दिवाळीआधी महाबळेश्वरमध्ये पालिकेचा हातोडा, महात्मा गांधी रस्त्यावरील टपऱ्या हटवल्या

दिवाळीच्या सुट्यांमध्ये महाबळेश्वरला येणाऱ्या पर्यटकांची गर्दी वाढते. ती लक्षात घेऊन महाबळेश्वर नगरपालिकेने शहरातील अनधिकृत टपऱ्या, हातगाड्या आणि दुकानदारांनी केलेल्या अतिक्रमणांविरोधात कारवाई सुरू केली आहे.

मुख्य बाजारपेठेकडे जाणाऱ्या महात्मा गांधी रस्त्यावर उभ्या असलेल्या टपऱ्या आणि हातगाड्या पोलीस बंदोबस्तात हटवण्यात आल्या. त्यामुळे हा रस्ता अतिक्रमणांच्या विळख्यातून मोकळा झाला. या कारवाईमुळे शहरातील अतिक्रमणांचा प्रश्न पुन्हा चर्चेत आला आहे. ही कारवाई बाजारपेठेतल्या अतिक्रमणांवरही होणार का, याकडे नागरिकांचे लक्ष लागले आहे.

महाबळेश्वर हे राज्यातील प्रमुख पर्यटनस्थळ आहे. दिवाळीच्या हंगामात इथे मोठी गर्दी असते. अशा वेळी रस्ते मोकळे ठेवणे, पादचाऱ्यांना सुरक्षित चालण्यासाठी जागा देणे आणि वाहतुकीतले अडथळे दूर करणे गरजेचे आहे. पण बाजारपेठेकडे जाणाऱ्या रस्त्याच्या दोन्ही बाजूंना टपऱ्या, हातगाड्या आणि दुकानांसमोरच्या रस्त्यावर अतिक्रमण झाले होते. त्यामुळे नागरिक आणि पर्यटक दोघांनाही अडचणी येत होत्या. अखेर पालिकेने कारवाई केली.

शहरात सुमारे ४५ कोटी रुपयांची सुशोभीकरणाची कामे झाल्याचे सांगितले जाते. तरीही बाजारपेठेतील अतिक्रमणे, रस्त्यांवरचे अडथळे आणि अस्वच्छता यामुळे शहराच्या सौंदर्याला बाधा येत असल्याचे अनेक ठिकाणी दिसत होते. सुशोभीकरणाचे काम सुरू असतानाच काही व्यापाऱ्यांनी दुकानांसमोरच्या जागेत रस्त्यावर अतिक्रमण केल्याच्या तक्रारी होत्या. काही ठिकाणी गटारांवर फरश्या ठेवून पादचाऱ्यांना आणि पाण्याच्या निचऱ्याला अडथळा निर्माण केल्याचेही सांगितले जात होते.

सुशोभीकरणावर एवढा खर्च होत असताना व्यापारी बाजारपेठेचे बकालीकरण करत आहेत, अशी भावना नागरिकांमध्ये तयार झाली होती. पर्यटनस्थळाची ओळख जपायची असेल, तर फक्त सुशोभीकरण करून चालणार नाही. नंतर सार्वजनिक जागा अतिक्रमणमुक्त ठेवण्याची जबाबदारीही प्रशासनाने पार पाडावी, अशी अपेक्षा व्यक्त होत होती.

तत्कालीन प्रशासक पल्लवी पाटील यांनी अतिक्रमण हटाव मोहीम हाती घेऊन बाजारपेठेसह शहर अतिक्रमणमुक्त करण्याचे प्रयत्न केले होते. त्यांनी धाडसी कारवाई करून शहर अतिक्रमणमुक्त केले होते. मात्र त्यानंतर प्रशासनाने याकडे पूर्ण दुर्लक्ष केले आणि शहरातील सर्वच रस्त्यांवर ठिकठिकाणी पुन्हा नव्या टपऱ्या उभ्या राहू लागल्या. पालिकेने तो विभागच बंद केला की काय, अशी शंका घेतली जात होती. प्रशासन कारवाई करणार की नाही, याबद्दल शहरात उलटसुलट चर्चा सुरू होती.

या पार्श्वभूमीवर पोलीस बंदोबस्तात महात्मा गांधी रस्त्यावरील हातगाड्या आणि टपऱ्या हटवल्यामुळे त्या चर्चांना काही प्रमाणात पूर्णविराम मिळाला आहे. मात्र एका दिवसाच्या कारवाईने प्रश्न सुटणार नाही. ही मोहीम शहरभर सातत्याने राबवण्याचे आव्हान प्रशासनासमोर आहे.

मुख्य रस्त्यावरील कारवाईनंतर आता मध्यवर्ती बाजारपेठेतील अतिक्रमणांकडेही पालिकेने लक्ष द्यावे, अशी नागरिकांची अपेक्षा आहे. दुकानांसमोरच्या सार्वजनिक जागेचा अनधिकृत वापर, रस्त्यावर ठेवलेले साहित्य, गटारांवरचे अडथळे आणि पादचाऱ्यांच्या वाटेतल्या वस्तू यामुळे बाजारपेठेत ये-जा करताना अडचणी येत असल्याच्या तक्रारी आहेत.

शहरात 'नो हॉकर्स, नो व्हेईकल झोन'ची प्रभावी अंमलबजावणी करायची असेल, तर सर्वांना समान नियम लागू करणे आवश्यक आहे. रस्त्याच्या एकाच भागातील टपऱ्या हटवून थांबण्यापेक्षा बाजारपेठेसह शहरातील सर्व प्रमुख रस्ते आणि सार्वजनिक जागांची पाहणी करून नियमानुसार कारवाई करावी, अशी मागणी होत आहे.