विधानपरिषदेत शरद पवारांच्या राष्ट्रवादीला पुणे पदवीधर आणि मराठवाड्यात विजय, जयंत पाटील यांचा सत्ताधाऱ्यांना

राज्यातील पाच विधानपरिषद मतदारसंघांचे निकाल आता हाती आले आहेत. दोन्ही शिक्षक मतदारसंघांत महायुतीचे उमेदवार विजयी झाले. तीन पदवीधर मतदारसंघांपैकी दोन ठिकाणी महाविकास आघाडीचे उमेदवार निवडून आले. नागपूर पदवीधर मतदारसंघात मात्र भाजपला विजय मिळाला. त्यामुळे पाचपैकी तीन जागा जिंकून भाजप आणि महायुतीने वर्चस्व मिळवले.

पुणे पदवीधर मतदारसंघातून हर्षदा देशमुख आणि मराठवाड्यातून प्रतापसिंह पाटील विजयी झाले. हे दोन्ही उमेदवार शरद पवारांच्या राष्ट्रवादीचे आहेत. त्यामुळे विधानपरिषद निवडणुकीत शरद पवारांच्या राष्ट्रवादीला मोठे यश मिळाले आहे. विशेष म्हणजे मराठवाड्यात राष्ट्रवादी विरुद्ध राष्ट्रवादी असा संघर्ष पाहायला मिळाला. तिथे प्रतापसिंह पाटील यांनी राष्ट्रवादीच्या सतीश चव्हाण यांचा पराभव केला.

विजयाचा जल्लोष झाल्यानंतर राष्ट्रवादीचे ज्येष्ठ नेते जयंत पाटील यांनी पत्रकार परिषद घेऊन माध्यमांशी संवाद साधला. या निकालावर बोलताना, या सगळ्या निवडणुकीत समाजातील भावनांचे विश्लेषण दिसत असते, असे म्हणत त्यांनी अजित पवारांच्या राष्ट्रवादीला टोला लगावला.

जयंत पाटील यांनी सांगितले की, बेकरी, महागाई आणि स्पर्धा परीक्षेत सुरू असलेला त्रास, याबद्दलची चीड पदवीधरांनी मतदानातून व्यक्त केली. हर्षदा जाधव देशमुख या सुशिक्षित पदवीधर युवा कार्यकर्त्या उमेदवार आहेत, तर मराठवाड्यात प्रताप पाटील विजयी झाले, असेही ते म्हणाले.

या निवडणुकांमध्ये मतदानासाठी पानभर पत्रिका होती, त्यामुळे दहा मतं पडली तरी ती मोजावी लागतात, असे पाटील यांनी सांगितले. बॅलेटवर मतदान झालं की विरोधी पक्ष जिंकतो, असे म्हणत त्यांनी विजयानंतर पुन्हा एकदा ईव्हीएमवरून सत्ताधाऱ्यांना लक्ष्य केलं. शिक्षक आणि पदवीधर मतदारसंघांत मोठ्या प्रमाणात आमिष दाखवून मते घेण्याचा प्रयत्न झाला, असेही त्यांनी म्हटलं. मात्र गोकुळच्या निवडणुकीमुळे वातावरण निर्माण झालं होतं आणि त्याचा परिणाम कोल्हापूरमध्ये झाला, असे जयंत पाटील यांनी सांगितले.

नागपूर पदवीधर मतदारसंघातून बंडखोरी केल्यामुळे शरद पवारांच्या राष्ट्रवादीने नितेश कराळे मास्तर यांची सहा वर्षांसाठी पक्षातून हकालपट्टी केली होती. त्यानंतर कराळे मास्तर यांना अश्रू अनावर झाल्याचं दिसून आलं. या कारवाईबाबतही जयंत पाटील यांनी आपली भूमिका मांडली. महाविकास आघाडीने निर्णय घेतला आणि त्याविरोधात भूमिका घेतली गेली, त्यामुळे त्यांच्यावर ती कारवाई केली गेली, असे स्पष्टीकरण पाटील यांनी दिलं.

विजयी उमेदवार हर्षदा देशमुख-जाधव यांनीही बॅलेट पेपरवरील मतदानानंतर काय होतं, असे म्हणत सत्ताधाऱ्यांना टोला लगावला. आम्ही एक लाख 13 हजार मतांचा कोटा पूर्ण केला, असे त्यांनी सांगितले. बॅलेट पेपरवर मतदान झालं तर काय होतं हे आपण या निवडणुकीत पाहिलं, असे हर्षदा जाधव यांनी म्हटलं.