तांबडेमळा रुग्णालयाच्या कामांसाठी ४० कोटी मंजूर, मंचरमध्ये महिलांसाठी खास आरोग्य सुविधा

आंबेगाव तालुक्यातील तांबडेमळा रुग्णालयाच्या विविध विकासकामांसाठी ४० कोटी रुपयांचा निधी मंजूर झाला आहे, अशी माहिती माजी गृहमंत्री दिलीप वळसे पाटील यांनी दिली. तालुक्याची आरोग्य यंत्रणा अधिक सक्षम आणि दर्जेदार करणे हा त्यामागचा उद्देश असल्याचे त्यांनी सांगितले. तिथले १०० खाटांचे सुसज्ज रुग्णालय लवकरच सर्वसामान्यांच्या सेवेत येणार आहे, असेही ते म्हणाले.

मंचर येथे सध्या उपजिल्हा रुग्णालय सुरू आहे. तिथे महिलांसाठी विशेष आरोग्य सुविधा उपलब्ध करून देण्याचे नियोजन आहे, असे वळसे पाटील यांनी सांगितले. मंचर येथे झालेल्या कार्यक्रमात ते बोलत होते.

रजनी प्रकाश फाउंडेशनने वळसे पाटील यांच्या वाढदिवसाचे औचित्य साधून मंचर येथे मोफत आरोग्य शिबिर घेतले होते. त्या शिबिराचा समारोप झाला, त्याच कार्यक्रमात आरोग्य कर्मचारी आणि आशा सेविकांना दिवाळीची भेटवस्तू आणि फराळाचे वाटपही करण्यात आले.

वळसे पाटील म्हणाले, "तालुक्यात पाबळ, घोडेगाव आणि मंचर येथे अत्याधुनिक आरोग्य सुविधांचे सक्षम जाळे उभारण्यात आले आहे. महामार्गावरील अपघातग्रस्तांना तातडीने उपचार मिळावेत यासाठी मंचर येथे सर्वोपचार अपघात केंद्र (ट्रॉमा केअर सेंटर) सुरू करण्यात आले आहे. आरोग्याबरोबरच शिक्षण क्षेत्रातही अभियांत्रिकी महाविद्यालय आणि दुर्गम भागातील आदिवासी विद्यार्थ्यांसाठी निवासी शाळांची उभारणी झाली आहे. मंचर शहराचा विकास आराखडा (डीपी) तयार झाला असून, शहराचा नियोजनबद्ध विकास साधण्यावर आमचा भर राहील."

पुणे म्हाडाचे अध्यक्ष आणि माजी खासदार शिवाजीराव आढळराव पाटील यांनीही मनोगत मांडले. ते म्हणाले, "आंबेगाव तालुक्याने आरोग्य, शिक्षण, रोजगार आणि मूलभूत पायाभूत सुविधांमध्ये मोठी प्रगती केली आहे. या सर्वंकष विकासामध्ये दिलीप वळसे पाटील यांचे योगदान अत्यंत मोलाचे आहे."

माजी आमदार पोपटराव गावडे आणि जिल्हा शल्यचिकित्सक अंबादास देवमाने यांचीही यावेळी भाषणे झाली. शरद सहकारी बँकेचे अध्यक्ष देवेंद्रशेठ शहा यांनी आरोग्य कर्मचाऱ्यांच्या कामाचे कौतुक केले. आदिवासी भागात मोफत नेत्रतपासणी आणि चष्मे वाटप होईल, तसेच कुपोषणमुक्तीसाठी ठोस पावले उचलली जातील, असे त्यांनी सांगितले.

कार्यक्रमाला पूर्वा वळसे पाटील, नेत्रा शहा, भैरवनाथ पतसंस्थेचे उपाध्यक्ष सागर काजळे, पंचायत समितीचे सभापती कैलासबुवा काळे, नगराध्यक्ष संदीप (लक्ष्मण) थोरात आणि जिल्हा परिषद सदस्य विष्णु हिंगे पाटील उपस्थित होते. महिला काँग्रेसच्या अध्यक्षा सुषमा शिंदे, आदिवासी नेते सुभाषराव मोरमारे आणि तालुका खरेदी-विक्री संघाचे अध्यक्ष नवनाथ हुले हेही हजर होते. याशिवाय विविध क्षेत्रांतील पदाधिकारी, डॉक्टर, कर्मचारी आणि आशा सेविका मोठ्या संख्येने आल्या होत्या.