नागपुरात मतदारांच्या हक्कांसाठी काँग्रेस रस्त्यावर; 'व्होट बचाव, देश बचाव' अंतर्गत बाईक रॅली

नागपूर : काँग्रेसने 'व्होट बचाव, देश बचाव' या अभियानांतर्गत नागपुरात बाईक रॅली काढली. एसआयआर प्रक्रियेमुळे मतदारांची नावे वगळली जात आहेत, असा आरोप करत काँग्रेसने निवडणूक आयुक्त ज्ञानेश कुमार यांच्या कार्यपद्धतीचा निषेध नोंदवला. या रॅलीतून पक्षाने मतदारांच्या हक्कांचा मुद्दा समोर आणला.

रामेश्वरी येथील त्रिशरण चौकात डॉ. बाबासाहेब आंबेडकर यांचा पुतळा आहे, तिथून या रॅलीला सुरुवात झाली. त्यानंतर दत्तात्रय नगर येथील महाकाळकर सभागृहापर्यंत ही रॅली काढण्यात आली. काँग्रेसच्या 'व्होट बचाव, देश बचाव' अभियानाच्या दुसऱ्या टप्प्याची सुरुवात नागपुरातून करण्यात आली, हेही यावेळी सांगण्यात आले.

रॅलीमध्ये महाराष्ट्र काँग्रेसचे प्रदेश प्रभारी सिरीवेल्ला प्रसाद, नागपूर शहर काँग्रेसचे अध्यक्ष प्रफुल गुडधे पाटील आणि आमदार अभिजित वंजारी सहभागी झाले होते. याशिवाय काँग्रेसच्या विविध ब्लॉक कमिटींचे सदस्य, नगरसेवक, तसेच युवक काँग्रेसचे पदाधिकारी आणि कार्यकर्ते मोठ्या संख्येने हजर होते.

एसआयआर प्रक्रियेदरम्यान मतदारांच्या नावांबाबत जे प्रश्न निर्माण झाले, त्यावर आवाज उठवण्यासाठी आणि निवडणूक प्रक्रियेबाबत आपला विरोध व्यक्त करण्यासाठी ही रॅली काढल्याचे काँग्रेसकडून सांगण्यात आले. यावेळी प्रदेश प्रभारी सिरीवेल्ला प्रसाद आणि शहराध्यक्ष प्रफुल गुडधे पाटील यांनी माध्यमांशी बोलून पक्षाची भूमिका मांडली.