१.५४ कोटींच्या एमडी ड्रग्ज प्रकरणातील फरार आरोपी छिंदवाड्यात पोलिसांच्या ताब्यात

नागपूर : बेलतरोडी पोलीस स्टेशनच्या हद्दीत उघडकीस आलेल्या तब्बल १.५४ कोटी रुपयांच्या एमडी ड्रग्ज प्रकरणात फरार असलेल्या एका आरोपीला पोलिसांनी ताब्यात घेतले आहे. नागपूर गुन्हे शाखेच्या युनिट क्रमांक ६ ने मध्य प्रदेशातील छिंदवाडा येथे ही कारवाई केली. मोहम्मद साबीर अली उर्फ चाकू (वय ३१, रा. कामगार नगर, कपिलनगर) असे ताब्यात घेतलेल्या आरोपीचे नाव आहे.

बेलतरोडी पोलीस स्टेशनमध्ये एनडीपीएस कायद्यांतर्गत दाखल असलेल्या गुन्ह्याच्या तपासादरम्यान पोलिसांनी ही कारवाई केली. या गुन्ह्याची सुरुवात २४ ऑक्टोबर २०२१ च्या रात्री झाली होती. त्या रात्रीपासून २५ ऑक्टोबर २०२१ च्या पहाटेपर्यंत पोलिसांनी नरेंद्रनगर येथील विजया अपार्टमेंटमध्ये छापा टाकला होता.

त्या छाप्यात अनिकेत उर्फ अन्नू बिहारे, तुफानसिंग सिसोदिया, कृष्णा उर्फ पहेलवान वर्मा, राहुल गोंड आणि शुभम उर्फ डोरेमॉन नरवरिया या आरोपींकडून १ हजार ४०५ ग्रॅम एमडी ड्रग्ज पावडर आणि इतर साहित्य जप्त करण्यात आले होते. जप्त केलेल्या मुद्देमालाची एकूण किंमत १ कोटी ५४ लाख ५० हजार ७०० रुपये इतकी होती.

या प्रकरणात आतापर्यंत सहा आरोपींना अटक झाली आहे. बाकीच्या फरार आरोपींचा शोध पोलीस घेत होते. याच शोधादरम्यान गुन्हे शाखा युनिट क्रमांक ६ च्या पथकाने तांत्रिक तपास आणि गोपनीय माहितीच्या आधारे मोहम्मद साबीर उर्फ चाकू याचा ठावठिकाणा शोधून काढला. त्यानंतर पथकाने त्याला छिंदवाड्यातून ताब्यात घेतले.

ताब्यात घेतल्यानंतर त्याची वैद्यकीय तपासणी करण्यात आली. त्यानंतर पुढच्या कारवाईसाठी त्याला गुन्हे शाखा युनिट क्रमांक ५ च्या ताब्यात देण्यात आले आहे.

ही कारवाई पोलीस आयुक्त विश्वास नागरे पाटील, सहपोलीस आयुक्त नवीनचंद्र रेड्डी, अपर पोलीस आयुक्त राजेंद्र दाभाडे, पोलीस उपायुक्त दीपक अग्रवाल आणि सहायक पोलीस आयुक्त वैभव जाधव यांच्या मार्गदर्शनाखाली झाली. पोलीस निरीक्षक भरत कन्हाडे, राजाभाऊ जाधव आणि युनिट क्रमांक ६ च्या पथकातील सदस्यांनी या कारवाईत सहभाग घेतला.