दिवाळीपूर्वी राज्यातल्या हवामानात बदल; कुठे पाऊस, कुठे निरभ्र आकाश, हवामान विभागाचा अंदाज

राज्यातल्या हवामानात सतत बदल होताना दिसत आहेत. काही भागांत लोकांना उष्ण आणि दमट वातावरणाचा त्रास जाणवत आहे, तर दुसरीकडे काही जिल्ह्यांत पाऊस पडण्याची शक्यता वर्तवण्यात आली आहे. हवामान विभागाने दिलेल्या अंदाजानुसार येत्या काही दिवसांत राज्यातले हवामान संमिश्र स्वरूपाचे राहण्याची शक्यता आहे. म्हणजेच सगळीकडे एकसारखे वातावरण नसेल, तर विभागानुसार ते वेगवेगळे असेल.

हवामान विभागाच्या अंदाजानुसार 22 ऑक्टोबर रोजी उत्तर कोकणातल्या जिल्ह्यांमध्ये काही ठिकाणी उष्ण आणि दमट हवामान राहण्याची दाट शक्यता आहे. त्यामुळे नागरिकांना उकाड्याचा सामना करावा लागू शकतो. याउलट दक्षिण कोकण-गोवा आणि दक्षिण मध्य महाराष्ट्रातल्या जिल्ह्यांत तुरळक ठिकाणी हलका पाऊस किंवा मेघगर्जनेसह पाऊस पडण्याचा अंदाज आहे. दरम्यान, उत्तर कोकण, उत्तर मध्य महाराष्ट्र आणि मराठवाड्यातल्या जिल्ह्यांमध्ये आकाश मुख्यतः निरभ्र राहण्याची शक्यता आहे.

23 ऑक्टोबरलाही दक्षिण कोकण-गोवा आणि दक्षिण मध्य महाराष्ट्रात तुरळक ठिकाणी पावसाचा अंदाज कायम आहे. उत्तर कोकण, उत्तर मध्य महाराष्ट्र आणि मराठवाड्यात मात्र हवामान निरभ्र राहील.

कमाल आणि किमान तापमानाबद्दलही हवामान विभागाने महत्त्वाची माहिती दिली आहे. पुढच्या दोन दिवसांत महाराष्ट्रातल्या कमाल तापमानात 2 ते 3 अंश सेल्सिअसने हळूहळू वाढ होण्याचा अंदाज आहे. त्यानंतर कमाल तापमानात मोठा बदल होण्याची शक्यता नाही. दुसरीकडे, पुढच्या 4 ते 5 दिवसांत महाराष्ट्र परिसरात किमान तापमानात कोणताही मोठा बदल होणार नाही, असे स्पष्ट करण्यात आले आहे. शेजारच्या गुजरात प्रदेशातही पुढचे 4 ते 5 दिवस कमाल तापमान स्थिर राहील.

आता विभागवार अंदाज पाहूया. 22 ऑक्टोबरला कोकणात तुरळक ठिकाणी पाऊस पडण्याची शक्यता असून तुरळक ठिकाणी उष्ण आणि दमट हवामानही राहू शकते. मध्य महाराष्ट्रात तुरळक ठिकाणी पाऊस पडण्याची शक्यता आहे. मराठवाडा आणि विदर्भात हवामान कोरडे राहण्याची शक्यता आहे.

23 ऑक्टोबरला कोकण आणि मध्य महाराष्ट्रात तुरळक ठिकाणी पाऊस पडण्याची शक्यता आहे, तर मराठवाडा आणि विदर्भात हवामान कोरडे राहण्याची शक्यता आहे.

24 ऑक्टोबरला मात्र चित्र बदलेल. कोकण, मध्य महाराष्ट्र, मराठवाडा आणि विदर्भ या चारही विभागांत हवामान कोरडे राहण्याची शक्यता आहे.