हिंजवडी-शिवाजीनगर मेट्रो 3 नोव्हेंबरला सुरू होणार, पहिल्या टप्प्यात 17 स्थानकांवरच थांबे

पुणे आणि पिंपरी-चिंचवडमधील आयटी कर्मचारी तसेच सर्वसामान्य नागरिक ज्या मेट्रोची कित्येक दिवस वाट पाहत होते, ती हिंजवडी ते शिवाजीनगर 'मेट्रो मार्गिका 3' आता सुरू होण्याच्या उंबरठ्यावर आहे. पुणे महानगर प्रदेश विकास प्राधिकरण (PMRDA) हा मार्ग सार्वजनिक-खासगी भागीदारीतून उभारत आहे आणि त्याचे काम अंतिम टप्प्यात आले आहे.

येत्या 3 नोव्हेंबर रोजी पंतप्रधान नरेंद्र मोदी व्हर्च्युअल पद्धतीने या मेट्रोचे अधिकृत लोकार्पण करणार आहेत. या कार्यक्रमाला मुख्यमंत्री देवेंद्र फडणवीस उपस्थित राहण्याची शक्यता आहे.

गेले अनेक दिवस या मार्गावर मेट्रोची चाचणी सुरू होती आणि गाड्या रिकाम्या धावत होत्या. त्याच वेळी आयटी कर्मचारी रस्त्यावरच्या प्रचंड वाहतूक कोंडीत अडकत होते. आता या सेवेमुळे हिंजवडी आयटी पार्क, वाकड, बालेवाडी, बाणेर आणि शिवाजीनगर परिसरातील लाखांवर प्रवाशांचा वेळ वाचेल आणि प्रवास सोपा होईल. मात्र उद्घाटनाच्या दिवशी पूर्ण मार्ग पूर्ण क्षमतेने प्रवाशांसाठी खुला होणार नाही, हेही स्पष्ट झाले आहे.

माण ते शिवाजीनगर हा मार्ग 13.2 किलोमीटर लांबीचा असून त्यावर एकूण 23 स्थानके आहेत. पहिल्या टप्प्यात त्यापैकी फक्त 17 स्थानकांवरून प्रवासी वाहतूक सुरू होईल. उरलेल्या 6 स्थानकांवर बांधकामाची कामे बाकी आहेत आणि आवश्यक सुरक्षा मंजुरीची प्रक्रिया पूर्ण झालेली नाही. त्यामुळे तिथे प्रवाशांना चढता किंवा उतरता येणार नाही.

पहिल्या टप्प्यात बंद राहणारी स्थानके अशी: बालेवाडी हाय स्ट्रीट, बालेवाडी फाटा, बाणेर गाव, बाणेर-पाषाण लिंक रोड, भोसले नगर आणि शिवाजीनगर.

सुरू होणारी 17 स्थानके अशी: माण, माण-एमआयडीसी सर्कल, माण बस डेपो, हिंजवडी फेज दोन-सर्कल दोन, हिंजवडी फेज दोन-सर्कल एक, पद्मभूषण चौक, श्री शिवछत्रपती शिवाजी महाराज चौक-हिंजवडी, हिंजवडी फेज एक, वाकड चौक, श्री शिवछत्रपती क्रीडा संकुल-म्हाळुंगे, मायकॉन-बालेवाडी, आर. के. लक्ष्मण म्युझियम-बालेवाडी, औंध, सकाळनगर, सावित्रीबाई फुले पुणे विद्यापीठ, कृषी महाविद्यालय आणि जिल्हा न्यायालय, पुणे.

सगळ्यात महत्त्वाचे आणि मध्यवर्ती ठिकाण असलेले शिवाजीनगर स्थानकच सुरुवातीला बंद राहणार असल्याने प्रवाशांची मोठी गैरसोय होईल. न्यायालय परिसर, शासकीय कार्यालये, शैक्षणिक संस्था आणि इतर सार्वजनिक वाहतुकीला जोडणी यासाठी शिवाजीनगर हे अतिशय मोक्याचे ठिकाण आहे. आता प्रवाशांना सुरू असलेल्या दुसऱ्या एखाद्या स्थानकावर उतरून बस, रिक्षा किंवा खासगी वाहनाचा आधार घ्यावा लागेल.

बालेवाडी आणि बाणेर परिसरातील प्रमुख स्थानके बंद राहिल्यानेही प्रवासाची साखळी तुटेल. मेट्रो स्थानक जवळ असूनही सलग सेवा मिळणार नसल्याने स्थानकापर्यंत पोहोचण्यासाठी आणि पुढच्या प्रवासासाठी नागरिकांना पर्यायी वाहतुकीवरच अवलंबून राहावे लागेल.

सुमारे 8,313 कोटी रुपयांच्या या प्रकल्पाचे भूमिपूजन 8 डिसेंबर 2018 रोजी पंतप्रधान नरेंद्र मोदी यांच्या हस्ते झाले होते. सुरुवातीच्या वेळापत्रकानुसार काम वेळेत पूर्ण झाले नाही, म्हणून मुदत अनेकदा वाढवावी लागली.

यापूर्वी 6 मार्च 2022 रोजी पुणे मेट्रोच्या पहिल्या टप्प्याचे, म्हणजे वनाज ते गरवारे महाविद्यालय आणि पिंपरी-चिंचवड महापालिका ते फुगेवाडी या एकूण 10 स्थानकांचे, उद्घाटन घाईघाईने उरकण्यात आले होते. आता हिंजवडी-शिवाजीनगर मार्गाच्या उद्घाटनावेळीही सर्व स्थानके सुरू होत नसल्याने अपूर्ण कामांचे उद्घाटन केले जात असल्याची चर्चा पुन्हा सुरू झाली आहे.

याच 3 नोव्हेंबरला पंतप्रधान मोदी यांच्या हस्ते पुणे मेट्रोच्या दुसऱ्या टप्प्यातील 4 नव्या मार्गिकांचे भूमिपूजनही होणार आहे. त्या अशा: मार्गिका 2 ए (वनाज ते चांदणी चौक), मार्गिका 2 बी (रामवाडी ते वाघोली), मार्गिका 4 (खडकवासला ते खराडी) आणि मार्गिका 4 ए (नळस्टॉप ते वारजे-माणिकबाग).