रश्मिका मंदानाच्या 'मैसा'मधलं 'ओ मैसा रे' गाणं आलं; चित्रपट २७ नोव्हेंबरला चित्रपटगृहांत

रश्मिका मंदाना हिची प्रमुख भूमिका असलेल्या 'मैसा' या चित्रपटातलं पहिलं गाणं 'ओ मैसा रे' आता प्रदर्शित झालं आहे. गाण्याचा टीझर आल्यानंतर सगळीकडे उत्सुकता निर्माण झाली होती. प्रेक्षकांची ही वाढती उत्सुकता लक्षात घेऊन निर्मात्यांनी हे बहुप्रतीक्षित गाणं समोर आणलं. घोषणेनुसार हे गाणं अत्यंत दमदार आणि जोशपूर्ण असून उत्साह आणि रोमांचाची पातळी आणखी वाढवणारं आहे.

या गाण्यात रश्मिका निर्भय आणि अत्यंत आक्रमक अंदाजात दिसते. तिची उच्च ऊर्जा असलेली तांडवशैलीतली प्रस्तुती लगेच लक्ष वेधून घेते. अभिनयातला रांगडेपणा, तीव्र हावभाव आणि प्रभावी नृत्यदिग्दर्शन यामुळे गाणं वेगळ्याच उंचीवर पोहोचलं आहे. आदिवासी संस्कृतीची पार्श्वभूमी गाण्याला वेगळी ओळख देते. रश्मिकाचा हा अवतार पाहिल्यावर अशा दमदार आणि वेगळ्या धाटणीच्या चित्रपटाचं नेतृत्व करण्यासाठी ती योग्य निवड का आहे, हे स्पष्ट होतं.

हे गाणं जेक्स बिजॉय यांनी संगीतबद्ध केलं आहे. त्यांच्या पार्श्वसंगीताची आधीपासूनच चर्चा सुरू आहे. चित्रपटाची कथा मातीशी जोडलेली आहे आणि त्यात अस्सल देशी बाज आहे, हे गाणं नेमकं तेच ठळकपणे समोर आणतं. दमदार ठेक्यांसोबत आदिवासी संगीताचा सुरेख मेळ घातल्यामुळे गाण्याला वेगळी ऊर्जा मिळते. गाणं संपल्यानंतरही त्याचे सूर आणि ठेका मनात रेंगाळत राहतात.

या चित्रपटाकडे भारतातला पहिला महिला-केंद्रित पॅन-इंडिया सिनेमॅटिक चित्रपट म्हणून पाहिलं जात आहे. रश्मिका या चित्रपटात अनोख्या आणि यापूर्वी कधीही न पाहिलेल्या भूमिकेत प्रेक्षकांना भेटणार आहे. दमदार ॲक्शन आणि बाप-लेकीच्या नात्याची भावस्पर्शी कहाणी, असं या चित्रपटाचं स्वरूप आहे.

चित्रपटाच्या नुकत्याच प्रदर्शित झालेल्या टीझरला देशभरातून जबरदस्त प्रतिसाद मिळाला. प्रेक्षकांपासून समीक्षकांपर्यंत सगळ्यांनीच त्यातली रॉ एनर्जी, भव्य दृश्यरचना आणि उत्कंठावर्धक वातावरण यांचं कौतुक केलं. भारतीय चित्रपटसृष्टीतल्या अनेक भव्य ॲक्शनपटांमध्ये, म्हणजे 'बाहुबली' आणि 'KGF' यांसारख्या चित्रपटांत, आई-मुलाच्या नात्याचं प्रभावी चित्रण पाहायला मिळालं आहे. 'मैसा' मात्र या पारंपरिक चौकटीपलीकडे जाऊन वेगळा आणि भावनिक पैलू मांडणार आहे. आदिवासी प्रदेशाच्या पार्श्वभूमीवर बाप आणि लेक यांच्यातले घट्ट बंध या चित्रपटातून उलगडणार आहेत.

'मैसा' हा अनफॉर्मुला फिल्म्सच्या बॅनरखाली तयार झालेला भावनिक ॲक्शन थ्रिलर आहे. त्याचं दिग्दर्शन रवींद्र पुल्ले यांनी केलं आहे. चित्रपटात भव्य दृश्यं, उत्कंठावर्धक कथा आणि रश्मिका मंदानाची प्रभावी भूमिका पाहायला मिळणार आहे. हा चित्रपट २७ नोव्हेंबर २०२६ रोजी चित्रपटगृहांमध्ये प्रदर्शित होणार आहे.