पदयात्रेमुळे नागपुरात वाहतूक कोंडी; रुग्णालयापासून विमानतळापर्यंत पोहोचणे कठीण

सणासुदीच्या दिवसांत नागपुरात काढण्यात आलेल्या पदयात्रेचा मोठा फटका शहराच्या वाहतुकीला बसला. गुरुवारी सायंकाळी सुरू झालेली कोंडी रात्री उशिरापर्यंत सुटली नाही. प्रमुख चौकांपासून अंतर्गत रस्त्यांपर्यंत गाड्यांच्या लांबच लांब रांगा लागल्या आणि नोकरदार, रुग्णांचे नातेवाईक, प्रवासी तसेच व्यापारी असे सर्वच जण त्रस्त झाले. वाहतूक पोलिसांच्या नियोजनावरही नागरिकांनी प्रश्न उभे केले.

गुरुवारी सायंकाळी पदयात्रेमुळे शहरातील प्रमुख मार्गांवरील वाहतूक विस्कळीत झाली. वर्धा मार्गावर कृपलानी चौक ते छत्रपती चौक या पट्ट्यात वाहनांची रांग लागली होती. याशिवाय अजनी रेल्वे स्थानक, मोक्षधाम, घाट रोड, मेडिकल चौक, अशोक चौक, महाल आणि सेंट्रल एव्हेन्यू परिसरातही वाहतूक अडकून पडली. वर्धा मार्गापासून मेडिकल चौकापर्यंत वाहनांच्या लांबच लांब रांगा दिसत होत्या.

सायंकाळी कार्यालये सुटल्यानंतर घरी निघालेल्या नोकरदारांना तासन्तास रस्त्यावरच थांबावे लागले. रेल्वे स्थानक आणि विमानतळ गाठायला निघालेल्या प्रवाशांचीही मोठी धावपळ झाली. कोंडीतून सुटण्यासाठी पर्यायी रस्त्यांचा वापर करणारे वाहनचालकही तिथे अडकले.

धंतोली परिसरातील रुग्णालयांकडे जाणारे रुग्ण आणि त्यांचे नातेवाईक यांना या कोंडीचा मोठा त्रास सहन करावा लागला. अंतर्गत रस्त्यांवरही गाड्यांच्या रांगा असल्याने रुग्णवाहिकांना वाट मिळणे अवघड झाले होते. दीक्षाभूमी मार्ग, लक्ष्मीनगर चौक, व्हीआयपी रोड, सेमिनरी हिल्स, दीक्षाभूमी चौक आणि आठरस्ता चौक ते गणेशनगर चौक या भागात वाहतुकीचा वेग मंदावला होता.

अनेक तास लोक कोंडीत अडकले असतानाही परिस्थिती आटोक्यात आणण्यात यंत्रणेला अपेक्षित यश आले नाही, अशी भावना नागरिकांनी बोलून दाखवली. काही ठिकाणी वाहतूक पोलीस हजर होते. मात्र गाड्यांच्या रांगा काही कमी होत नव्हत्या, त्यामुळे पोलिसांनी आधी केलेल्या नियोजनावर प्रश्नचिन्ह उभे राहिले.

पदयात्रेच्या स्वागतासाठी काही व्यापारी संघटनांनी वेगवेगळ्या ठिकाणी मंच उभारले होते. तरीही याच पदयात्रेमुळे बाजारपेठांमध्ये ग्राहकांची ये-जा थांबली आणि व्यापाऱ्यांना आर्थिक फटका बसला. ऐन सणासुदीच्या काळात ग्राहकांना दुकानांपर्यंत पोहोचणेही कठीण झाले. धरमपेठ बाजारपेठेत अनेक तास वाहतूक खोळंबली, त्यामुळे व्यापारी आणि दुकानदार ग्राहकांची वाट पाहत बसले.

अशा गर्दीच्या काळात पदयात्रांचे आयोजन टाळायला हवे होते, अशी नाराजी व्यापाऱ्यांनी व्यक्त केली. दिल्लीतील आर्थिक नुकसानीची चर्चा करणाऱ्यांनी नागपुरातील व्यापारी आणि सामान्य नागरिकांच्या अडचणींचाही विचार करावा, अशी प्रतिक्रिया उमटली. कोंडीत अडकून राहण्यापेक्षा गाडी मागे वळवून घरी जाणे अनेक वाहनचालकांनी पसंत केले. त्यामुळे पदयात्रेच्या आयोजनापेक्षा नागरिकांना झालेल्या मनस्तापाचीच शहरात जास्त चर्चा रंगली.