कनिका कपूरचे दुसरे लग्नही मोडले, चार वर्षांनंतर पतीपासून विभक्त होण्याची घोषणा

'बेबी डॉल मैं सोने दी' आणि 'चिटीया कलिया रे' यांसारख्या हिट गाण्यांमुळे ओळखली जाणारी बॉलिवूड गायिका कनिका कपूर हिने लग्नाला चार वर्षे झाल्यानंतर पतीपासून विभक्त होत असल्याचे जाहीर केले आहे. एका पोस्टमधून तिने ही धक्कादायक बातमी चाहत्यांना दिली आणि आपले दुःखही बोलून दाखवले.

हा निर्णय कनिकाने स्वतः चाहत्यांसोबत शेअर केला. त्याचबरोबर, या काळात आपल्या खासगी आयुष्यात ढवळाढवळ करू नका, अशी विनंती तिने सर्वांना केली आहे.

कनिकाने आपल्या अधिकृत इंस्टाग्राम स्टोरीवर आधी लिहिले की, 'आम्ही खूप विचार केला.' त्यापुढे तिने म्हटले आहे, "प्रिय मित्र आणि कुटुंबीयांनो, खूप विचारविनिमय केल्यानंतर, मी आणि माझ्या पतीने विभक्त होण्याचा निर्णय घेतला आहे. आम्ही एकत्र घालवलेल्या वेळेबद्दल मी कृतज्ञ आहे. मी त्याला भविष्यासाठी खूप खूप शुभेच्छा देते. मी तुमच्याकडून दयाळूपणाची विनंती करते आणि कृपया आमच्या खासगी आयुष्यात ढवळाढवळ करणे टाळा अशीही विनंती आहे. सर्वांना प्रेम, कनिका."

या पोस्टमध्ये कनिकाने लग्नाच्या चार वर्षांनंतर पती गौतम यांच्यापासून विभक्त झाल्याची घोषणा केली आहे. मात्र तिने घटस्फोट या शब्दाचा उल्लेख केलेला नाही. दोघे वेगळे का झाले, त्याचे कारणही गायिकेने उघड केलेले नाही.

कनिकाने यापूर्वी गौतम हथिरामानी यांच्यासोबतच्या नात्याबद्दल सांगितले होते की, ते दोघे १५ वर्षांपासून एकमेकांना ओळखतात आणि खूप जवळचे मित्र आहेत. तिने हेही उघड केले होते की, गौतम यांना लग्नासाठी तिने स्वतः दोनदा विचारले होते. पहिल्यांदा २०१४ मध्ये आणि नंतर २०२० मध्ये तिने त्यांना लग्नाची मागणी घातली. त्यानंतर ऑगस्ट २०२१ मध्ये गौतम यांनी स्वतः कनिकाला लग्नाची मागणी घातली. पुढे २० मे २०२२ रोजी दोघांनी लंडनमध्ये कुटुंबातील लोकांच्या उपस्थितीत लग्न केले. म्हणजेच ते लग्न चार वर्षांनंतर आता संपुष्टात येत आहे.

ज्यांना माहिती नाही त्यांच्यासाठी सांगायचे तर, हे कनिका कपूरचे दुसरे लग्न होते. याआधी १९९८ मध्ये तिने उद्योगपती राज चंदोक यांच्याशी लग्न केले होते. त्या वेळी कनिका फक्त १८ वर्षांची होती. राज चंदोक यांच्यापासून तिला तीन मुले आहेत. अनाया आणि समायरा या दोन मुली, तर युवराज नावाचा एक मुलगा आहे. राज यांच्याशी लग्न झाल्यानंतर कनिका लंडनमध्ये स्थायिक झाली. पण २०१२ मध्ये ती पतीपासून वेगळी झाली. त्यानंतर ती भारतात परत आली आणि इथे गायन क्षेत्रात तिने आपली कारकीर्द घडवली.