दिवाळीआधी चेहऱ्यावरचे काळे डाग घालवण्यासाठी स्वयंपाकघरातले घरगुती उपाय

बदलती जीवनशैली, वाढते प्रदूषण आणि ताणतणाव यांचा परिणाम शरीरावर होतो आणि त्वचेवरही अनेक बदल दिसू लागतात. चेहऱ्यावर पिंपल्स येतात, काळे डाग पडतात, सुरकुत्या वाढतात आणि पिगमेंटेशनसारख्या समस्या डोके वर काढतात. सुरुवातीच्या दिवसांत त्वचेच्या या त्रासाकडे अजिबात लक्ष दिले जात नाही आणि कालांतराने चेहरा पूर्णपणे खराब होऊन जातो.

दिवाळीला आता अवघे काही दिवस उरले आहेत. सणावाराच्या दिवसांत त्वचेवर ग्लो यावा म्हणून अनेकजण फेशिअल किंवा क्लीनअप करून घेतात. पण त्यामुळे चेहऱ्यावर येणारा ग्लो तात्पुरताच असतो आणि काही दिवसांनी त्वचा पूर्वीसारखीच होते. बाजारात मिळणाऱ्या महागड्या क्रीम आणि रासायनिक ट्रीटमेंट्स त्वचेसाठी नेहमीच गुणकारी ठरत नाहीत. म्हणून काळे डाग घालवण्यासाठी खाली दिलेले घरगुती उपाय केले, तर दिवाळीआधी चेहरा खूप फ्रेश आणि चमकदार दिसेल, असे सांगितले आहे.

पहिला उपाय आयुर्वेदातला आहे. आयुर्वेदात ज्येष्ठमधाला खूप महत्त्व आहे. त्यातले गुणकारी घटक चेहऱ्यावर वाढलेला टॅन कमी करण्यास मदत करतात. पिगमेंटेशन कमी करण्यासाठी ज्येष्ठमधाचा फेसपॅक लावावा. त्यासाठी एका वाटीत ज्येष्ठमध पावडर घ्या आणि त्यात दही मिसळा. ही पेस्ट नीट एकजीव करा आणि ब्रशने संपूर्ण चेहऱ्यावर आणि मानेवर लावून थोडा वेळ तशीच ठेवा. फेसपॅक पूर्ण सुकला की चेहरा पाण्याने स्वच्छ धुवा. हा फेसपॅक आठवड्यातून दोनदा किंवा तीनदा लावला, तर टॅन कमी होण्यास मदत होईल.

काळवंडलेली त्वचा उजळ करण्यासाठी तांदूळ, बटाटा आणि बीट वापरता येतात. या फेसपॅकसाठी तांदूळ, बटाटा, टोमॅटो आणि बीट एकत्र करून शिजवून घ्या. शिजलेले मिश्रण मॅश करा, सुती कपड्यात बांधा आणि कच्च्या दुधात बुडवून संपूर्ण चेहऱ्यावर लावा. त्यामुळे त्वचा खोलवर स्वच्छ होते आणि त्वचेच्या छिद्रांमध्ये साचलेली घाण बाहेर पडते. त्वचा उजळ करण्यासाठी नेहमीच महागड्या प्रॉडक्टची गरज नसते. स्वयंपाकघरात असलेले पदार्थसुद्धा टॅन आणि काळे डाग घालवण्यास मदत करतात.

पिगमेंटेशन वाढले की खाज सुटणे आणि जळजळ होणे असे त्रासही सुरू होतात. संवेदनशील त्वचेवर तुळशीच्या पानांचा रस लावणे गुणकारी ठरते. काचेच्या वाटीत २० तुळशीची पाने घेऊन ती रात्रभर पाण्यात भिजत ठेवा. सकाळी उठल्यावर तयार झालेले पाणी कापसाने संपूर्ण चेहऱ्यावर लावा आणि थोडा वेळ तसेच राहू द्या. त्यामुळे काळे डाग कमी होण्यास मदत होईल आणि चेहरा स्वच्छ दिसेल.

हा लेख फक्त सामान्य माहितीसाठी लिहिलेला आहे आणि यात कोणत्याही उपचाराचा दावा केलेला नाही. कोणताही उपाय करण्याआधी आपल्या डॉक्टरांचा सल्ला घ्यावा.