फडणवीस, उद्धव आणि राज ठाकरे दादरमध्ये एकाच मंचावर; 'हास्यरेषा' पुस्तक प्रकाशनाला तिघे हजर

मुख्यमंत्री देवेंद्र फडणवीस, माजी मुख्यमंत्री उद्धव ठाकरे आणि मनसे प्रमुख राज ठाकरे हे तिघे गुरुवारी एकाच मंचावर एकत्र दिसले. मुंबईतील दादर भागातल्या स्वातंत्र्यवीर सावरकर सभागृहात हा कार्यक्रम झाला. प्रशांत कुलकर्णी यांच्या 'हास्यरेषा' या पुस्तकाचं प्रकाशन हे त्याचं निमित्त होतं.

तिघांचे फोटो कॅमेऱ्यात टिपले गेले आणि ते देशभरातल्या माध्यमांत व सोशल मीडियावर फिरू लागले. या फोटोची चर्चा सुरू झाली आहे. बऱ्याच वर्षांनी हे तिन्ही नेते एकाच व्यासपीठावर आले, हेही चर्चेचं एक कारण ठरलं.

दोन्ही ठाकरे बंधूंमध्ये दिलजमाई झाल्यानंतर हे तिघे पहिल्यांदाच एकत्र एका मंचावर आले आहेत. त्यामुळे या कार्यक्रमाकडे सगळ्यांचं लक्ष लागलं होतं. एकमेकांवर टीका करणारे हे नेते एकत्र आल्यावर काय बोलतात, याकडे महाराष्ट्राचं लक्ष होतं.

याच दिवशी विधान परिषद निवडणुकीच्या निमित्ताने शिंदे सेना आणि भाजप यांच्यात सकाळपासून आरोप-प्रत्यारोप सुरू होते. त्यानंतर संध्याकाळी हे तिघे एकत्र आल्याने चर्चेला आणखी उधाण आलं. कार्यक्रमाआधी तिन्ही नेत्यांनी बंद दाराआड चर्चा केली, त्याचीही चर्चा रंगली.

दोन्ही ठाकरे बंधूंनी अलीकडे अनेक मुद्द्यांवर आवाज उठवला आहे. मुख्य निवडणूक आयुक्तांविरोधातील आंदोलन, एमपीएससीच्या विद्यार्थ्यांना पाठिंबा, धर्मेंद्र प्रधान यांच्या विरोधातील आंदोलन आणि कर्जतमधील झाडांची कत्तल या विषयांवर त्यांनी फडणवीस सरकारला लक्ष्य केलं आहे.

या कार्यक्रमात फडणवीस यांनी तिघे पहिल्यांदाच एकत्र आल्याचा धागा पकडून टोलेबाजी केली. ते म्हणाले, 'आम्हा तिघांना एकत्र पाहून काही लोकांना पोटशूळ का उठला माहीत नाही. पण आम्हाला मात्र एकाच मंचावर आल्याचं आश्चर्य वाटत नाही. ही महाराष्ट्राची परंपरा आहे. वेगवेगळ्या पक्षाचे नेते आणि वेगवेगळी विचारधारा असलेले नेते एकत्र एकाच मंचावर येत असतात. आम्ही एकत्र हास्यविनोद करू शकतो. एकत्र चहाही पिऊ शकतो.'

उद्धव ठाकरे यांचा उल्लेख करत फडणवीस म्हणाले, '2019पर्यंत जेव्हा कधी उद्धवजी मला बोलवायचे तेव्हा मी जायचो. 2019नंतर त्यांनी फोन केला नाही. मी वाट पाहत होतो.'

राज ठाकरे यांनीही तिघे एकत्र येण्यामागचं कारण सांगितलं. ते म्हणाले, 'आम्ही तिघे लोक एका मंचावर एकत्र कसे आलो, याचा काही लोक विचार करत असतील. पण काही व्यासपीठं अशी असतात की जिथे सर्व एकत्र येत असतात. राजकारण बाजूला ठेवून एकत्र येत असतात. अशा कार्यक्रमात राजकारणाऐवजी कला आणि संस्कृतीची चर्चा होते. अशा तऱ्हेच्या व्यासपीठावर वेगवेगळ्या विचारधारेचे लोक एकत्र येणं स्वाभाविक आहे.'