समुद्रात तरंगत्या जाहिरातींना आदित्य ठाकरे यांचा विरोध, फडणवीसांना पत्र

शिवसेना (UBT) चे नेते आणि वरळीचे आमदार आदित्य ठाकरे यांनी राज्य सरकारच्या "फ्लोटिंग होर्डिंग्ज" म्हणजेच समुद्रात तरंगत्या जाहिरातींच्या निर्णयावर टीका केली आहे. हा निर्णय "अत्यंत बेजबाबदार, कदाचित भ्रष्ट आणि मुंबईचे सौंदर्य बिघडवणारा" आहे, असे ते म्हणाले.

महाराष्ट्र मेरिटाइम बोर्डाने शहरातील प्रमुख समुद्रकिनाऱ्यांलगत बार्जवर तरंगत्या जाहिराती लावण्यासाठी टेंडर मागवले होते. त्यावर ठाकरे यांनी २८ ऑक्टोबर रोजी मुख्यमंत्री देवेंद्र फडणवीस यांना पत्र लिहून विरोध नोंदवला. "समुद्रात आता 'फ्लोटिंग होर्डिंग्ज' लावून शहर विद्रूप करण्याला माझा स्पष्ट आक्षेप आहे, हे कळवण्यासाठी मी तुम्हाला पत्र लिहीत आहे," असे त्यांनी पत्रात म्हटले आहे.

पत्रात ते पुढे म्हणतात, की प्रदूषण आटोक्यात आलेले नाही आणि त्यावर गंभीर कारवाईही होत नाही. त्यामुळे किनाऱ्यापासून थोडे दूर गेले तरी शहरातील बहुतेक लोकांना समुद्र दिसत नाही. होर्डिंग कंत्राटदारांच्या टोळीला पाठिंबा देणाऱ्या या "विचित्र" निर्णयामुळे जे काही दिसेल, ते नागरिकांच्या तोंडावर चिकटवलेल्या जाहिराती असतील, असेही त्यांनी लिहिले आहे. जमिनीवरील बेसुमार प्रदूषणाचा फटका नागरिकांना आधीच बसत आहे, असे त्यांचे म्हणणे आहे.

रात्री नागरिकांना त्रास देणाऱ्या एलईडी होर्डिंग्जवर नियंत्रण ठेवणारे धोरण असायला हवे, असे सांगत ठाकरे यांनी पत्रात म्हटले आहे, "कंत्राटदारांच्या टोळ्यांपेक्षा सौंदर्याला प्राधान्य हाच नियम असायला हवा, पण दुर्दैवाने या निर्णयात सौंदर्यापेक्षा कंत्राटदारांना निवडले आहे. तुम्ही यात हस्तक्षेप करून अत्यंत बेजबाबदार, कदाचित भ्रष्ट आणि मुंबईचे सौंदर्य नक्कीच बिघडवणारा हा निर्णय थांबवावा, अशी माझी विनंती आहे."

सागरी परिसंस्थातज्ज्ञ शौनक मोदी हे कोस्टल कन्झर्व्हेशन फाउंडेशनचे संचालक आणि मरीन लाइफ ऑफ मुंबईचे संस्थापक आहेत. ते म्हणाले, "एलईडी बिलबोर्डमुळे किनाऱ्यावरील संपूर्ण अन्नसाखळी विस्कळीत होऊ शकते. मुंबईच्या किनाऱ्यावरील सागरी जीव जमिनीवरून येणाऱ्या सततच्या प्रकाश प्रदूषणाशी आधीच झुंजत आहेत. तरंगत्या बिलबोर्डमुळे पाण्यावर उरलेल्या सावलीच्या थोड्या जागाही नाहीशा होतील."

मोदी पुढे म्हणाले, "या बिलबोर्डचा तीव्र निळा प्रकाश प्लँक्टनचे रात्रीचे स्थलांतर रोखेल आणि लहान मासे सहज भक्ष्य बनतील. एवढा तेजस्वी प्रकाश चंद्राच्या नैसर्गिक खुणाही झाकून टाकेल, ज्यांची भरती-ओहोटी क्षेत्रातील जीवांना अंडी घालण्यासाठी आणि खाण्यासाठी गरज असते. त्यात डॉल्फिन आणि पोर्पॉइज राहतात अशा अधिवासात बार्जवरील जनरेटरचा पाण्याखालील सततचा आवाज मिसळला, तर मुंबईच्या सागरी जीवांचे शेवटचे अंधारे आणि शांत आश्रयस्थान तुम्ही हिरावून घेत आहात."

डीईएस पुणे विद्यापीठातील ॲडव्हान्स्ड रिसर्च सेंटर फॉर इकॉलॉजी अँड कन्झर्व्हेशन येथील सागरी संवर्धनतज्ज्ञ डॉ. प्राची हटकर म्हणाल्या, "मुंबईचा किनारा हा जिवंत परिसंस्था आहे, जाहिरातीची जागा नाही. प्रकाशित तरंगत्या होर्डिंग्जमुळे प्रकाश प्रदूषण, पाण्याखालील आवाज, जहाजांची ये-जा आणि खाण्या-विश्रांतीच्या अधिवासातील अडथळे यांमुळे सागरी जीव आणि स्थलांतरित पक्ष्यांवर परिणाम होऊ शकतो. विशेषतः संवेदनशील अधिवासांजवळ अशा उभारणीला परवानगी देण्यापूर्वी त्या जागेनुसार पर्यावरणीय मूल्यांकन झाले पाहिजे. व्यावसायिक हितसंबंध मुंबईच्या किनारी जैवविविधतेच्या किमतीवर येता कामा नयेत."