चंद्रपुरात दुष्काळात पाणी पुरवण्यासाठी आमदार जोरगेवार यांची इरई धरणावर पाहणी

चंद्रपूर जिल्ह्यात दुष्काळी परिस्थिती आहे. या पार्श्वभूमीवर आमदार किशोर जोरगेवार यांनी इरई धरणातील पाणीसाठा आणि पाणी वाटपाच्या नियोजनाचा आढावा घेतला. जिल्हाधिकारी वसुमना पंत यांच्यासह त्यांनी धरणाची प्रत्यक्ष पाहणी केली. ही पाहणी चंद्रपूरमधील पाणीटंचाई टाळण्यासाठी महत्त्वाची मानली जात आहे.

दुष्काळात पाणी जपून आणि काटेकोरपणे वापरले गेले पाहिजे, असे जोरगेवार यांनी सांगितले. येत्या काळात किती पाणी लागेल याचा अंदाज घेऊन आहे त्या पाण्याचे बारकाईने नियोजन करावे, असे त्यांनी प्रशासनाला सांगितले. कोणत्याही परिस्थितीत पाण्याची नासाडी होऊ नये आणि शेवटच्या नागरिकापर्यंत पाणी पोहोचेल याची काळजी प्रशासनाने घ्यावी, असे निर्देश त्यांनी दिले.

पाहणीच्या वेळी मनपा आयुक्त नरेश अकुनरी, चंद्रपूर थर्मल पाँवर स्टेशनचे मुख्य अभियंता अनिल काथोये, उपविभागीय अधिकारी विशाल कुमार मेश्राम, मनपाचे उपायुक्त शेषराव टाले, तहसीलदार विजय पवार, जिल्हा आपत्ती व्यवस्थापन अधिकारी सलीम शेख, चंद्रपूर पाटबंधारे विभागाचे कार्यकारी अभियंता जलेश सिंग, कार्यकारी अभियंता महेश गवरी आणि मनपाचे शहर अभियंता रवींद्र हजारे उपस्थित होते. इतर अधिकारीही तेथे होते.

भाजपचे माजी महानगर अध्यक्ष आणि नगरसेवक सुभाष कासनगोट्टूवार, भारतीय जनता पार्टीच्या राष्ट्रीय कार्यकारणीचे सदस्य प्रकाश देवतळे, भाजपचे महामंत्री नामदेव डाहुले, रविंद्र गुरनुले, मनोज पाल, गटनेते शेखर शेट्टी, जितेश कुळमेथे, बलराम डोडानी, तुषार सोम, दशरथ सिंग ठाकूर, अमोल शेंडे, प्रलय म्हशाखेत्री आणि प्रवीण गिलबिले हेही कार्यकर्त्यांसह हजर होते.

धरणात सध्या किती पाणी आहे, ते किती दिवस पुरेल, वेगवेगळ्या कामांसाठी किती पाणी लागेल आणि त्याचे वाटप कसे करायचे, याचा स्पष्ट आराखडा प्रशासनाने तयार करावा, असे जोरगेवार म्हणाले. पाणीपुरवठ्यात कोणत्याही भागावर अन्याय होणार नाही, याचीही काळजी घ्यावी, अशी सूचना त्यांनी केली.

फक्त धरणातल्या पाण्यावर अवलंबून न राहता इतर जलस्रोत पुन्हा सुरू करण्यासाठी विशेष प्रयत्न व्हावेत, असेही त्यांनी सांगितले. अनेक ठिकाणी पाण्याचे नैसर्गिक स्रोत आहेत, पण देखभाल आणि जतन न झाल्यामुळे ते बंद पडले आहेत. असे स्रोत शोधून त्यांना पुन्हा वाहते करण्यासाठी आवश्यक कामे हाती घ्यावीत, तसेच नद्या, नाले आणि ओढ्यांमधील पाणी अडवून साठा वाढवण्यासाठी प्रभावी उपाय करावेत, अशा सूचना त्यांनी दिल्या.

जिल्ह्यात जिथे बंधारे बांधता येतील, त्या जागांची पाहणी करून बंधाऱ्यांचे नियोजन करावे, असे जोरगेवार यांनी सांगितले. पावसाचे वाहून जाणारे पाणी शक्य तिथे बंधारा बांधून अडवण्याला प्राधान्य द्यावे. त्यामुळे भूजलपातळी वाढेल आणि पुढच्या काळातील पाणीटंचाईवर मात करायला मदत होईल. पाणीपुरवठा करणाऱ्या जलवाहिन्यांमधील गळती शोधून ती तातडीने दुरुस्त करावी, जेणेकरून वितरणातील नुकसान कमी होऊन जास्तीत जास्त पाणी नागरिकांना मिळेल, असेही त्यांनी निर्देशात म्हटले.

इरई धरणातून वीजनिर्मिती होते आणि नागरिकांना पिण्याचे पाणीही लागते, या दोन्ही गरजा महत्त्वाच्या आहेत. त्यामुळे वीजनिर्मितीला अडथळा न येता पिण्याच्या पाण्याची गरजही भागेल, असे नियोजन करावे आणि त्यासाठी संबंधित विभागांनी एकमेकांशी समन्वय ठेवून निर्णय घ्यावेत, असे जोरगेवार यांनी स्पष्ट केले. शेवटच्या टोकावरील वस्त्यांपर्यंत नियमित आणि पुरेसे पाणी पोहोचेल, याची खबरदारी घ्यावी, असेही ते म्हणाले.

दुष्काळात पाण्याचा प्रश्न आणखी गंभीर होण्याची शक्यता आहे, त्यामुळे प्रशासनाने आतापासूनच खबरदारी घ्यावी, असे जोरगेवार यांनी सांगितले. तात्पुरत्या उपायांबरोबरच भविष्यात पाण्याची उपलब्धता वाढवणाऱ्या दीर्घकालीन कामांनाही गती द्यावी, तसेच पाणी अडवणे, पाण्याचे संवर्धन, जलस्रोतांचे पुनरुज्जीवन आणि वितरण व्यवस्थेतील त्रुटी दूर करणे, या सर्वांचा एकत्र विचार करून कृती आराखडा तयार करावा, असे त्यांनी सांगितले.