घणसोली एमआयडीसीत भटक्या कुत्र्यांचा सुळसुळाट; तातडीने उपाययोजना करण्याची मागणी

घणसोली एमआयडीसी परिसरातील औराम येथे असलेल्या क्यू रेसिडेन्सीमध्ये भटक्या कुत्र्यांचा वावर वाढला आहे. त्यामुळे रहिवाशांच्या दैनंदिन जीवनावर परिणाम होत असल्याची तक्रार समोर आली आहे. विशेषतः लहान मुले, महिला आणि ज्येष्ठ नागरिकांना परिसरातून ये-जा करताना सावध राहावे लागते, असे रहिवाशांचे म्हणणे आहे.

क्यू रेसिडेन्सीमधील आर १ ते आर ७ या सहकारी गृहनिर्माण सोसायट्यांमध्ये भटक्या कुत्र्यांचा उपद्रव वाढल्याची तक्रार रहिवाशांनी केली आहे. कुत्र्यांच्या हल्ल्यांमुळे नागरिकांमध्ये भीतीचे वातावरण निर्माण झाले आहे. त्यामुळे लहान मुले आणि ज्येष्ठ नागरिकांच्या सुरक्षिततेचा प्रश्न ऐरणीवर आला आहे. या समस्येवर संबंधित प्रशासनाने तातडीने उपाययोजना कराव्यात, अशी रहिवाशांची मागणी आहे.

रहिवाशांच्या म्हणण्यानुसार, परिसरात भटक्या कुत्र्यांच्या टोळ्यांचा वावर वाढला आहे. त्यामुळे सोसायटीच्या आवारात तसेच परिसरातील रस्त्यांवरून ये-जा करताना नागरिकांना सावधगिरी बाळगावी लागत आहे. शाळेत जाणारी लहान मुले आणि सकाळ-संध्याकाळ फेरफटका मारणारे ज्येष्ठ नागरिक यांच्यात विशेषतः भीतीचे वातावरण आहे. कुत्र्यांकडून हल्ले होत असल्याच्या तक्रारींमुळे रहिवाशांची चिंता आणखी वाढली आहे.

परिसरातील काही श्वानप्रेमी सकाळी आणि संध्याकाळी भटक्या कुत्र्यांना खाद्य देतात. त्यामुळे इथे कुत्र्यांचा वावर वाढत असल्याचे रहिवाशांचे म्हणणे आहे. कुत्र्यांना खाद्य देण्याबाबत योग्य नियोजन नसेल, तर सोसायटी परिसरातील नागरिकांना त्रास सहन करावा लागतो, अशी नाराजीही व्यक्त होत आहे. रहिवासी आणि श्वानप्रेमी यांच्यात संघर्ष निर्माण होण्याऐवजी प्रशासनाने यातून तोडगा काढावा, अशी अपेक्षा व्यक्त केली जात आहे.

क्यू रेसिडेन्सीचा परिसर एमआयडीसी हद्दीत येतो. त्यामुळे भटक्या कुत्र्यांच्या समस्येवर कारवाई करण्याची जबाबदारी नेमकी कोणत्या यंत्रणेची आहे, असा प्रश्न रहिवाशांनी उपस्थित केला आहे. परिसरातील नागरी सुविधांबाबतही नागरिकांनी नाराजी व्यक्त केली आहे.

तक्रारी करूनही प्रभावी उपाययोजना होत नाही, अशी रहिवाशांची भावना आहे. सात सोसायट्यांमधील भटक्या कुत्र्यांच्या समस्येची संबंधित प्रशासनाने तातडीने दखल घ्यावी, नागरिकांच्या सुरक्षिततेसाठी आवश्यक उपाययोजना कराव्यात आणि तक्रारींचे निराकरण करावे, अशी मागणी होत आहे. एखादी गंभीर दुर्घटना घडल्यानंतरच प्रशासन जागे होणार का, असा सवालही रहिवासी विचारत आहेत.