मूर्तिजापूर स्थानकाचा १३ कोटींतून कायापालट, पण एक्स्प्रेसच्या थांब्यासाठी प्रवासी अजूनही वाट पाहताहेत

अकोला : मध्य रेल्वेच्या भुसावळ विभागातील मूर्तिजापूर हे महत्त्वाचे जंक्शन आहे. अमृत भारत रेल्वेस्थानक योजनेंतर्गत या स्थानकावर तब्बल १३ कोटी रुपयांहून अधिक निधी खर्च करण्यात आला असून, त्यामुळे स्थानकाचा कायापालट झाला आहे. आधुनिक इमारत, आकर्षक परिसर आणि प्रवाशांसाठीच्या विविध सुविधा उभारण्यात आल्या आहेत. स्थानकाचे रूप बदलले असले, तरी महत्त्वाच्या एक्स्प्रेस गाड्यांना थांबा मिळण्याचा प्रश्न मात्र अजूनही तसाच कायम असल्याचे चित्र आहे. कोट्यवधी रुपयांचा विकास झाला, पण प्रवाशांच्या प्रवासातील अडचणी कधी दूर होणार, असा सवाल आता विचारला जात आहे.

मूर्तिजापूर स्थानकावरून दर्यापूर, अचलपूर, कारंजा, दिग्रस, मंगरुळपीर यांसह आसपासच्या अनेक गावांतील प्रवासी मुंबई, पुणे, नागपूर, सूरत आणि अहमदाबादकडे जातात. हे स्थानक व्यापारी, विद्यार्थी, नोकरदार आणि रुग्ण यांच्यासाठीही महत्त्वाचे आहे. मात्र प्रवाशांची संख्या वाढत असताना, त्या तुलनेत आवश्यक गाड्यांचे (१२१३५/१२१३६) थांबे इथे उपलब्ध नाहीत. त्यामुळे अनेकांना अकोला किंवा बडनेरा रेल्वेस्थानकावर जावे लागते. यामुळे जादा प्रवासखर्च आणि वेळेचा अपव्यय सहन करावा लागत आहे.

विशेष म्हणजे, मूर्तिजापूर येथे महत्त्वाच्या एक्स्प्रेस गाड्यांना थांबा मिळावा, या मागणीसाठी वर्षभरापूर्वी सत्ताधारी भाजपच्या वतीने रेल रोको आंदोलनाचा इशाराही देण्यात आला होता. त्यानंतर मुख्यमंत्री देवेंद्र फडणवीस यांनी केंद्रीय रेल्वेमंत्र्यांना पत्र पाठवून तीन महत्त्वाच्या एक्स्प्रेस गाड्यांना मूर्तिजापूरला थांबा देण्याची मागणी केली होती. या गाड्यांमध्ये अमरावती-पुणे (११०२५/११०२६), अमरावती-तिरुपती एक्स्प्रेस (१२७६५/१२७६६) आणि नागपूर-पुणे सुपरफास्ट एक्स्प्रेस यांचा समावेश आहे.

या गाड्यांना १ मे २०२५ पासून थांबा मंजूर झाल्याचे सांगण्यात आले होते. पण प्रवाशांच्या दाव्यानुसार, प्रत्यक्षात या गाड्या अजूनही मूर्तिजापूर स्थानकावर थांबत नाहीत. म्हणजेच मंजुरी आणि प्रत्यक्ष अंमलबजावणी यात तफावत असल्याचे समोर आले आहे. त्यामुळे प्रवाशांनी सतर्क राहावे, असे आवाहन करण्यात आले आहे.

मुंबईला जाणाऱ्या प्रवाशांची अडचण तर यापेक्षाही गंभीर आहे. रात्री १२ वाजून ४५ मिनिटांनी सेवाग्राम एक्स्प्रेस गेल्यानंतर मुंबईकडे जाण्यासाठी पुढची गाडी मिळेपर्यंत तब्बल १८ तास वाट पाहावी लागते, अशी प्रवाशांची तक्रार आहे. मुख्यमंत्री पातळीवरून पत्रव्यवहार झाल्यानंतरही गाड्यांचे थांबे प्रत्यक्षात का सुरू झाले नाहीत, रेल्वे प्रशासनाकडे काय पाठपुरावा केला गेला आणि मूर्तिजापूरच्या प्रवाशांना दिलासा देण्यासाठी कोणते प्रयत्न होणार, याबाबत संबंधितांची भूमिका महत्त्वाची ठरणार आहे.