पंतप्रधान शेतकरी सन्मान निधीचा २४ वा हप्ता बुलढाण्यात, ६७ कोटी ३६ लाख खात्यांत जमा

बुलढाणा, दि. ३० : पंतप्रधान शेतकरी सन्मान निधी योजनेचा २४ वा हप्ता पंतप्रधान नरेंद्र मोदी यांच्या हस्ते वितरित करण्यात आला. त्याअंतर्गत बुलढाणा जिल्ह्यातील ३ लाख ३६ हजार ८२५ पात्र शेतकरी कुटुंबांच्या बँक खात्यांत ६७ कोटी ३६ लाख रुपयांचा निधी थेट जमा करण्यात आला आहे.

दिवाळीच्या तोंडावर केंद्र आणि राज्य सरकारच्या वेगवेगळ्या योजनांमधून शेतकऱ्यांना आर्थिक आधार मिळत आहे, असे केंद्रीय आरोग्य व कुटुंब कल्याण राज्यमंत्री प्रतापराव जाधव यांनी सांगितले.

जाधव म्हणाले की, पंतप्रधान शेतकरी सन्मान निधी योजनेतून पात्र शेतकऱ्यांना दोन हजार रुपयांचा २४ वा हप्ता देण्यात आला आहे. त्याशिवाय दुष्काळसदृश परिस्थिती आणि पिकांचे झालेले नुकसान लक्षात घेऊन राज्य सरकारकडून पाच हजार रुपयांचा अग्रीम लाभ दिला जात आहे. या दोन्ही योजनांमुळे पात्र शेतकऱ्यांना दिवाळीआधी एकूण सात हजार रुपयांचा आधार मिळणार आहे.

डॉ. पंजाबराव देशमुख कृषी विद्यापीठांतर्गत बुलढाणा येथील कृषी विज्ञान केंद्रात या कार्यक्रमाचे थेट प्रक्षेपण ठेवण्यात आले होते. डॉ. धनराज उंदीरवाडे (संचालक, विस्तार शिक्षण), डॉ. प्रमोद वाकळे (सहयोगी अधिष्ठाता), संतोष डाबरे (जिल्हा अधीक्षक कृषी अधिकारी), डॉ. सतीश जाधव (प्राचार्य, कृषी तंत्र विद्यालय, बुलढाणा), अमोल झापे (वरिष्ठ शास्त्रज्ञ, कृषी विज्ञान केंद्र, बुलढाणा), ओमसिंग राजपूत, अनुजा सावळे, अॅड. गायकवाड यांच्यासह जिल्ह्यातील शेतकरी, महिला बचत गटांच्या प्रतिनिधी आणि पत्रकार हजर होते.

हवामान बदल आणि अल निनोच्या संभाव्य प्रभावामुळे शेतीसमोर आव्हाने उभी राहणार आहेत. त्यांना तोंड देण्यासाठी शेतकऱ्यांनी आधुनिक तंत्रज्ञानाचा चांगला वापर करावा, असे आवाहन यावेळी करण्यात आले. अँड्रॉइड मोबाईल आणि डिजिटल माध्यमांतून पिकांवरील रोग व कीड यांचे फोटो अपलोड करून निदान आणि मार्गदर्शन घेता येते, ही सुविधा शेतकऱ्यांनी वापरावी, असेही सांगण्यात आले. माती परीक्षणाचे अहवाल शेतकऱ्यांना सहज समजतील अशा सोप्या मराठीत द्यावेत, तसेच मातीतील नत्र, स्फुरद व पालाश (NPK) यांचे प्रमाण कळेल अशा पद्धतीने अहवाल तयार करावेत, अशी सूचना संबंधित यंत्रणेला करण्यात आली.

रब्बी हंगामात चारा पिकांच्या नियोजनावर भर देण्यात आला. पुढे पाणीटंचाई येण्याची शक्यता असल्याने उपलब्ध पाण्याचे काटेकोर नियोजन गरजेचे आहे. पिण्याच्या पाण्याची गरज आणि जनावरांसाठी चाऱ्याची उपलब्धता लक्षात घेऊन शेतकऱ्यांनी रब्बीचे नियोजन करावे, हरभरा, ज्वारी आणि चारा पिकांच्या लागवडीला प्राधान्य द्यावे, असे आवाहन करण्यात आले. चारा उत्पादनाला प्रोत्साहन देण्यासाठी सरकार हमीभावाने चारा खरेदी करणार असल्याची माहितीही देण्यात आली.

विकसित भारत २०४७ चे उद्दिष्ट गाठण्यासाठी महिला सक्षमीकरण आणि आर्थिक उपक्रमांतील महिलांचा सहभाग वाढवणे आवश्यक असल्याचे यावेळी सांगण्यात आले. शेती आणि पूरक व्यवसायांत महिलांचा सहभाग वाढवण्यावर, तसेच महिला बचत गटांमार्फत रोजगार आणि उत्पन्नाच्या संधी उपलब्ध करून देण्यावर भर देण्यात आला. कृषी क्षेत्राच्या विकासात महिलांचा वाटा महत्त्वाचा असल्याचेही प्रतिपादन करण्यात आले.

कार्यक्रमाचे प्रास्ताविक कृषी विज्ञान केंद्राचे वरिष्ठ शास्त्रज्ञ अमोल झापे यांनी केले. डॉ. धनराज उंदीरवाडे आणि संतोष डाबरे यांनी कृषी क्षेत्रातील विविध योजनांची माहिती दिली. बदलत्या हवामानात येणाऱ्या रब्बी हंगामाचे नियोजन, आधुनिक तंत्रज्ञानाचा वापर आणि पाणी व चारा व्यवस्थापनाचे महत्त्व त्यांनी अधोरेखित केले. यावेळी काही महिला बचत गट आणि प्रगतिशील शेतकऱ्यांना सन्मानपत्र देऊन प्रातिनिधिक स्वरूपात गौरवण्यात आले.