उद्योगपतींचे कर्ज माफ, मग शेतकऱ्यांना पुनर्गठन का? बुलढाण्यात सावंत यांचा सवाल

कोरड्या दुष्काळाच्या मदतीवरून शिवसेनेने मंगळवारी बुलढाण्यात मोर्चा काढला. जिजामाता प्रेक्षागार मैदानातून निघालेल्या या मोठ्या मोर्चाने बुलढाणा दणाणून गेले. शेतकऱ्यांना सरसकट हेक्टरी १ लाख रुपये मदत द्यावी, अशी आग्रही मागणी शिवसेना पक्षाच्या वतीने करण्यात आली.

पावसाचा मोठा खंड पडल्याने फक्त बुलढाणा जिल्ह्यातच नाही, तर संपूर्ण महाराष्ट्रात खरीप हंगाम शेतकऱ्यांच्या हातून गेला आहे, असे या वेळी सांगण्यात आले. शासनाने कोरडा दुष्काळ जाहीर केला असला तरी नेमकी काय मदत करणार हे सांगितलेले नाही, असे शिवसेनेचे म्हणणे आहे. या धोरणाचा निषेध करत शेतकरी बांधव राज्य सरकारच्या शासन निर्णयाविरोधात घोषणाबाजी करत मोर्चात सामील झाले. त्यांच्या हातात करपलेले सोयाबीन आणि मदतीच्या मागणीचे फलक होते, तर मोर्चात ट्रॅक्टर आणि बैलगाडीही होती.

मोर्चा निघण्यापूर्वी मैदानावर हजारो शेतकरी जमले होते. त्यांना मार्गदर्शन करताना शिवसेना नेत्यांनी, शेतकऱ्यांना थेट मदत मिळेपर्यंत हा लढा थांबणार नाही, असा इशारा दिला.

खासदार अरविंद सावंत म्हणाले की, शेतकऱ्यांचा आक्रोश घेऊन आम्ही हा मोर्चा काढला आहे. देशात संकट पहिल्यांदा दिसले तेव्हा शिवसेनेचे पक्षप्रमुख उद्धव ठाकरे सर्वांत आधी त्यावर बोलले आणि त्यांनी विशेष अधिवेशन घेण्याची मागणीही केली, असे सावंत यांनी सांगितले. हे सरकार शेतकऱ्यांना वाऱ्यावर सोडणारे आहे, असे ते म्हणाले. केंद्र आणि राज्य सरकारच्या कर्जमाफी धोरणावर त्यांनी प्रश्न उपस्थित केले. बड्या उद्योगपतींच्या कर्जाबाबत सवलती दिल्या जात असताना शेतकऱ्यांच्या कर्जमाफीसाठी मात्र अटी आणि निकष लावले जातात, असा आरोप त्यांनी केला. उद्धव ठाकरे मुख्यमंत्री होताच त्यांनी सर्व शेतकऱ्यांना दोन लाखांपर्यंत कर्जमुक्ती दिली, असेही सावंत म्हणाले. सध्याचे सरकार उद्योगपतींचे कर्ज माफ करते, मग शेतकऱ्यांच्या बाबतीत पुनर्गठनाचा निर्णय का, असा सवाल त्यांनी एक प्रकारे केला. शेतकऱ्यांना सरसकट एक लाख रुपये थेट मदत मिळावी, अशी मागणी त्यांनी जोरदारपणे मांडली. शिवसेना (उद्धव बाळासाहेब ठाकरे) पक्षाच्या वतीने जिल्हा आणि तालुका पातळीवर शेतकरी मदत केंद्रे उभारणार असून, त्यातून येत्या काळात शेतकऱ्यांना दिलासा देण्याचे काम केले जाईल, असेही ते म्हणाले.

आमदार सिद्धार्थ खरात म्हणाले की, फडणवीस सरकारने फक्त निर्णय काढून दुष्काळ जाहीर केला. मात्र दुष्काळात कोणती मदत करणार हे या निर्णयात सांगितलेले नाही. त्यामुळे शेतकऱ्यांमध्ये प्रचंड असंतोष आहे, असे त्यांनी सांगितले. पंचनाम्यांचे नाटक बंद करून नुकसानभरपाई जाहीर करा, अशी मागणी त्यांनी केली.

राज्य प्रवक्त्या जयश्री शेळके यांनी सरकारच्या कारभारावर टीका केली. महायुती सरकार शेतकऱ्यांच्या तोंडाला पाने पुसण्याचे काम करत आहे, असे त्या म्हणाल्या. हा असंतोष येत्या काळात या सरकारला सत्तेतून उलथवून टाकेल, असेही त्यांनी म्हटले. जिल्हाप्रमुख जालिंदर बुधवत यांनी शिवसेना कायम शेतकऱ्यांच्या सोबत आहे, असे सांगितले.

आमदार नितीन देशमुख यांनी सांगितले की, गेल्या ३० वर्षांत असे संकट आले नव्हते. संध्याकाळी चूल कशी पेटेल, अशी परिस्थिती आज शेतकऱ्यांच्या घरातही आहे. भाजप सरकार सत्तेवर आल्यापासून निव्वळ जुमलेबाजी सुरू आहे, असे ते म्हणाले. हिंदुत्वाच्या नावावर मते मागितली, मग आता कोरड्या दुष्काळामुळे थेट मदतीची अपेक्षा असताना शेतकरी हिंदू नाहीत का, असा थेट सवाल करत देशमुख यांनी सरकारवर हल्लाबोल केला.

देशमुख पुढे म्हणाले की, आज शेतकऱ्यांच्या आणि शेतमजुरांच्या मुलांना रोजगार नाही, आणि दुष्काळामुळे ही परिस्थिती आणखी भीषण होणार आहे. शिवसेना रस्त्यावर उतरली आणि पश्चिम विदर्भातून मार्च सुरू झाले तेव्हा सरकारला जाग आली, असे ते म्हणाले. पण काढलेल्या शासन निर्णयात काय आहे हे राज्य सरकारने सांगितले नाही, असे सांगून त्यांनी रस्त्यावरचा हा लढा येत्या काळात आणखी तीव्र करण्याचे सांगितले. प्रसंगी समृद्धी महामार्ग रोखण्याचा इशाराही त्यांनी दिला.