उत्तराखंडमधील अनोखे मंदिर: अल्मोड्यात देवाला चिठ्ठी लिहून इच्छा कळवतात भाविक

उत्तराखंडमधील अल्मोडा हे धार्मिक पर्यटनासोबतच निसर्गसौंदर्यासाठीही प्रसिद्ध आहे. हिमालयाचे सुंदर दृश्य, जुनी मंदिरे आणि शांत वातावरण यामुळे हे ठिकाण लोकप्रिय आहे. याच अल्मोड्यात एक अनोखे मंदिर आहे. तिथे भाविक देवासमोर इच्छा बोलून दाखवत नाहीत, तर चिठ्ठीत लिहून आपल्या मनातली इच्छा व्यक्त करतात.

भारतात धार्मिक पर्यटनासाठी अनेक सुंदर मंदिरे आहेत आणि प्रत्येक मंदिराची स्वतःची अशी वेगळी खासियत असते. देवदर्शनाला जाताना बहुतेक जण काही ना काही इच्छा मनात घेऊन जातात आणि दर्शन घेताना मनातल्या मनात त्या देवासमोर मांडतात. अल्मोड्यातील या मंदिरात मात्र ही इच्छा देवासमोर मांडली जात नाही, ती चिठ्ठीतून व्यक्त केली जाते.

या मंदिराचे नाव चिताई गोलू देवता मंदिर असे आहे. भाविक मंदिर परिसरात घंटा अर्पण करतात आणि त्यावर आपल्या इच्छा लिहिलेल्या चिठ्ठ्याही अर्पण करतात. अल्मोडा शहरापासून या मंदिरापर्यंत जाण्यासाठी स्थानिक टॅक्सीची मदत घ्यावी लागते. तिथल्या डोंगरांमध्ये सूर्योदय आणि सूर्यास्ताचे सुंदर दृश्य पाहता येते.

अल्मोडा शहरात आणखी एक लोकप्रिय देवीचे मंदिर आहे. त्याचे नाव नंदा देवी मंदिर. धार्मिक आणि सांस्कृतिक अशा दोन्ही दृष्टीने या मंदिराचे महत्त्व मोठे आहे. मंदिराची वास्तुकला आणि स्थानिक परंपरा यामुळे हे ठिकाण इतर पर्यटन स्थळांपेक्षा वेगळे ठरते.

अल्मोड्यापासून साधारण ३६ किमी अंतरावर जागेश्वर मंदिर संकुल आहे. उत्तराखंड पर्यटन विभागानुसार, इथे एकाच ठिकाणी तब्बल १२४ मंदिरांचा संघ पाहायला मिळतो. भारतीय पुरातत्व सर्वेक्षणाने या संकुलातील अनेक मंदिरांना संरक्षित स्मारके म्हणून सूचीबद्ध केले आहे.

मुंबईहून अल्मोड्याला जायचे असेल तर विमान किंवा रेल्वे असे दोन मार्ग आहेत. मुंबईहून दिल्लीपर्यंतचा रस्ते प्रवास खूप लांब आणि थकवणारा ठरेल. विमानाने जायचे असेल तर मुंबई एअरपोर्टवरून पंतनगर विमानतळासाठी किंवा दिल्ली विमानतळासाठी फ्लाईट पकडता येते. रेल्वेने जायचे असेल तर मुंबईहून उत्तराखंडमधील काठगोदाम रेल्वे स्टेशनसाठी ट्रेन पकडावी लागते. काठगोदाम हे अल्मोड्याच्या सर्वात जवळचे रेल्वे स्टेशन आहे.

रोजच्या धावपळीच्या आणि कंटाळवाण्या जीवनातून थोडा विरंगुळा हवा असेल आणि धार्मिक पर्यटनाची आवड असेल, तर अल्मोडा हे असे ठिकाण आहे जिथे निसर्ग, मंदिरे आणि वेगळी परंपरा एकत्र पाहायला मिळते.