टोयोटा फॉर्च्यूनरची नवी पिढी येतेय; डिसेंबरमध्ये जागतिक अनावरण, भारतात नंतर लॉन्च

भारतातील सर्वात लोकप्रिय आणि पॉवरफुल एसयूव्ही म्हणून ओळखल्या जाणाऱ्या टोयोटा फॉर्च्यूनरची (Toyota Fortuner) नवीन जनरेशन लवकरच बाजारात येण्यासाठी तयार आहे. कंपनी ही एसयूव्ही नव्या आणि आधुनिक रूपात सादर करणार असून, गाड्यांची आवड असलेल्यांमध्ये त्याबद्दल मोठी उत्सुकता दिसत आहे.

मीडिया रिपोर्ट्सनुसार, या नव्या गाडीचे आधी जागतिक पातळीवर मोठ्या प्रमाणात लॉन्चिंग होईल. त्यानंतर ती नवीन वर्षात भारतीय बाजारात येऊ शकते. डिसेंबरमध्ये होणाऱ्या अधिकृत जागतिक अनावरणानंतर ही एसयूव्ही भारतात लॉन्च केली जाईल. टोयोटा इंडिया पुढील वर्षीच्या ऑटो एक्स्पोमध्ये नव्या पिढीची फॉर्च्युनर सादर करेल, अशी अपेक्षा आहे.

नव्या मॉडेलमध्ये डिझाईनपासून केबिनपर्यंत अनेक मोठे बदल दिसतील. अनेक वर्षांपासून ग्राहक आधुनिक फीचर्सची मागणी करत होते, ती कंपनी आता नव्या जनरेशनमध्ये पूर्ण करणार असल्याचे बोलले जात आहे.

बाहेरून गाडी पूर्वीपेक्षा जास्त शार्प, बोल्ड आणि प्रीमियम दिसेल. टेस्टिंगदरम्यान समोर आलेल्या फोटोंवरून असे दिसते की, यात नव्या डिझाईनची मोठी फ्रंट ग्रिल, स्लीक एलईडी लाईट्स आणि उंच बोनट असेल, त्यामुळे रस्त्यावर गाडीची छाप अधिक दमदार पडेल. गाडीचा आकार जवळपास जुन्या मॉडेलसारखाच राहण्याची शक्यता आहे, पण बॉडी पॅनेल्सवरील शार्प लाईन्स आणि नवीन अलॉय व्हील्समुळे ती अधिक स्पोर्टी दिसेल. मागच्या बाजूलाही नव्या डिझाईनचे टेललॅम्प आणि एलईडी लाईट बार जोडले जाण्याची शक्यता सांगितली जात आहे.

सर्वात मोठा बदल इंटीरियरमध्ये दिसेल. नवीन फॉर्च्यूनरचे केबिन अधिक आधुनिक आणि स्मार्ट असेल. वायरलेस कनेक्टिव्हिटी असलेली मोठी टचस्क्रीन इन्फोटेनमेंट सिस्टम आणि पूर्णपणे डिजिटल ड्रायव्हर डिस्प्ले किंवा इन्स्ट्रुमेंट क्लस्टर मिळू शकतो. ग्राहकांच्या मागणीनुसार पॅनोरमिक सनरूफही दिला जाऊ शकतो.

सुरक्षेसाठी अॅडव्हान्स ड्रायव्हर असिस्टन्स सिस्टम (ADAS) मिळण्याची शक्यता आहे, ज्यात ऑटोमॅटिक इमर्जन्सी ब्रेक आणि लेन-कीप असिस्ट यांसारखी फीचर्स असतील. पार्किंग सोपे व्हावे म्हणून 360 डिग्री कॅमेराही दिला जाऊ शकतो.

इंजिनमध्ये फारसा बदल होण्याची शक्यता नाही. कंपनीचे जुने आणि विश्वासू 2.8 लिटर डिझेल इंजिन आणि काही बाजारांसाठी पेट्रोल इंजिनचा पर्याय मिळू शकतो. मॅन्युअल आणि ऑटोमॅटिक असे दोन्ही गिअरबॉक्स असतील. कठीण रस्त्यांसाठी 4x4 चा पर्याय कायम राहील. सुधारित सस्पेंशन सेटअपमुळे लांबचा प्रवास अधिक आरामदायक आणि झटक्यांशिवाय होणार आहे.

भारतीय बाजारात या प्रीमियम एसयूव्हीचे एकछत्री साम्राज्य दिसते. अलीकडेच तिच्या विक्रीत मोठी वाढ नोंदवली गेली आहे. लॉन्च झाल्यानंतर ही गाडी जीप मेरिडियन आणि स्कोडा कोडियाक यांसारख्या गाड्यांना जोरदार टक्कर देईल.