दारू असलेल्या पार्टीला मुलगा जात नाही, मुंढे यांनी सांगितले मुलांशी नाते आणि सोलापूरची बदली

राज्याच्या अन्न व औषध विभागाचे (FDA) आयुक्त तुकाराम मुंढे यांनी एका मुलाखतीत आपल्या मुलांशी असलेल्या नात्याबद्दल मोकळेपणाने सांगितले. तसेच ते मित्रांच्या वर्तुळात वावरताना कोणती पथ्ये पाळतात, यावरही त्यांनी भाष्य केले.

मुंढे यांच्या म्हणण्यानुसार, त्यांच्यात आणि मुलांमध्ये अनेक विषयांवर चर्चा होते. कोणताही आडपडदा न ठेवता ते एकमेकांशी बोलतात. मुलाचे आणि मुलीचे मित्र आहेत. त्यांच्या बर्थडे पार्ट्या बऱ्याचदा मोठ्या असतात, आणि अशा पार्टीला जायचे की नाही, हा निर्णय आपला आपण घ्यायचा असतो. काही ठिकाणी या पार्ट्यांमध्ये मुले ड्रिंक करतात. अशा ठिकाणी त्यांचा मुलगा कधीही जात नाही. जे ड्रिंक घेतात त्यांच्या बर्थडेला मी जाणार नाही, असे तो सांगतो, आणि याबाबत त्याची विचारप्रक्रिया अत्यंत स्पष्ट आहे, असे मुंढे म्हणाले.

मुलाचा वाढदिवस घरीच किंवा कुठेतरी छोट्या प्रमाणात साजरा होतो, असे त्यांनी सांगितले. त्या वेळी आठ-दहा मित्र येतात आणि सगळे मर्यादित स्वरूपात असते. मुलांची अशी विचारप्रक्रिया फक्त सांगून तयार होत नाही, असे सांगून मुंढे म्हणाले की, ते स्वतः ड्रिंक करत नाहीत आणि त्यांच्या घरात कोणीही ते करत नाही. त्यामुळे त्यावर पैसा खर्च होत नाही. आम्ही ड्रिंक घेत नाही, तर कोणाला देण्याचा प्रश्नच येत नाही. आमच्या घरात ही संस्कृती आहे, असेही ते म्हणाले.

मुलांच्या शिक्षणासाठी कितीही पैसे लागले तरी आपण तयार आहोत, असे मुंढे यांनी सांगितले. भविष्यात मुले जास्त कमावतील की कमी, हे आपल्याला माहिती नाही. पण ते जो पैसा कमावतील तो स्वतःच्या मेहनतीने आणि योग्य मार्गाने कमावतील, याची खात्री आहे आणि त्याबद्दल आनंद वाटतो, असे ते म्हणाले.

याच मुलाखतीत मुंढे यांनी सोलापूरचे जिल्हाधिकारी असताना झालेल्या तडकाफडकी बदलीविषयीही सांगितले. सोलापूरला असताना आपण अनेक महत्त्वाचे निर्णय घेतले, त्यापैकी एक सिद्धेश्वराच्या यात्रेबाबत होता, असे ते म्हणाले. यात्रेच्या व्यवस्थापनात त्यांनी काही बदल केले आणि आपत्कालीन व्यवस्था लागू केली. सिद्धेश्वराची यात्रा मैदानातच होईल, असे त्यांनी सांगितले होते. त्यावरून मोठा वाद झाला आणि हे प्रकरण मुख्यमंत्र्यांपर्यंत गेले. आपल्या बदलीमागचे ते प्रमुख कारण होते, असे मुंढे यांनी सांगितले.

मात्र आजही सिद्धेश्वराच्या यात्रेसाठी आपण तयार केलेल्या आपत्कालीन व्यवस्थेचाच वापर होत आहे, असे ते म्हणाले. ही यात्रा जानेवारी महिन्यात संक्रांतीच्या दिवशी होते. त्यांनी निर्णय घेण्याआधीचा आणि नंतरचा जानेवारीतला डेटा काढून पाहावा, असे आवाहन त्यांनी केले. जानेवारीत सोलापुरातील रुग्णालये ब्राँकायटिसच्या रुग्णांनी भरून जायची, आणि डेटा पाहिला तर तेव्हाच्या आणि आताच्या जानेवारीतला फरक स्पष्ट दिसेल, असे ते म्हणाले. आपल्या निर्णयामुळे अनेक लोकांचे जीव वाचले, असे तुकाराम मुंढे यांनी म्हटले.