नागपुरात काँग्रेस प्रभारी सिरिवेल्ला प्रसाद यांचे आवाहन: भाजप-संघाच्या विचारसरणीचा पराभव करा

संविधान, लोकशाही आणि सामाजिक न्यायाच्या रक्षणासाठी भाजप आणि राष्ट्रीय स्वयंसेवक संघाच्या विचारसरणीचा पराभव करा, असे आवाहन काँग्रेसचे प्रदेश प्रभारी सिरिवेल्ला प्रसाद यांनी केले. नागपूर विभाग पदवीधर मतदारसंघातील काँग्रेस आणि महाविकास आघाडीचे अधिकृत उमेदवार अभिजीत गोविंदराव वंजारी यांच्या प्रचारासाठी महाकालकर सभागृहात कार्यकर्ता मेळावा झाला. त्यात ते बोलत होते.

सिरिवेल्ला प्रसाद म्हणाले की, भारतरत्न डॉ. बाबासाहेब आंबेडकर यांनी नागपूरच्या भूमीतून सामाजिक क्रांतीचा पाया घातला. संविधानाने देशातील प्रत्येक नागरिकाला समान अधिकार आणि न्याय दिला आहे, पण आज संविधान आणि लोकशाहीसमोर आव्हाने उभी केली जात आहेत, असे ते म्हणाले. स्वातंत्र्यलढ्यात राष्ट्रीय स्वयंसेवक संघाचे कोणतेही योगदान नव्हते, असेही त्यांनी म्हटले.

संविधानामुळे वंचित, शोषित आणि दुर्बल घटकांना न्याय मिळाला, असे सांगत संविधानाने दिलेले अधिकार आणि लोकशाही मूल्ये कमकुवत करण्याचे प्रयत्न होत असतील, तर त्याला विरोध करावा लागेल, असा सूर त्यांच्या भाषणात होता.

मंचावर माजी मंत्री सुनील केदार, काँग्रेसचे माजी प्रदेशाध्यक्ष नाना पटोले, खासदार श्यामकुमार बर्वे, आमदार विकास ठाकरे, संजय मेश्राम, उमेदवार अभिजीत वंजारी, शहराध्यक्ष प्रफुल्ल गुडधे, संजय महाकालकर, अश्विन बैस, अतुल लोंढे, सुरेश भोयर, गेव आवारी, कुंदा राऊत आदी उपस्थित होते.

माजी प्रदेशाध्यक्ष नाना पटोले यांनी सांगितले की, देशाची लोकशाही व्यवस्था आणि संविधानाने दिलेले अधिकार टिकवण्यात काँग्रेसची भूमिका महत्त्वाची आहे. पदवीधर मतदारसंघाची निवडणूक ही केवळ एका उमेदवाराची निवड नसून सुशिक्षित मतदारांचे प्रश्न आणि त्यांच्या प्रतिनिधित्वाशी जोडलेली आहे, म्हणून प्रत्येक पदाधिकारी आणि कार्यकर्त्याने मतदारांपर्यंत पोहोचून विजयासाठी प्रयत्न करावेत, असे ते म्हणाले.

माजी मंत्री सुनील केदार यांनी महाविकास आघाडीच्या कार्यकर्त्यांना परस्पर समन्वयाने काम करण्याचे आवाहन केले. पदवीधरांच्या समस्यांवर तोडगा काढण्यासाठी आणि त्यांच्या हक्कांचा आवाज विधान परिषदेत प्रभावीपणे मांडण्यासाठी वंजारी यांच्यासारख्या अनुभवी लोकप्रतिनिधीची गरज आहे, असे ते म्हणाले. प्रत्येक कार्यकर्त्याने आपल्या भागातील पदवीधर मतदारांशी संपर्क साधून काँग्रेस आणि महाविकास आघाडीची भूमिका त्यांच्यासमोर मांडावी, असेही त्यांनी सांगितले.

अभिजीत वंजारी यांनी पदवीधरांच्या समस्या विधान परिषदेत प्रभावीपणे मांडण्याचा संकल्प व्यक्त केला. सुशिक्षित तरुणांना रोजगाराच्या संधी उपलब्ध करून देणे, बेरोजगारीची समस्या सोडवणे तसेच शिक्षक, कर्मचारी आणि पदवीधरांच्या विविध समस्या सातत्याने सोडवणे याला प्राधान्य दिले जाईल, असे त्यांनी सांगितले. पदवीधर मतदारांचा विश्वास सार्थ ठरवण्यासाठी सतत प्रयत्न करू, असेही ते म्हणाले.

इतर नेत्यांनीही यावेळी आपले विचार मांडले. मेळाव्याला पदाधिकारी, माजी लोकप्रतिनिधी, नगरसेवक, कार्यकर्ते तसेच मविआचे समर्थक मोठ्या संख्येने उपस्थित होते.