कराडमध्ये डॉक्टर दाम्पत्याची १ कोटी १५ लाखांची फसवणूक, सीबीआय अधिकारी असल्याचे भासवल्याचा आरोप

वैद्यकीय पदव्युत्तर अभ्यासक्रमात प्रवेश मिळवून देतो असे सांगून एका डॉक्टर दाम्पत्याकडून लाखो रुपये घेतल्याचा आरोप आहे. त्यानंतर केंद्रीय अन्वेषण विभागाच्या (सीबीआय) तपासात तुमचे नाव आले आहे, अशी भीती दाखवून कथितरीत्या खंडणी उकळण्यात आली आणि पुन्हा कोट्यवधी रुपये मागण्यात आले, असे फिर्यादीत नमूद आहे. हा प्रकार उंब्रज आणि कराड परिसरात समोर आला आहे. दाम्पत्याची एकूण १ कोटी १५ लाख रुपयांची फसवणूक झाल्याचा आरोप असून, आणखी १ कोटी ३५ लाख रुपये मागितल्याचेही फिर्यादीत म्हटले आहे.

डॉ. वैशाली अजित थोरात यांनी दिलेल्या फिर्यादीवरून कराड शहर पोलीस ठाण्यात १६ ऑक्टोबर २०२६ रोजी रात्री ९.३८ वाजता गुन्हा दाखल झाला. एफआयआरमध्ये पुष्कर सुभाष कुलकर्णी (रा. कराड), अनिकेत सदाशिव चव्हाण (रा. वडगांव, उंब्रज) आणि दोन अनोळखी व्यक्तींचा उल्लेख आहे. हा प्रकार एप्रिल ते ऑक्टोबर २०२६ या काळात घडल्याचे फिर्यादीत सांगितले आहे.

फिर्यादीतील माहितीनुसार, कराडमध्ये खासगी शिकवणी घेणारा पुष्कर कुलकर्णी डॉक्टर दाम्पत्याच्या संपर्कात आला. त्यांच्या मुलाने एमबीबीएस पूर्ण केले असून तो पदव्युत्तर वैद्यकीय प्रवेश परीक्षेची तयारी करत आहे, हे त्याला माहीत होते. मॅनेजमेंट कोट्यातून प्रवेश मिळवून देण्याची व्यवस्था करता येईल, असे सांगून त्याने दाम्पत्याचा विश्वास मिळवल्याचा आरोप आहे.

१३ एप्रिल २०२६ रोजी कराड तहसील कार्यालय ते कावनाका रस्त्यावर झालेल्या भेटीत ३५ लाख रुपये रोख देण्यात आले. त्याची नोटरी पावती करून देण्यात आली आणि परतफेडीची तारीख २५ सप्टेंबर २०२६ अशी नमूद केली, असे फिर्यादीत आहे. जुलैमध्ये आणखी १५ लाख रुपये घेतल्याचा आरोप असून, त्याबद्दल धनादेश देण्यात आल्याचे तक्रारीत म्हटले आहे. अशा रीतीने प्रवेशाच्या आमिषाने एकूण ५० लाख रुपये घेतल्याचा आरोप आहे.

त्यानंतर प्रकाराला वेगळे वळण मिळाले. नीट-पीजी परीक्षेतील पेपर घोटाळ्याची चौकशी सुरू आहे, डॉक्टर दाम्पत्याचे नाव तपासात आले आहे, त्यांचे फोनवरील संभाषण नोंदवले गेले आहे आणि अटक होऊ शकते, अशी भीती घालण्यात आल्याचे फिर्यादीत नमूद आहे. १९ ऑगस्ट रोजी त्यांना तासवडे टोलनाका परिसरात बोलावून नंतर वहागावजवळ भेटल्याचा उल्लेख तक्रारीत आहे. तिथे कथित आरोपीने प्रकरण मिटवण्यासाठी सीबीआयकडून दहा कोटी रुपये मागितले जात आहेत, असे सांगितल्याचा आरोप आहे. एवढी रक्कम देणे शक्य नाही, असे दाम्पत्याने सांगितल्यावर दोन कोटी रुपये देऊन प्रकरण मिटवण्याचा प्रस्ताव ठेवण्यात आल्याचाही आरोप आहे.

फिर्यादीच्या म्हणण्यानुसार, भीतीपोटी दाम्पत्याने पतसंस्थेतील ठेवी मोडल्या आणि सोन्याचे दागिने विकून सुमारे ६५ लाख रुपये जमा केले. २० ऑगस्ट रोजी रात्री पुण्यातील आंबेगाव परिसरात भेट ठरली. काही वेळाने तिथे पांढऱ्या रंगाची चारचाकी आली. त्यातील लोकांनी आपण सीबीआय अधिकारी असल्याचे भासवून दमदाटी केली आणि पैशांची बॅग गाडीत ठेवायला सांगितली, असा आरोप आहे. त्यानंतर घाबरलेले दाम्पत्य लगेच पोलिसांकडे न जाता पुण्यातील एका नातेवाइकाकडे राहिले. प्रवेशाच्या आमिषाने दिलेल्या ५० लाखांसह आणखी ६५ लाख गेल्याचा दावा आहे, म्हणजे एकूण १ कोटी १५ लाख रुपये.

३ ऑक्टोबर रोजी सकाळी एक अनोळखी व्यक्ती डॉक्टरांच्या घराच्या प्रवेशद्वारावर आली. आपण राष्ट्रीय वैद्यकीय शिक्षण मंडळाशी संबंधित अधिकारी असल्याचे तिने सांगितले आणि सातारला आणखी रक्कम घेऊन यायला सांगितले, असा आरोप आहे. त्यानंतर कथित आरोपींकडून १ कोटी ३५ लाख रुपयांची मागणी झाली आणि पैसे न दिल्यास नुकसान करण्याची धमकी देण्यात आली, असे फिर्यादीत म्हटले आहे.

नातेवाइकाच्या मदतीने सगळी माहिती घेतल्यानंतर दाम्पत्याने पोलिसांकडे जाण्याचे ठरवले. ९ ऑक्टोबर रोजी तक्रार अर्ज दिल्याचा फिर्यादीत उल्लेख आहे. ११ ऑक्टोबर रोजी पोलिसांनी संबंधितांना बोलावून चौकशी केली. त्या वेळी पुष्कर कुलकर्णी याने ५० लाख रुपये घेतल्याचे मान्य केले आणि मॅनेजमेंट कोट्यातून प्रवेश मिळवून देता येणार नाही, असे सांगितले, असा फिर्यादीचा दावा आहे. पुण्यात सीबीआय अधिकारी म्हणून आलेल्या व्यक्तीने घेतलेले ६५ लाख रुपये अनिकेत चव्हाण याच्या मदतीने स्वीकारल्याचेही त्याने सांगितले, असे तक्रारीत नमूद आहे.

१४ ऑक्टोबरपर्यंत पैसे परत करण्याचे आश्वासन मिळाल्यामुळे दाम्पत्याने लगेच गुन्हा दाखल केला नाही, असे फिर्यादीत म्हटले आहे. मात्र १५ ऑक्टोबर रोजी कराडमधील हॉटेल अलंकार येथे झालेल्या भेटीत तक्रार केल्यास तुरुंगात पाठवण्याची धमकी दिल्याचा आरोप आहे. त्यानंतर दाम्पत्याने पोलिसांत गुन्हा दाखल करण्याचा निर्णय घेतला.

कराड शहर पोलीस ठाण्यात भारतीय न्याय संहितेच्या कलम ३(५), ३०८(२), ३०८(३), ३०८(६), ३०८(७), ३१८(२), ३१८(४), ३१९(२), ३३६(३) आणि ३३८ नुसार गुन्हा नोंदवण्यात आला आहे. तपासाची जबाबदारी पोलीस निरीक्षक निखिल श्रीपती मगदूम यांच्याकडे दिल्याची नोंद एफआयआरमध्ये आहे. कथितरीत्या वापरलेली वाहने, पैशांचे व्यवहार, धनादेश, नोटरी कागदपत्रे, मोबाइल संभाषणांच्या नोंदी आणि घरातील सीसीटीव्ही फुटेज तपासासाठी महत्त्वाचे ठरू शकतात.

सुशिक्षित डॉक्टर कुटुंब अशा प्रकारात अडकत असेल तर सामान्य माणसाचे काय, अशी चर्चा सुरू आहे. पोलिसांनी काटेकोर तपास करून संशयित आरोपींना योग्य शिक्षा होण्यासाठी प्रयत्न करावेत, अशी अपेक्षा व्यक्त होत आहे. अनिकेत चव्हाण याचा पूर्व इतिहास उंब्रज पोलीस ठाण्यात नोंदलेला असून, तडीपारीच्या वेळी कोणत्या राजकीय नेत्याने त्याला वाचवले, याबाबत उलटसुलट चर्चा सुरू झाली आहे.