सौरभच्या हत्येप्रकरणी मुस्कान रस्तोगी आणि साहिल शुक्ला यांना न्यायालयाने ठरवले दोषी

मेरठमधील 'ब्लू ड्रम' हत्याकांडात न्यायालयाने मुस्कान रस्तोगी आणि तिचा प्रियकर साहिल शुक्ला या दोघांना सौरभच्या हत्येप्रकरणी दोषी ठरवले आहे. देशभर गाजलेल्या या प्रकरणात दोघांनी मिळून सौरभची हत्या केली, हे न्यायालयाने मान्य केले. सौरभचा मृतदेह तुकडे करून निळ्या ड्रममध्ये लपवण्यात आला होता.

निकालानंतर दोन्ही दोषी अस्वस्थ आणि तणावाखाली असल्याची माहिती कारागृह प्रशासनाने दिली आहे. कारागृहाचे वरिष्ठ अधीक्षक वीरेश राज शर्मा यांनी सांगितले की, मुस्कान गेल्या तीन-चार दिवसांपासून आपल्या सुमारे सात वर्षांच्या मोठ्या मुलीला भेटू देण्याची विनंती करत आहे. मात्र, अजून तिची आणि मुलीची भेट घडवून आणण्यात आलेली नाही. गेल्या तीन दिवसांपासून मुस्कान कारागृहात पूजा करत होती, असेही सांगण्यात आले.

दोघांच्याही वागण्यात बदल दिसून येत आहे. रात्रीचे आणि सकाळचे जेवण त्यांनी कमी केले आहे, तसेच त्यांना नीट झोपही लागत नाही, असे सांगण्यात आले. साहिलने कारागृहातील सहकैद्यांशी बोलणेच बंद केले असल्याची माहिती समोर आली आहे.

या प्रकरणाची पार्श्वभूमी अशी की, सौरभ मर्चंट नेव्हीमध्ये अधिकारी होता. तो २४ फेब्रुवारी २०२५ रोजी लंडनहून मेरठला परत आला होता. त्यानंतर ३ मार्च २०२५ रोजी मुस्कानने साहिलच्या मदतीने सौरभच्या जेवणात औषध मिसळून त्याला बेशुद्ध केले. बेडरूममध्ये झोपलेल्या सौरभच्या छातीत चाकू खुपसून त्याची हत्या करण्यात आली.

हत्येनंतर मृतदेहाचे तुकडे करून ते प्लास्टिकच्या ड्रममध्ये ठेवण्यात आले. त्यावर सिमेंटचे मिश्रण टाकून मृतदेह लपवण्याचा प्रयत्न करण्यात आला. कुटुंबीय आणि शेजाऱ्यांची दिशाभूल करण्यासाठी मुस्कान शिमला-मनालीला गेली होती, असे तपासात समोर आले होते.

या संवेदनशील प्रकरणाच्या सुनावणीत दोन्ही दोषींना जिल्हा न्यायालयात व्हिडिओ कॉन्फरन्सिंगद्वारे हजर करण्यात आले. न्यायालयाने त्यांना फॉरेन्सिक अहवालासह विविध मुद्द्यांवर शेवटची विचारणा केली. वीरेश राज शर्मा यांच्या म्हणण्यानुसार, दोघांना वेगवेगळे न्यायालयासमोर उभे करण्यात आले. न्यायाधीशांनी पुरावे आणि अहवालांबाबत त्यांच्याशी संवाद साधला आणि दोघांनीही आपली बाजू मांडली.

सुनावणी थोडक्यात आटोपली. शिक्षेबाबतचा अंतिम निर्णय होण्यापूर्वी दोघांना पुन्हा न्यायालयासमोर बोलावले जाण्याची शक्यता आहे.