वायसीएम रुग्णालयात पोलीस हवालदाराची गचांडी धरली, तिघांना अटक

पिंपरी चिंचवडमधील वायसीएम रुग्णालयात एक धक्कादायक प्रकार घडला आहे. कर्तव्यावर असलेल्या पोलीस हवालदारालाच तीन दंगेखोरांनी गचांडी धरून धक्काबुक्की आणि मारहाण केली. जीव घेण्याचा प्रयत्न केल्याचा आरोप असून, या घटनेत हवालदार अमोल शिंदे यांना गंभीर दुखापत झाली आहे.

शुक्रवार आणि शनिवारच्या मध्यरात्री साडेचारच्या सुमारास हा प्रकार घडला. वैभव साळुंखे, कुशल गोयल आणि सोहेल शेख हे तिघे त्यांच्या मित्राला उपचारासाठी रुग्णालयात घेऊन आले होते. मित्रावर उपचार सुरू असताना त्यांनी तिथल्या डॉक्टर आणि कर्मचाऱ्यांवर आरडाओरडा करत गोंधळ घातला. वैद्यकीय अधिकाऱ्यांच्या कामात त्यामुळे अडथळा निर्माण होत असल्याचे पोलिसांच्या निदर्शनास आले.

त्यावेळी कर्तव्यावर असलेले पोलीस हवालदार अमोल शिंदे आणि त्यांच्या सहकाऱ्यांनी या तिघांना शांत राहण्यास सांगितले, तसेच समज दिली. पण शांत होण्याऐवजी या तिघांनी उलट पोलिसांनाच धक्काबुक्की केली आणि शिवीगाळ केली.

तक्रारीनुसार, त्यानंतर त्यांनी पोलिसाच्या गळ्याला पकडून त्यांना बाजूला ढकलले. हातातील जाड लोखंडी कड्याने मारहाण करण्याच्या उद्देशाने पायावर आणि डोळ्याजवळ गंभीर दुखापत केल्याची तक्रार आहे. पोलिसांना जीवे मारण्याची धमकी दिल्याचा आणि त्याच उद्देशाने मारहाण केल्याचा आरोपही आहे.

या घटनेनंतर संत तुकारामनगर पोलिसांनी तातडीने कारवाई करत वैभव साळुंखे, कुशल गोयल आणि सोहेल शेख या तिघांना अटक केली आहे. त्यांच्याविरोधात संत तुकारामनगर पोलीस ठाण्यात गुन्हा दाखल करण्यात आला आहे.

सरकारी कामात अडथळा आणणे, पोलिसांना शिवीगाळ व धक्काबुक्की करणे आणि जीवे मारण्याचा प्रयत्न करणे, या आरोपांखाली हा गुन्हा नोंदवला गेला आहे. रुग्णालयासारख्या ठिकाणी कर्तव्य बजावणाऱ्या पोलीस कर्मचाऱ्यालाच लक्ष्य करून मारहाण केल्याने परिसरात खळबळ उडाली आहे. या प्रकरणाचा पुढील तपास संत तुकारामनगर पोलीस करत आहेत.