वाघेला यांच्यासह पाच माजी मुख्यमंत्री काँग्रेसमध्ये परतण्याची राजकीय वर्तुळात चर्चा

लोकसभेतील विरोधी पक्षनेते राहुल गांधी यांनी मतचोरी आणि एसआयआरमधील मनमानी निर्णयांवरून मुख्य निवडणूक आयुक्त ज्ञानेश कुमार यांच्याविरोधात आघाडी उघडली आहे. काँग्रेससह इंडिया आघाडीतील सर्व घटक पक्ष महायुती सरकारवर सतत हल्ला चढवत आहेत. दुसरीकडे भाजप सरकारकडूनही प्रतिहल्ले सुरू असल्याचे दिसते.

केंद्रातले वातावरण असे तापलेले असतानाच गुजरातचे माजी मुख्यमंत्री शंकरसिंह वाघेला यांच्यासह पाच माजी मुख्यमंत्री पुन्हा काँग्रेसमध्ये येण्याच्या वाटेवर असल्याची चर्चा राजकीय वर्तुळात रंगली आहे. वाघेला यांनी आपली ही इच्छा उघडपणे बोलून दाखवली आहे. गुजरात काँग्रेसचे प्रभारी रणदीप सुरजेवाला यांना माध्यमांनी याबद्दल विचारले, तेव्हा त्यांनी सूचक उत्तर दिले. "काही घडल्यास मीच तुम्हाला सर्वात आधी कळवीन," असे ते म्हणाले.

विविध प्रादेशिक पक्ष कमकुवत करण्याच्या प्रयत्नांना आणि मतचोरी व एसआयआरच्या मुद्द्याला विरोध करून राहुल गांधी यांनी कठोर संदेश दिला आहे, असे म्हटले जात आहे. त्यामुळे पाच माजी मुख्यमंत्री काँग्रेसमध्ये परतू शकतात, अशी शक्यता व्यक्त होत आहे. या यादीत पंजाबचे कॅप्टन अमरिंदर सिंग, जम्मू आणि काश्मीरचे गुलाम नबी आझाद, गुजरातचे शंकरसिंह वाघेला, महाराष्ट्राचे अशोक चव्हाण आणि आंध्र प्रदेशचे किरण कुमार रेड्डी यांची नावे आहेत.

मात्र वाघेला वगळता इतर कोणत्याही माजी मुख्यमंत्र्यांनी परतण्याची वैयक्तिक इच्छा बोलून दाखवलेली नाही. राजकीय विश्लेषकांच्या मते, या पाचपैकी कोणीही परतले तर राजकीय समीकरणे बदलतील. यातले बहुतेक नेते काँग्रेससाठी कठीण काळ असताना पक्ष सोडून गेले होते. त्यामुळे राहुल गांधी कोणाला परत येण्याची संधी देणार, हा प्रश्न विचारला जात आहे. अशोक चव्हाण वगळता इतर चौघांकडे सध्या कोणतेही मोठे राजकीय पद नाही.

राहुल गांधी यांनी 'जनरेशन झेड'च्या आंदोलनादरम्यान कॅप्टन अमरिंदर सिंग यांच्याबद्दल आदर व्यक्त केला होता. भाजपमधले आपले आवडते नेते, असेही ते त्यांना म्हणाले होते. तेव्हापासून पंजाब निवडणुकीआधी अमरिंदर सिंग पक्षात परतणार का, यावर चर्चा सुरू आहे. ते सध्या भाजपमध्ये आहेत, पण त्यांच्याकडे कोणतेही मोठे पद नाही.

गुलाम नबी आझाद सध्या डेमोक्रॅटिक प्रोग्रेसिव्ह आझाद पार्टी (DPAP) चे संस्थापक आणि मुख्य संरक्षक (अध्यक्ष) आहेत. त्यांनी ऑगस्ट २०२२ मध्ये भारतीय राष्ट्रीय काँग्रेसचा राजीनामा दिला आणि सप्टेंबर २०२२ मध्ये आपला नवा राजकीय पक्ष स्थापन केला.

किरण कुमार रेड्डी हे अविभाजित आंध्र प्रदेशचे १६ वे मुख्यमंत्री होते. मुख्यमंत्री होण्यापूर्वी त्यांनी आंध्र प्रदेश विधानसभेचे अध्यक्ष, आमदार आणि मुख्य प्रतोद म्हणून काम केले. त्यांनी २०२३ मध्ये काँग्रेस सोडली आणि सध्या ते भाजपचे सदस्य आहेत.

अशोक चव्हाण सध्या महाराष्ट्रातून राज्यसभेचे खासदार आहेत आणि भाजपचे सदस्य आहेत. ते एप्रिल २०२४ पासून राज्यसभेत आहेत. फेब्रुवारी २०२४ मध्ये त्यांनी काँग्रेसचा राजीनामा देऊन भारतीय जनता पक्षात प्रवेश केला. यापूर्वी त्यांनी महाराष्ट्राचे मुख्यमंत्री आणि राज्य सरकारमध्ये कॅबिनेट मंत्री म्हणूनही काम केले आहे.