कोपरखैरणेत फिरत्या मासेविक्रेत्यांमुळे मार्केटमधील महिलांना फटका; कारवाईची मागणी

कोपरखैरणे गावातील नाखवा मच्छी मार्केटमध्ये पिढ्यानपिढ्या मासे विकणाऱ्या स्थानिक आगरी-कोळी महिलांचा रोजीरोटीचा प्रश्न उभा राहिला आहे. गावातले अंतर्गत रस्ते आणि गल्लीबोळांतून फिरून मासे विकणाऱ्या अनधिकृत विक्रेत्यांमुळे मार्केटमधला धंदा मोठ्या प्रमाणात मंदावला आहे, असे या महिलांचे म्हणणे आहे.

हे विक्रेते थेट गिऱ्हाईकांच्या घराजवळ जाऊन मासे विकतात. त्यामुळे लोक मार्केटमध्ये येण्याचे टाळत आहेत आणि तिथे येणाऱ्या ग्राहकांची संख्या घटली आहे. दिवसभर बसूनही माल विकला जात नसल्याने महिलांना आर्थिक नुकसान सोसावे लागत आहे.

या महिला अनेक वर्षांपासून सकाळी आणि संध्याकाळी बाजारात बसून मासे विकतात आणि त्यावरच आपल्या कुटुंबाचा खर्च भागवतात. अलीकडच्या काळात गावातील रस्त्यांवर आणि गल्लीबोळांत फिरणाऱ्या विक्रेत्यांची संख्या वाढली आणि त्याचा फटका पारंपरिक बाजाराला बसला, असे त्यांनी सांगितले. या पार्श्वभूमीवर अनधिकृत फिरत्या विक्रेत्यांवर तातडीने कारवाई करावी, अशी मागणी त्यांनी नवी मुंबई महापालिका प्रशासनाकडे केली आहे.

मार्केटमधल्या महिला रोज पहाटे मोठ्या कष्टाने वेगवेगळ्या प्रकारचे मासे खरेदी करून विक्रीसाठी आणतात. पण गिऱ्हाईक कमी झाल्याने आणलेला माल संपत नाही. शिल्लक राहिलेले मासे खराब होतात आणि त्यामुळे नुकसान आणखी वाढते. आधीच खर्च वाढलेला असताना विक्री घटल्याने कुटुंब चालवण्याचा प्रश्न गंभीर झाला आहे, असे त्यांचे म्हणणे आहे.

रस्त्यांवर फिरून मासे विकणाऱ्या अनेकांकडे अधिकृत परवाने नाहीत, असा आरोप स्थानिक महिलांनी केला आहे. त्यामुळे महापालिकेने या विक्रेत्यांची तपासणी करून अनधिकृत विक्रीला आळा घालावा, अशी मागणी होत आहे. अधिकृत बाजारात धंदा करणाऱ्या महिलांना नियम पाळावे लागतात, मग रस्त्यांवरच्या विक्रेत्यांकडे प्रशासन दुर्लक्ष का करते, असा सवालही त्यांनी विचारला आहे.

मच्छी विक्रेत्या मुक्ता बाळकृष्ण पाटील म्हणाल्या की, आम्ही वर्षानुवर्षे या मार्केटमध्ये बसून सन्मानाने धंदा करत आहोत आणि आमच्या कुटुंबांचा खर्च याच व्यवसायावर अवलंबून आहे. आता रस्तोरस्ती फिरून अनधिकृतपणे मासे विकणाऱ्यांमुळे आमच्या व्यवसायावर गदा आली आहे. दिवसभर बाजारात बसूनही बोहनी होणे कठीण झाले आहे. त्यामुळे महापालिकेने या विक्रेत्यांवर तातडीने कारवाई करावी, अन्यथा आम्हाला तीव्र आंदोलन करावे लागेल, असा इशारा त्यांनी दिला.

या वेळी सुमित्रा संजय पाटील, कल्पना विजय तांडेल, फशुबाई मधुकर पाटील, अस्मिता सूर्यकांत पाटील, सावित्री बळीराम पाटील, लता भगवान पाटील आणि निर्मला दत्तात्रय म्हात्रे यांच्यासह इतर महिला विक्रेत्यांनीही आपल्या अडचणी मांडल्या. स्थानिक महिलांच्या पारंपरिक व्यवसायाचा प्रश्न समोर आल्यानंतर नवी मुंबई महापालिका प्रशासन काय भूमिका घेणार, याकडे आता सर्वांचे लक्ष लागले आहे.