनी सामाजिक क्षेत्रातही उल्लेखनीय काम केले, असे सपकाळ यांनी सांगितले. नाम फाउंडेशनच्या माध्यमातून त्यांनी महाराष्ट्रातील दुष्काळी भागातील शेतकऱ्यांना मदत केली. आत्महत्याग्रस्त शेतकऱ्यांच्या कुटुंबांनाही त्यांनी भरीव आर्थिक मदत दिली. याशिवाय जलसंधारणाची कामेही त्यांनी केली आहेत.

त्यांच्या कामाची दखल घेऊन भारत सरकारने त्यांना पद्मश्री पुरस्काराने सन्मानित केले होते. चित्रपटसृष्टीतील अनेक पुरस्कारही त्यांना मिळाले. मात्र अभिनय क्षेत्रातील त्यांची उल्लेखनीय कारकीर्द आणि सामाजिक क्षेत्रातील त्यांचे काम पाहता, ते खऱ्या अर्थाने 'महाराष्ट्र भूषण' आहेत, असे हर्षवर्धन सपकाळ म्हणाले.

नाना पाटेकर यांना भावपूर्ण श्रद्धांजली वाहताना सपकाळ यांनी सांगितले की, महाराष्ट्र प्रदेश काँग्रेस कमिटी पाटेकर कुटुंबीयांच्या दुःखात सहभागी आहे.