नागपुरातही धावणार अंडरग्राउंड मेट्रो; कोराडीसह 55 किलोमीटरच्या तिसऱ्या टप्प्याचे नियोजन सुरू

नागपूरकरांसाठी एक अतिशय चांगली आणि दिलासादायक बातमी समोर आली आहे. येणाऱ्या काही महिन्यांत नागपूरकरांना सरकारकडून एक खास गिफ्ट मिळणार आहे. सध्या नागपुरात मेट्रोचा पहिला टप्पा सुरू आहे आणि दुसऱ्या टप्प्याचे बांधकाम जोरात सुरू आहे. अशातच नागपूर मेट्रोने तिसऱ्या टप्प्याबाबत मोठा निर्णय घेतला आहे. सरकारने मेट्रोच्या तिसऱ्या टप्प्याचे नियोजन सुरू केल्याची माहिती आहे.

अधिकृत माहितीनुसार नागपूर मेट्रोचा तिसरा टप्पा, म्हणजेच फेज थ्री, तब्बल 55 किलोमीटरचा असेल. त्यातील कोराडी मार्गावरचा किमान 10 किलोमीटरचा भाग भूमिगत, म्हणजेच अंडरग्राउंड मेट्रोचा असेल. उरलेला भाग एलिव्हेटेड मेट्रो स्वरूपात असेल. त्यामुळे जगातील मोठ्या शहरांसारखी अंडरग्राउंड मेट्रो नागपुरातही प्रत्यक्षात धावणार आहे.

या अंडरग्राउंड मेट्रोचे शेवटचे टोक नागपूरजवळचे कोराडी देवस्थान असणार आहे. मात्र नागपूर शहरातून ही अंडरग्राउंड मेट्रो नेमकी कुठून सुरू करायची, यासंदर्भात सध्या सर्वेक्षणाचे काम सुरू आहे, अशी माहिती नागपूर मेट्रोचे प्रोजेक्ट डायरेक्टर राजीव त्यागी यांनी दिली.

तिसऱ्या टप्प्यात उत्तर नागपूरचा मोठा भाग मेट्रोच्या कक्षेत येईल. शिवाय नागपूरजवळ उभे राहणारे 'नवीन नागपूर' आणि 'नवीन विमानतळ' हेही या टप्प्याशी जोडले जाणार आहे. गेल्या काही वर्षांत ज्या 'इनर रिंग रोड'च्या आजूबाजूला नागपूरचा विस्तार वेगाने झाला, त्या रिंग रोडवरही तिसऱ्या टप्प्यात मेट्रो 23 किलोमीटर धावणार आहे.

पहिल्या टप्प्याची सध्याची स्थिती अशी की, 40 किलोमीटरचा हा टप्पा पूर्णपणे सुरू आहे. 44 किलोमीटरच्या दुसऱ्या टप्प्याचे बांधकाम सध्या जोरात सुरू असून ते मार्च 2028 पर्यंत पूर्ण होणार आहे.

राजीव त्यागी यांनी सांगितले की, दुसऱ्या टप्प्याचे बांधकाम 2027 च्या अखेरपर्यंत पूर्ण होईल आणि मार्च 2028 मध्ये त्याचे उद्घाटन होऊन नागपूरकरांना विस्तारित मेट्रो सेवेचा लाभ घेता येईल.