हार्ट ॲन्युरिझमशी झुंज अपयशी; 'बेव्हरली हिल्स, ९०२१०' फेम अभिनेत्री किमरी जॉन्सन यांचं ५०व्या वर्षी निधन

हॉलिवूडमधून एक दुःखद बातमी समोर आली आहे. अभिनेत्री आणि मॉडेल किमरी जॉन्सन (Kimmarie Johnson) यांचं वयाच्या ५०व्या वर्षी निधन झालं आहे. ४ नोव्हेंबर रोजी त्यांचा मृत्यू झाला. 'बेव्हरली हिल्स, ९०२१०' आणि 'ड्यूड, व्हेअर्स माय कार?' यांसारख्या चित्रपट आणि टीव्ही मालिकांमधून त्या प्रेक्षकांसमोर आल्या होत्या. त्यांच्या जाण्याने मनोरंजनविश्वात हळहळ व्यक्त केली जात आहे.

किमरी यांना हार्ट ॲन्युरिझम या गंभीर आजाराचं निदान झालं होतं. या आजाराशी झुंज सुरू असतानाच ४ नोव्हेंबर रोजी त्यांनी अखेरचा श्वास घेतला.

नेमकं काय झालं होतं, ते असं: ऑक्टोबर महिना संपत आला असताना किमरी यांच्यावर अचानक वैद्यकीय आपत्कालीन परिस्थिती ओढवली. त्यानंतर त्यांना रुग्णालयात दाखल करण्यात आलं. तपासणी केल्यावर डॉक्टरांनी त्यांना गंभीर हार्ट ॲन्युरिझम झाल्याचं सांगितलं. साधारण आठवडाभर त्यांच्यावर उपचार सुरू होते. मात्र उपचार चालू असतानाच ४ नोव्हेंबर रोजी त्यांचं निधन झालं.

किमरी यांनी आपल्या कारकिर्दीची सुरुवात मॉडेलिंगमधून केली होती. त्यानंतर अभिनयात नशीब आजमावण्यासाठी त्या कॅलिफोर्नियाला स्थलांतरित झाल्या. 'बेव्हरली हिल्स, ९०२१०' या लोकप्रिय मालिकेमुळे त्यांना विशेष ओळख मिळाली.

ही मालिका डॅरेन स्टार यांनी तयार केली होती. १९९० च्या दशकातली ही लोकप्रिय अमेरिकन टीन ड्रामा मालिका होती. कॅलिफोर्नियातील बेव्हरली हिल्स परिसरात राहणारे हायस्कूल आणि कॉलेजमधले विद्यार्थी, त्यांचं जीवन, मैत्री, प्रेम आणि संघर्ष या मालिकेत दाखवण्यात आले होते.

अभिनय आणि मॉडेलिंगबरोबरच किमरी यांनी व्यवसायाच्या क्षेत्रातही स्वतःची वेगळी ओळख तयार केली. 'स्किनग्लो बाय किमरी' (SkinGlow by Kimmarie) या नावाचा स्वतःचा स्किनकेअर ब्रँड त्यांनी सुरू केला होता. त्यामुळे मनोरंजनविश्वाबरोबरच व्यवसायाच्या क्षेत्रातही त्यांनी आपला ठसा उमटवला होता.

किमरी यांच्या पश्चात त्यांचा मुलगा कॅमेरॉन निनो आहे. त्यांच्या निधनामुळे कुटुंबीय आणि चाहत्यांवर दुःखाचा डोंगर कोसळला आहे. किमरी जॉन्सन यांच्या निधनाची बातमी कळताच त्यांच्या चाहत्यांना मोठा धक्का बसला. हॉलिवूडने केवळ एक प्रतिभावान अभिनेत्रीच नव्हे, तर सकारात्मक आणि उत्साही व्यक्तिमत्त्वही गमावलं आहे.