नागपुरात घरमालकाला चाकू दाखवणाऱ्या भाडेकरूच्या घरात ५०० च्या नोटांसारखे ८२ लाखांचे छापलेले कागद

नागपूरमधील चैतन्येश्वर नगरातल्या एका घरात ५०० रुपयांच्या नोटांसारखे दिसणारे छापलेले कागद मोठ्या संख्येने सापडले आहेत. या कथित प्रकरणात आता एक नवी आणि धक्कादायक माहिती समोर आली आहे. या घरात राहणारा मुख्य संशयित पुष्पम बंडाने फरार असून पोलीस त्याचा कसून शोध घेत आहेत.

बंडाने परिसरातल्या कोणाशीही फारसा संपर्क ठेवत नव्हता. एवढंच नाही, तर तो घरमालकालाही घराच्या आत येऊ देत नव्हता. त्याने गेल्या अनेक महिन्यांपासून घराचे भाडे थकवले होते. अखेर शनिवारी घरमालकाने शेजारच्या लोकांना आणि मनसे कार्यकर्त्यांना सोबत घेतले आणि घर उघडून पाहिले. आत गेल्यावर त्यांना ५०० रुपयांच्या अस्सल नोटांसारखे दिसणारे हजारो छापलेले कागद आढळले.

प्रकरणाचे गांभीर्य लक्षात घेऊन पोलिसांनी घटनास्थळी जाऊन पाहणी केली. त्या वेळी दोन्ही बाजूंना छपाई असलेले, ५०० च्या नोटांसारखे जवळपास ३७ लाख रुपये मूल्याचे कागद मिळाले. याशिवाय नोटांची फक्त एकच बाजू छापलेले जवळपास ४५ लाख रुपये मूल्याचे कागदही तिथे सापडले. म्हणजे सगळे मिळून ८२ लाखांचे छापलेले कागद जप्त झाले आहेत. बंडाने याने एवढ्या मोठ्या प्रमाणात हे कागद का छापले, याबद्दल अजून स्पष्टता आलेली नाही.

स्थानिक नागरिकांनी मात्र त्याच्या संशयास्पद वागण्यावरून एक दाट शंका व्यक्त केली आहे. त्यांच्या म्हणण्यानुसार, तो मोठ्या प्रमाणात असलेल्या अस्सल नोटांमध्ये या नकली छापलेल्या नोटा मिसळून त्या व्यवहारात आणत असावा.

बंडानेच्या घरातून काही कागदपत्रेही सापडली आहेत. त्याने नुकतेच एका बँकेत एक लाख रुपये जमा केल्याची ती कागदपत्रे आहेत. अनेक महिन्यांचे भाडे थकवणाऱ्या माणसाने बँकेत पैसे भरले, त्यामुळे हे छापलेले कागद तो नेमके कुठे वापरत होता, असे अनेक प्रश्न उभे राहिले आहेत.

दरम्यान, घरमालकाने दिलेल्या माहितीनुसार, बंडानेने याआधी भाडे देण्याच्या मुद्द्यावरून वाद घातला होता आणि त्यांना चाकू दाखवून धमकी दिली होती. त्याची रीतसर तक्रार वाठोडा पोलीस स्टेशनमध्ये करण्यात आली होती, पण पोलिसांनी तेव्हा कोणतीही कारवाई केली नव्हती.

पोलिसांनी तेव्हाच कठोर पावले उचलली असती, तर नकली नोटांचा हा काळाबाजार तेव्हाच उजेडात आला असता, असा संतप्त सूर स्थानिक लोकांनी लावला आहे.