एमपीएससी आंदोलनाच्या वेळी राजेंद्र पवारांनी मुलगा रोहित पवारांना लिहिली भावनिक पोस्ट

पुण्यात एमपीएससीच्या विद्यार्थ्यांचे आंदोलन सुरू आहे. या आंदोलनाच्या पार्श्वभूमीवर आमदार रोहित पवार यांच्यावर विरोधकांकडून टीका होत आहे. अशा वेळी त्यांचे वडील आणि बारामती ॲग्रीकल्चरल डेव्हलपमेंट ट्रस्टचे चेअरमन राजेंद्र पवार यांनी सोशल मीडियावर एक भावनिक पोस्ट टाकली आहे. ती सध्या चर्चेत आली आहे. 'तुझा पाठीराखा बाप' या शब्दांत त्यांनी मुलाला संघर्षाची आठवण करून दिली आणि राजकारणातल्या आव्हानांना तोंड देण्याचा सल्लाही दिला आहे.

एमपीएससीच्या आंदोलनात आपण रोहित पवार यांच्यासोबत रस्त्यावर झोपलो होतो, असे राजेंद्र पवार यांनी पोस्टमध्ये लिहिले आहे. विरोधक सतत 'तोंडात सोन्याचा चमचा' असा आरोप करतात. तो आरोप खोडून काढण्याचा प्रयत्नही त्यांनी या पोस्टमधून केला आहे. त्यासाठी त्यांनी आपल्या कुटुंबाचा संघर्ष आणि सामाजिक कामाची पार्श्वभूमी मांडली आहे.

'१९५४ मध्ये ११० रुपये पगारावर माझे वडील आप्पासाहेब पवार नोकरीला लागले. २५ वर्षे नोकरी आणि उरलेली २५ वर्षे शेतकऱ्यांसाठी सामाजिक काम केले,' असे राजेंद्र पवार यांनी सांगितले. महाराष्ट्रात क्रॉसब्रीड गायींची ओळख करून देणे, ठिबक सिंचनाचा प्रसार आणि शेतकऱ्यांच्या जोडधंद्यांसाठी केलेले काम, याचा त्यांनी उल्लेख केला आहे. आप्पासाहेब पवार यांच्या या सामाजिक योगदानाची दखल केंद्र सरकारने पद्मश्री देऊन घेतली, असेही त्यांनी नमूद केले आहे.

स्वतःबद्दल लिहिताना राजेंद्र पवार म्हणतात की, १९७८ मध्ये ते फक्त ५०० डॉलर घेऊन शिक्षणासाठी अमेरिकेला गेले. तिथल्या झगमगाटात न रमता ते महाराष्ट्रात परतले आणि स्वतःच्या शेतीत उतरले. शेती, सामाजिक संस्था आणि शेतकऱ्यांसाठी मुरघास, कृषिक, कॉन्ट्रॅक्ट फार्मिंग इन पोल्ट्री असे उपक्रम राबवल्याचे त्यांनी सांगितले आहे.

रोहित पवार यांच्या वाटचालीबद्दल त्यांनी लिहिले आहे की, कॉलेजचे शिक्षण संपल्यानंतर रोहित यांनी फक्त स्वतः नोकरी केली नाही. त्यांनी उद्योग उभा करून हजारो ग्रामीण तरुणांना रोजगार दिला. लहानपणीचा एक किस्साही त्यांनी पोस्टमध्ये सांगितला आहे. रोहित मित्रांसोबत ओढ्यावर मासे आणि खेकडे पकडायला जायचे. ते बीळ सापाचे आहे की खेकड्याचे, याचा विचार न करता त्यात हात घालायचे.

याच धाडसाचा संदर्भ देत राजेंद्र पवार लिहितात, 'तू आता राजकारणात आहेस. राजकारणातील एखादा विषारी साप जर कधी डसला तर विष पचवायची तयारी ठेव आणि त्याचे दात उपसायची हिम्मतही!' शेवटी त्यांनी मुलाला असा संदेश दिला आहे, 'लढ, संघर्ष अटळ आहे. स्वतःसाठी राजकारण न करता हजारो तरुण पिढ्यांचे आणि गोरगरिबांचे सोने कर.' एमपीएससी आंदोलनाच्या पार्श्वभूमीवर आलेली ही पोस्ट म्हणजे फक्त वडिलांनी मुलाला दिलेला सल्ला नाही, तर रोहित पवार यांच्या राजकीय संघर्षाला बळ देणारा सूचक संदेश आहे, असेही पाहिले जात आहे.