चंद्रपुरात भाऊंचा दांडियाचा चौदाव्या वर्षी समारोप, सर्वपक्षीय नेत्यांची उपस्थिती

चंद्रपुरात भाऊंचा दांडिया महोत्सवाचा सलग १४ व्या वर्षी समारोप झाला. सांगता समारंभाला विविध पक्षांचे नेते उपस्थित होते. आयोजकांच्या म्हणण्यानुसार हा विदर्भातील सर्वात मोठा दांडिया महोत्सव आहे. दिवंगत खासदार बाळूभाऊ धानोरकर यांनी ही परंपरा सुरू केली होती, आणि आता खासदार प्रतिभा धानोरकर या आयोजनाची जबाबदारी सांभाळतात.

उत्साही वातावरणात आणि मोठ्या थाटामाटात हा महोत्सव पार पडला. बाळूभाऊंनी चंद्रपूरच्या सांस्कृतिक क्षेत्रात आणि तरुणांमध्ये उभे केलेले हे व्यासपीठ आज एकतेचे आणि आपुलकीचे प्रतीक बनले आहे. पक्षांच्या सीमा ओलांडून आलेल्या नेत्यांनी बाळूभाऊंच्या आठवणींना उजाळा दिला. हा वारसा खंबीरपणे पुढे नेणाऱ्या खासदार प्रतिभाताई धानोरकर यांच्या नेतृत्वाचे आणि नियोजनाचे त्यांनी मनापासून कौतुकही केले.

महाराष्ट्र विधानसभेतील गटनेते तथा आमदार विजय वडेट्टीवार म्हणाले, "स्व. बाळूभाऊ धानोरकर यांनी तरुणांना एकत्र आणण्यासाठी आणि संस्कृती जपण्यासाठी हे भव्य व्यासपीठ उभे करून दिले. हा केवळ दांडिया नसून विदर्भातील एकतेचा संदेश देणारा सर्वात मोठा उत्सव आहे. आज बाळूभाऊ आपल्यात नसले, तरी खासदार प्रतिभाताई धानोरकर त्यांचा हा सांस्कृतिक आणि सामाजिक वारसा अभिमानाने आणि उत्तम नियोजनासह पुढे नेत आहेत, हे पाहून मनाला मोठा आनंद होतो."

आमदार सुधीर मुनगंटीवार म्हणाले, "दिवंगत खासदार बाळूभाऊ धानोरकर यांच्यासोबत आमची राजकारणापलीकडची घट्ट मैत्री होती. त्यांनी सुरू केलेल्या या दांडियामुळे संपूर्ण चंद्रपूर एकत्र येते. दिवसेंदिवस या महोत्सवाला मिळणारा प्रतिसाद आणि तरुणाईचा उत्साह वाढतच आहे. बाळूभाऊंनी लावलेल्या या रोपट्याला खासदार प्रतिभाताई धानोरकर तितक्याच आत्मविश्वासाने पुढे नेत आहेत, याचे मोठे समाधान वाटते."

आमदार बंटी भांगडिया म्हणाले, "स्व. बाळूभाऊ धानोरकर कुठल्याही पक्षात असले, तरी आमचे त्यांच्याशी कौटुंबिक आणि जिव्हाळ्याचे संबंध होते. त्यांची आठवण रोज मनाला स्पर्शून जाते. त्यांनी सुरू केलेली ही सुंदर परंपरा आज खासदार प्रतिभाताई धानोरकर तितक्याच आपुलकीने चालवत आहेत, हे खरोखरच कौतुकास्पद आहे."

आमदार किशोर जोरगेवार म्हणाले, "मी स्व. बाळूभाऊंसोबत काम केले आहे. या दांडियाची व्याप्ती आणि लोकप्रियता दरवर्षी वाढतच चालली आहे. चंद्रपुरातील हजारो तरुणांसाठी हे हक्काचे व्यासपीठ बनले आहे. बाळूभाऊंनी दिलेला हा समृद्ध वारसा खासदार प्रतिभाताई धानोरकर पुढेही असाच समर्थपणे चालवतील, यात शंका नाही."

माजी गृहराज्यमंत्री हंसराज अहिर म्हणाले, "दांडिया महोत्सवाने चंद्रपूरच्या सांस्कृतिक क्षेत्रात मोलाची भर घातली आहे. स्व. बाळूभाऊंनी तरुणांसाठी आणि चंद्रपूरकरांसाठी ही एक मोठी पर्वणीच सुरू केली होती. आज खासदार प्रतिभाताई धानोरकर खंबीरपणे आणि निष्ठेने हा वारसा पुढे नेत असल्याचे पाहून खूप आनंद होत आहे."

चंद्रपूरकरांच्या अलोट उत्साहात पार पडलेल्या या १४ व्या भाऊंचा दांडिया महोत्सवाने पुन्हा एकदा बाळूभाऊ धानोरकर यांच्या आठवणी ताज्या केल्या. शेवटी खासदार प्रतिभाताई धानोरकर यांनी उपस्थित सर्व नेते, नगरसेवक, नागरिक, तरुण-तरुणी आणि आयोजकांचे मनापासून आभार मानले.