अफगाणिस्तान-बांगलादेश कसोटी अनिर्णित, अटलच्या 111 धावांमुळे सामना वाचला

अफगाणिस्तान आणि बांगलादेश यांच्यात शेख जायद स्टेडियमवर खेळवला गेलेला एकमेव कसोटी सामना अनिर्णित (ड्रॉ) राहिला. पहिल्या डावात पिछाडीवर पडल्यानंतरही अफगाणिस्तानने ज्या पद्धतीने सामना वाचवला, त्यामुळे जगभरातील क्रिकेट चाहत्यांची मने त्यांनी जिंकली आहेत.

अफगाणिस्तानचा कर्णधार रहमत शाह यानेही आनंद व्यक्त केला आहे. हा ड्रॉ आमच्यासाठी एकप्रकारे विजयासारखाच आहे, असे मत त्याने मांडले. दुसऱ्या डावात शतक झळकावून सामना वाचवण्यात मोठी भूमिका बजावणारा फलंदाज सेदिकुल्लाह अटल याचे त्याने कौतुक केले.

प्रेझेंटेशन सेरेमनीत रहमत म्हणाला की, सेदिकुल्लाह नुकताच टी-20 खेळून आला होता. त्याने ज्या प्रकारे धैर्य दाखवले आणि संघाला जे हवे होते ते करून दाखवले, त्यामुळे आम्ही या ध्येयापर्यंत पोहोचू शकलो. एका संघाच्या रूपात मला आनंद आहे की, सामन्यात दोन खेळाडूंनी शतक झळकावले. काहींनी अर्धशतके ठोकली आणि गरजेच्या भागीदारींमध्ये योगदान दिले, असेही तो म्हणाला.

खालच्या क्रमांकावरील फलंदाजांनी समजूतदारपणे फलंदाजी केली, असे सेदिकुल्लाह म्हणाला. आमचा प्लान खूप वेळ बॅटिंग करायचा होता, संयम राखायचा होता. डॉट बॉल जावो किंवा मेडन ओव्हर, त्याबद्दल आम्हाला त्रस्त व्हायचे नव्हते. आमचे लक्ष्य संपूर्ण दिवस फलंदाजी करायचे होते. दुसऱ्या डावात 142 षटके आणि सात तासांपेक्षा जास्त फलंदाजी करणे आमच्यासाठी मोठे यश होते, असे तो म्हणाला. सर्वांचा प्रयत्न खूपच छान होता, असेही त्याने सांगितले.

सामन्यानंतरच्या पत्रकार परिषदेत अफगाणिस्तानचे प्रशिक्षक रिचर्ड पायबस म्हणाले की, सामन्याचा निकाल बदलण्याचे श्रेय सेदिकुल्लाहला जाते. ही त्याच्यासाठी शानदार खेळी होती. तो थोडा आउट ऑफ टच होता, त्यामुळे त्याने या खेळीत खूप मेहनत घेतली. तो कसोटी कारकिर्दीच्या सुरुवातीच्या काळात आहे आणि हा आत्मविश्वास तो पुढे घेऊन जाईल, असेही ते म्हणाले.

सामन्याचा आढावा घ्यायचा तर बांगलादेशने प्रथम फलंदाजी करताना 346 धावा केल्या. अफगाणिस्तानचा पहिला डाव 240 धावांवरच संपला. त्या डावात कर्णधार रहमत शाहने नाबाद 105 धावा केल्या. बांगलादेशने दुसरा डाव 7 बाद 372 धावांवर घोषित केला आणि अफगाणिस्तानसमोर विजयासाठी 479 धावांचे लक्ष्य ठेवले.

अफगाणिस्तानची सुरुवात खराब झाली. अब्दुल मलिक 2 धावांवर बाद झाला. त्यानंतर दुसरा सलामीवीर सेदिकुल्लाह अटलने डाव सावरला. अटलने 332 चेंडूंचा सामना करत 111 धावांची खेळी केली आणि सामना अनिर्णित राखण्यात मोलाची भूमिका बजावली.

अटलला कर्णधार रहमत शाह (124 चेंडूंत 51 धावा), हशमतुल्लाह शाहिदी (69 चेंडूंत 36 धावा), इक्राम अलीखिल (69 चेंडूंत 33 धावा), यामिन अहमदजई (85 चेंडूंत 19 धावा) आणि कॅस अहमद (80 चेंडूंत नाबाद 49 धावा) यांनी चांगली साथ दिली. अफगाणिस्तानने दुसऱ्या डावात 142 षटके फलंदाजी करत 8 बाद 346 धावा केल्या. या धावसंख्येवर पाचव्या दिवसाचा खेळ संपला आणि सामना अनिर्णित घोषित करण्यात आला.