आदिनाथ कोठारेपासून विभक्त झाल्यानंतर उर्मिला कानेटकर यांनी इन्स्टाग्रामवरील नाव बदलले, दसऱ्याच्या दिवशीची

मराठी मनोरंजनविश्वातील अभिनेत्री उर्मिला कानेटकर आणि अभिनेता आदिनाथ कोठारे यांनी वेगळे होण्याचा निर्णय घेतल्यामुळे गेले काही दिवस ते चर्चेत आहेत. आता उर्मिला यांनी इन्स्टाग्रामवर एक पोस्ट शेअर केली आहे. त्यातून त्यांनी आपल्या सोशल मीडिया अकाऊंटवरील नावात बदल केल्याचे दाखवले आहे. दसऱ्याच्या दिवशी त्यांनी ही पोस्ट शेअर केली असून, त्यांच्या नव्या नावाने आणि कॅप्शनने नेटकऱ्यांचे लक्ष वेधले आहे.

उर्मिला यांचे इन्स्टाग्राम अकाऊंट आधी 'उर्मिला कोठारे' या नावाने ओळखले जात होते. मात्र, आदिनाथ कोठारे यांच्यापासून विभक्त होण्याचा निर्णय जाहीर केल्यानंतर त्यांनी आपल्या सोशल मीडिया प्रोफाइलवर 'उर्मिला कानेटकर' असे नाव ठेवले आहे. दसऱ्याच्या दिवशी त्यांनी आपल्या प्रोफाइलचा फोटो शेअर केला.

या फोटोसोबत त्यांनी "Happy Dussehra to me and you" असे कॅप्शन लिहिले आहे. शिवाय "Thank you Instagram" असे म्हणत त्यांनी नावातील बदलाकडे लक्ष वेधले. दसऱ्याच्या दिवशी शेअर केलेल्या या पोस्टची सोशल मीडियावर चर्चा होत आहे. विभक्त होण्याची घोषणा केल्यानंतर अभिनेत्रीने आपल्या नावात केलेला हा बदल अनेकांच्या नजरेत आला आहे.

याआधीही उर्मिला यांनी कर्माशी संबंधित आशयाची पोस्ट शेअर केली होती. त्यामुळे चाहत्यांचे लक्ष त्यांच्या सोशल मीडिया पोस्टकडे लागले आहे. मात्र, या पोस्टमागचा नेमका अर्थ काय, हे उर्मिला यांनी स्पष्ट केलेले नाही.

आदिनाथ कोठारे आणि उर्मिला कानेटकर यांच्या नात्याबद्दल गेल्या काही काळापासून चर्चा सुरू होती. अखेर १६ जुलै रोजी दोघांनीही इन्स्टाग्रामवर संयुक्त पोस्ट शेअर करून पती-पत्नी म्हणून वेगळे होण्याचा निर्णय घेतल्याचे जाहीर केले.

या पोस्टमध्ये त्यांनी परस्पर संमतीने आणि सामंजस्याने वेगळे होण्याचा निर्णय घेतल्याचे सांगितले होते. जोडीदार म्हणून त्यांचा प्रवास संपला असला, तरी मुलगी जिजासाठी ते नेहमी एकत्र राहतील, असेही त्यांनी स्पष्ट केले होते. मुलीला प्रेम, सुरक्षितता आणि पाठिंबा मिळावा, यासाठी दोघेही सहपालकत्वाची (Co-parenting) जबाबदारी पार पाडत असल्याचे त्यांनी नमूद केले होते.

तसेच, एकत्र घालवलेल्या वर्षांबद्दल आणि एकमेकांबद्दल नेहमीच आदर राहील, असेही दोघांनी आपल्या निवेदनात म्हटले होते. आता दसऱ्याच्या दिवशी उर्मिला यांनी इन्स्टाग्रामवरील नावात केलेल्या बदलामुळे त्या पुन्हा एकदा चर्चेत आल्या आहेत.