टोयोटाच्या या 2 कारना मिळणार फेसलिफ्ट, जाणून घ्या काय बदलणार
टोयोटा ग्लान्झा आणि टोयोटा इनोव्हा हायक्रॉस या दोन लोकप्रिय मॉडेल्सचे फेसलिफ्ट व्हर्जन लवकरच बाजारात येण्याची शक्यता आहे.
टोयोटा कंपनी भारतातल्या आपल्या दोन महत्त्वाच्या आणि लोकप्रिय कारना नव्या रूपात आणण्याच्या तयारीत आहे. यामध्ये टोयोटा ग्लान्झा आणि टोयोटा इनोव्हा हायक्रॉस या दोन मॉडेल्सचा समावेश आहे. कंपनीच्या या दोन्ही महत्त्वाच्या मॉडेल्सना लवकरच फेसलिफ्ट मिळण्याची शक्यता वर्तवली जात आहे, म्हणजे या कारचे फेसलिफ्ट व्हर्जन लवकरच मार्केटमध्ये दाखल होणार आहेत. ग्लान्झाचे नवीन मॉडेल ऑक्टोबर 2026 मध्ये येईल असा अंदाज आहे, तर इनोव्हा हायक्रॉसचे अपडेटेड व्हर्जन 2027 च्या सुरुवातीला सादर केले जाऊ शकते.
टोयोटा ग्लान्झा ही मारुती सुझुकी बलेनोसोबत प्लॅटफॉर्म आणि अनेक यांत्रिक भाग शेअर करणारी प्रीमियम हॅचबॅक आहे, म्हणजे या दोन्ही कारची अंतर्गत रचना आणि अनेक पार्ट्स एकसारखे आहेत. या कारचे नवीन फेसलिफ्ट मॉडेल 14 ऑक्टोबर 2026 रोजी सादर होईल असं सांगितलं जातंय. या अपडेटमध्ये कारच्या बाह्य डिझाइनसोबतच इंजिन आणि फीचर्समध्येही बदल बघायला मिळू शकतात. सध्याच्या 4-सिलिंडर इंजिनऐवजी नवीन 1.2-लिटर 3-सिलिंडर नॅचरली एस्पिरेटेड पेट्रोल इंजिन दिलं जाण्याची शक्यता आहे. याशिवाय कारच्या फ्रंट ग्रिल आणि बंपरमध्येही बदल होऊ शकतात. कारमध्ये ADAS, व्हेंटिलेटेड फ्रंट सीट्स आणि वायरलेस फोन चार्जर यासारखी आधुनिक फीचर्सही मिळतील अशी अपेक्षा आहे. फेसलिफ्टनंतर या कारच्या किंमतीतही बदल संभवतो. मारुती सुझुकी बलेनो, ह्युंदाई आय20 आणि टाटा अल्ट्रोज या कारशी स्पर्धा करणाऱ्या ग्लान्झाला नव्या फीचर्समुळे कंपनी ग्राहकांसाठी अधिक आकर्षक बनवण्याचा प्रयत्न करू शकते.
दुसरीकडे, टोयोटा इनोव्हा हायक्रॉसचं फेसलिफ्ट मॉडेल 2027 च्या सुरुवातीला येण्याची शक्यता आहे. भारतात या मॉडेलच्या टेस्टिंगदरम्यान काही टेस्ट म्यूल्स, म्हणजे रस्त्यावर चाचणीसाठी फिरणाऱ्या नव्या मॉडेलच्या गाड्या, आधीच दिसून आले आहेत आणि पेटंटमधूनही आगामी डिझाइनसंबंधी काही संकेत समोर आले आहेत. नव्या हायक्रॉसच्या फ्रंट प्रोफाइलमध्ये मोठा बदल होण्याची शक्यता वर्तवली जातेय. मोठी ग्रिल, स्लिम हेडलॅम्प्स, अपडेटेड लाइटिंग आणि नवीन बंपरमुळे कारचा लूक अधिक मॉडर्न होऊ शकतो. टोयोटाच्या नव्या मॉडेल्सपासून या डिझाइनसाठी प्रेरणा घेतली जाण्याची शक्यता आहे.
फक्त बाहेरचं रूपच नाही, तर केबिनमध्येही बदल होण्याची शक्यता आहे. डॅशबोर्ड, सीट अपहोल्स्ट्री आणि इन्फोटेनमेंट सिस्टममध्ये सुधारणा बघायला मिळू शकते. कारची 3-रो सीटिंग आणि प्रशस्त केबिन मात्र कायम राहील अशी अपेक्षा आहे. दोन्ही कारच्या पेट्रोल आणि स्ट्रॉंग-हायब्रिड पॉवरट्रेनमध्ये मोठा बदल न करता कंपनीचा भर डिझाइन, फीचर्स आणि इंटीरियरवरच जास्त असू शकतो, असं यावरून दिसून येतं.
