जगातील एकमेव तरंगणारे राष्ट्रीय उद्यान भारतात, मणिपूरच्या लोकटक तलावावर आहे केबुल लामजाओ

राष्ट्रीय उद्यान म्हटले की आपल्या डोळ्यांसमोर दाट जंगले, उंच डोंगर आणि मैदानी प्रदेश येतात. पण भारतात एक राष्ट्रीय उद्यान असे आहे, जे चक्क पाण्यावर तरंगते. मणिपूरमधील या उद्यानाची रचना इतर उद्यानांपेक्षा वेगळी आहे, असे सांगितले जाते.

हे उद्यान मणिपूर राज्यात लोकटक तलावावर आहे आणि त्याचे नाव केबुल लामजाओ आहे. असा तलाव जगभरात इतर कोणत्याही ठिकाणी पाहायला मिळणार नाही, हे ऐकून अनेकांना आश्चर्यच वाटेल. तलावावर तरंगणाऱ्या वनस्पतींच्या थरांमुळे येथे अनोखी परिसंस्था निर्माण झाली आहे.

या उद्यानाची सर्वात खास गोष्ट म्हणजे ते फुम्डीवर उभे आहे. स्थानिकांच्या मते फुम्डी ही पाण्यात तरंगणारी एक वनस्पती आहे. तलावात अशा अनेक फुम्ड्या दिसतात. त्यांच्या आधारानेच पाण्यावर तरंगत तलावाची सफर करता येते. कालांतराने साचत गेलेल्या वनस्पती, माती आणि सेंद्रिय पदार्थांपासून ही फुम्डी तयार झालेली असते.

लोकटक तलाव भारताच्या पूर्व भागात आहे. पाण्यावर तरंगणाऱ्या फुम्ड्या हीच या तलावाची खास ओळख आहे. विशेष म्हणजे काही लोक या तरंगत्या रचनांवरच राहतात. फुम्ड्यांवर फुमसांग नावाच्या पारंपरिक झोपड्या दिसतात आणि तिथले दृश्य पाहताना खूपच छान वाटते.

फिरायला गेलात तर निसर्गाच्या सान्निध्यात सुंदर फोटो किंवा व्हिडिओ काढता येतात. पर्यटकांना इथे नौकाविहार आणि जलक्रीडांचाही आनंद घेता येतो.

इथे तपकिरी शिंगांचे हरीण पाहायला मिळते, ज्याला संगाई हरीण म्हणून ओळखले जाते. त्याशिवाय अनेक प्रकारचे पाणपक्षीही या परिसरात दिसतात. दुर्मिळ वन्यजीव आणि पाणपक्ष्यांमुळे हे ठिकाण जैवविविधतेसाठी महत्त्वाचे मानले जाते.

एकूणच तुम्हाला निसर्गाची आवड असेल आणि शांत ठिकाणी फिरायला जायचा विचार असेल, तर पाण्यावर तरंगणारे हे उद्यान तुमच्यासाठी चांगला पर्याय ठरू शकेल.