काव्या मारन आणि अनिरुद्ध रविचंद्रर यांच्या लग्नाची चर्चा, रेवंत रेड्डींना आमंत्रण

आयपीएल फ्रँचायझी सनरायझर्स हैदराबादची मालकीण काव्या मारन आणि संगीतकार अनिरुद्ध रविचंद्रर लवकरच लग्न करणार असल्याच्या अफवा गेले काही दिवस सुरू होत्या. आता या चर्चेला पुन्हा जोर आला आहे, कारण तेलंगणाचे मुख्यमंत्री ए. रेवंत रेड्डी यांनी एक पोस्ट केली आहे.

सन ग्रुपचे चेअरमन कलानिधी मारन आणि त्यांच्या पत्नी कावेरी मारन यांनी हैदराबादमधील ज्युबिली हिल्स येथे मुख्यमंत्री रेवंत रेड्डी यांच्या निवासस्थानी त्यांची भेट घेतली. मुलगी काव्या हिच्या रिसेप्शनचे आमंत्रण देण्यासाठी ही भेट झाल्याची माहिती आहे. त्यानंतर रेवंत रेड्डी यांनी या भेटीचे फोटो आणि व्हिडिओ आपल्या अधिकृत हँडलवरून शेअर केले. ते सोशल मीडियावर व्हायरल होत आहेत.

तेलंगणा सीएमओच्या 'एक्स' अकाऊंटवर टाकलेल्या फोटोंच्या कॅप्शनमध्ये म्हटले आहे की, सन ग्रुपचे चेअरमन कलानिधी मारन आणि श्रीमती कावेरी मारन यांनी माननीय मुख्यमंत्री श्री. रेवंत रेड्डी यांची ज्युबिली हिल्स येथील निवासस्थानी भेट घेतली आणि त्यांना आपली मुलगी काव्या मारन हिच्या विवाह सोहळ्यासाठी आमंत्रित केले. काव्या मारन आणि अनिरुद्ध रविचंद्रन यांचा विवाह सोहळा २१ नोव्हेंबर रोजी चेन्नई येथे पार पडेल, असेही त्यात लिहिले आहे.

लग्नाच्या तारखांबद्दल मिळालेल्या माहितीनुसार, काव्या आणि 'जेलर २' चे संगीतकार अनिरुद्ध ११ नोव्हेंबर रोजी लग्न करणार आहेत. हे लग्न ग्रीसमध्ये कुटुंब आणि मित्रमंडळींच्या उपस्थितीत होईल. त्यानंतर २१ नोव्हेंबर रोजी चेन्नईतील एका फाइव्ह स्टार हॉटेलमध्ये भव्य रिसेप्शन होण्याची शक्यता आहे. या रिसेप्शनला अनेक प्रमुख चित्रपट कलाकार, क्रिकेटपटू आणि राजकीय व्यक्ती येण्याची अपेक्षा आहे. मात्र काव्या मारन किंवा अनिरुद्ध रविचंद्रर या दोघांनीही अजून याची अधिकृत घोषणा केलेली नाही.

काव्या मारन ही कलानिधी मारन आणि कावेरी मारन यांची मुलगी आहे. सन ग्रुपच्या मालकीच्या इंडियन प्रीमियर लीग (IPL) फ्रँचायझी सनरायझर्स हैदराबादची ती मालक आहे. आयपीएलच्या सामन्यांना हजर राहून आपल्या संघाला पाठिंबा देताना ती अनेकदा दिसते.

अनिरुद्ध रविचंद्रर हा प्रसिद्ध संगीतकार आहे. २०१२ मध्ये तमिळ चित्रपट '3' मधील 'व्हाय धिस कोलावेरी डी' या गाण्यामुळे तो जगभर ओळखला गेला. २०१४ मध्ये त्याने 'कथी' आणि 'वेलाईइल्ला पट्टाधारी' या ब्लॉकबस्टर चित्रपटांना संगीत दिले. पुढे २०२१ मध्ये 'मास्टर', २०२३ मध्ये शाहरुख खानच्या 'जवान', २०२५ मध्ये अजित कुमारच्या 'विदामुयार्ची' या सर्व्हायव्हल ॲक्शन थ्रिलरला आणि २०२५ मध्येच रजनीकांतच्या 'कुली' या ब्लॉकबस्टर चित्रपटाला त्याने संगीत दिले.