आयपीएल २०२७ आधी महेला जयवर्धनेंचा मुंबई इंडियन्सच्या मुख्य प्रशिक्षकपदाचा राजीनामा

मुंबई इंडियन्सचे (MI) मुख्य प्रशिक्षक महेला जयवर्धने यांनी आयपीएल २०२७ हंगामाच्या आधीच आपल्या पदाचा राजीनामा दिला आहे. एमआय आणि जयवर्धने यांनी परस्पर संमतीने हा निर्णय घेतला आहे. त्यामुळे मुंबई इंडियन्ससोबतचा त्यांचा जवळपास दशकभराचा प्रवास आता संपला आहे.

जयवर्धने गेली दोन वर्षे संघाला प्रशिक्षण देत होते. त्याआधी ते २०१७ ते २०२२ या काळात मुख्य प्रशिक्षक होते. त्यांच्या कार्यकाळात मुंबई इंडियन्सने तीन वेळा आयपीएलचे विजेतेपद पटकावले. वृत्तानुसार, मुंबई इंडियन्स येत्या काही आठवड्यांत नवीन मुख्य प्रशिक्षकाची घोषणा करण्याची शक्यता आहे.

मुंबई इंडियन्सने आपल्या अधिकृत इंस्टाग्राम अकाउंटवरील पोस्टमधून जयवर्धने फ्रँचायझी सोडत असल्याची घोषणा केली. संघ सोडताना जयवर्धने भावूक झाले होते. त्यांनी संघातील खेळाडू, प्रशिक्षक आणि चाहत्यांचे आभार मानले.

ते म्हणाले, "मुंबई इंडियन्स हा गेल्या दशकाहून अधिक काळापासून माझ्या प्रवासाचा एक अत्यंत खास भाग राहिला आहे. येथील खेळाडू, कोचिंग स्टाफ, 'वन फॅमिली' आणि चाहत्यांनी माझ्यासाठी हा अनुभव कायम स्मरणात राहील असा खास बनवला आहे. या प्रवासात आम्ही एकत्र अनेक अविस्मरणीय क्षण अनुभवले, आव्हानांना धैर्याने सामोरे गेलो आणि सर्वांना अभिमान वाटेल असे यश मिळवले."

जयवर्धने पुढे म्हणाले, "गेल्या अनेक वर्षांपासून माझ्यावर विश्वास दाखवल्याबद्दल, सातत्याने पाठिंबा दिल्याबद्दल आणि मैत्री जपल्याबद्दल मी नीता अंबानी आणि आकाश अंबानी यांचे मनापासून आभार मानतो. आम्ही एकत्र मिळून जे काही साध्य केले, त्याचा मला खूप अभिमान आहे. मुंबई इंडियन्ससाठी माझ्या हृदयात नेहमीच एक विशेष स्थान राहील. आगामी वर्षांमध्ये या संघाला भरभरून यश मिळो, हीच माझी मनापासून शुभेच्छा."

जयवर्धने यांच्या जाण्यावर नीता अंबानी यांनीही प्रतिक्रिया दिली. त्या म्हणाल्या, "महेला यांनी गेल्या अनेक वर्षांपासून मुंबई इंडियन्ससाठी मोलाचे योगदान दिले आहे. त्यांचे नेतृत्व, प्रामाणिकपणा आणि क्रिकेटवरील प्रेम आमच्यासाठी खूप खास राहिले आहे. मी संपूर्ण मुंबई इंडियन्स परिवाराच्या वतीने, महेला यांनी गेल्या अनेक वर्षांत दिलेल्या योगदानाबद्दल आणि संघाप्रती असलेल्या वचनबद्धतेबद्दल आभार मानते. आम्ही एकत्र केलेला हा प्रवास आणि अविस्मरणीय क्षण आमच्यासाठी नेहमीच खास राहतील. महेला हे कायमच आमच्या वन फॅमिलीचा एक भाग असतील. भविष्यासाठी त्यांना खूप खूप शुभेच्छा देतो."

जयवर्धने यांनी आयपीएल २०१७ मध्ये मुंबई इंडियन्सच्या मुख्य प्रशिक्षकपदी कार्यकाळाला सुरुवात केली आणि रिकी पाँटिंग यांची जागा घेतली. २०२२ मध्ये त्यांनी मुंबई इंडियन्सचे ग्लोबल हेड ऑफ परफॉर्मन्स हे पद स्वीकारले. २०२५ मध्ये ते मुख्य प्रशिक्षक म्हणून संघात परतले. आयपीएल २०२६ हा त्यांचा मुंबई इंडियन्ससोबतचा शेवटचा हंगाम आहे. त्यांच्या नेतृत्वाखाली मुंबई इंडियन्सने आयपीएल २०१७, आयपीएल २०१९ आणि आयपीएल २०२० चे विजेतेपद जिंकले.