चंद्रपुरात एमडी विकायला आलेल्या २८ वर्षीय तरुणाला अटक, साठा नागपूरहून आणल्याचे सांगितले

चंद्रपूर शहरात एमडी (मेफेड्रोन) ड्रग्जची विक्री करायला आलेल्या एका २८ वर्षीय तरुणाला स्थानिक गुन्हे शाखेने (LCB) अटक केली आहे. जमनजेट्टी परिसरात २१ ऑक्टोबर रोजी ही कारवाई झाली. त्याच्याकडून ६.७३० ग्रॅम एमडी पावडर, मोबाईल आणि रोख रक्कम जप्त झाल्याचे पोलिसांनी सांगितले. एकूण मुद्देमालाची किंमत ४२,३१० रुपये आहे.

अंमली पदार्थ तस्करांविरुद्ध चंद्रपूर पोलीस दलाने विशेष मोहीम तीव्र केली आहे. तरुण पिढीला नशेच्या विळख्यातून वाचवणे आणि बेकायदा धंद्यांना आळा घालणे, हा त्यामागचा उद्देश असल्याचे सांगितले जाते. या मोहिमेचाच भाग म्हणून गुन्हे शाखेच्या पथकाने नियोजन करून सापळा रचला. चंद्रपूर शहरातील हनुमान मंदिरासमोर, एम.ई.सी.बी. ऑफिसजवळ, जमनजेट्टी परिसरात एका सराईत ड्रग्ज विक्रेत्याला रंगेहात पकडल्याचे पोलिसांनी म्हटले आहे.

२१ ऑक्टोबर २०२६ रोजी गुन्हे शाखेचे पथक चंद्रपूर शहरात गस्त घालत होते. त्यावेळी गुप्त बातमीदाराकडून पोलिसांना खात्रीशीर माहिती मिळाली. रामाळा तलाव परिसरातील एक इसम एम.डी. पावडर विकण्याच्या हेतूने जमनजेट्टी परिसरात येणार आहे, असे त्यात सांगितले होते. माहितीचे गांभीर्य ओळखून पोलिसांनी लगेच हालचाली सुरू केल्या.

वरिष्ठ अधिकाऱ्यांच्या मार्गदर्शनाखाली पथकाने ठरलेल्या ठिकाणी सापळा लावला. बातमीदाराने दिलेल्या वर्णनाप्रमाणे पांढऱ्या रंगाचा, तपकिरी टिपके असलेला full बाह्यांचा शर्ट आणि काळी full पॅन्ट घातलेला एक संशयित इसम येताना दिसला. पोलिसांनी त्याला चारी बाजूंनी घेरून ताब्यात घेतले. चौकशीत त्याने स्वतःचे नाव शानवाज उर्फ शानू इस्माईल शेख (वय २८, रा. अहेमदीया मस्जीद जवळ, रामाळा तलाव, चंद्रपूर) असे सांगितले.

त्यानंतर एन.डी.पी.एस. (NDPS) कायद्यातील तरतुदींप्रमाणे राजपत्रित अधिकारी, पंच आणि अधिकृत वजन-मापारी यांच्या उपस्थितीत आरोपीची अंगझडती घेण्यात आली. त्याच्या पॅन्टच्या खिशातून प्लॅस्टिकच्या पन्नीत ठेवलेली पांढऱ्या रंगाची एम.डी. (मेफेड्रोन) पावडर, ओपो ए-५ प्रो कंपनीचा वापरता मोबाईल आणि रोख रक्कम सापडली. अंमली पदार्थ टेस्टिंग किटने जागेवरच तपासणी केली असता, ती पावडर एम.डी. हा अंमली पदार्थ असल्याचे निष्पन्न झाले, असे पोलिसांनी सांगितले.

जप्त केलेल्या मुद्देमालात ६.७३० ग्रॅम वजनाची एम.डी. पावडर (किंमत २०,१९० रुपये), २०,००० रुपयांचा मोबाईल आणि २,१२० रुपये रोख यांचा समावेश आहे. सगळे मिळून ४२,३१० रुपये होतात. प्राथमिक तपासात आरोपीने हा साठा नागपूरहून चंद्रपुरात विक्रीसाठी आणल्याचे कबूल केल्याचे पोलिसांनी म्हटले आहे. त्यामुळे या तस्करीत 'नागपूर कनेक्शन' असल्याचे समोर आल्याचेही पोलिसांचे म्हणणे आहे.

या प्रकरणी चंद्रपूर शहर पोलीस ठाण्यात आरोपीविरुद्ध अंमली पदार्थ व मनोव्यापारावर परिणाम करणारे पदार्थ अधिनियम १९८५ (NDPS Act) च्या कलम ८ (क), २२ (ब) अन्वये गुन्हा दाखल झाला आहे. या रॅकेटमध्ये आणखी कोण कोण सामील आहे, याचा पोलीस सखोल तपास करत आहेत.

ही कारवाई चंद्रपूरचे पोलीस अधीक्षक आयुष नोपानी आणि अपर पोलीस अधीक्षक ईश्वर कातकडे यांच्या मार्गदर्शनाखाली झाली. स्थानिक गुन्हे शाखेचे पोलीस निरीक्षक अमोल काचोरे यांच्या नेतृत्वात सहाय्यक पोलीस निरीक्षक योगेश हिवसे, बलराम झाडोकर, पोलीस उपनिरीक्षक विनोद भुरले, सुनिल गौरकार, तसेच पोलीस अंमलदार सतीश अवथरे, लालू यादव, इनाम खान, संदीप कांबळे, हिरालाल गुप्ता, किशोर वाकाटे, शशांक बदामवार आणि सायबर पोलीस स्टेशनचे स.पो.उप.नि. मुजावर अली यांनी ती पार पाडली.