कर्जतच्या वृक्षतोडीवर संदीप देशपांडे यांचे फडणवीसांना सवाल, राज ठाकरे 28 तारखेला येणार

रायगड जिल्ह्यातील कर्जत तालुक्यात टोरेंट पॉवर कंपनीचा जलविद्युत ऊर्जा साठवण प्रकल्प प्रस्तावित आहे. हा प्रकल्प राज्याच्या हिताचा आहे आणि त्यातून हजारो रोजगार निर्माण होतील, असा दावा मुख्यमंत्री देवेंद्र फडणवीस यांनी केला आहे. या दाव्यावर मनसेचे नेते संदीप देशपांडे यांनी जोरदार टीका केली.

सोमवारी मुंबईत घेतलेल्या पत्रकार परिषदेत देशपांडे बोलत होते. फडणवीस सांगतात त्याप्रमाणे तिथे झाडे कुठून लावणार, असा त्यांचा पहिला प्रश्न होता. 90 हजार झाडे लावण्याचे सांगितले जात आहे, पण त्यासाठी जागा तर हवी ना, असे ते म्हणाले. हे सगळे दोन गुजरात्यांसाठी सुरू आहे, असा आरोप त्यांनी केला. गिफ्ट सिटीसारखे प्रोजेक्ट, जिथ वरपायची संधी आहे, ते गुजरातला जातात आणि प्रदूषण करणारे प्रोजेक्ट महाराष्ट्राला दिले जातात, हे चालणार नाही, असेही त्यांनी सांगितले.

या प्रकल्पातून तयार होणारी वीज कोणासाठी आहे, कोणत्या प्रोजेक्टसाठी ही वीज लागणार आहे आणि सरकारला ही वीज कोणाला पुरवायची आहे, असे सवाल देशपांडे यांनी विचारले. निसर्गाचा ऱ्हास करून होणारा कुठलाही विकास आम्हाला नको, अशी भूमिका त्यांनी मांडली.

वनखात्याकडून ही वृक्षतोड अवैध नाही, असे सांगितले जाते. त्यावरही देशपांडे यांनी बोट ठेवले. त्या ठिकाणी लोकांना रस्ता हवा होता, तेव्हा झाडे कापावी लागतील म्हणून रस्ता होऊ शकत नाही, असे त्यांना सांगण्यात आले होते. मग तेव्हा अवैध असलेली वृक्षतोड आता वैध कशी झाली, असा सवाल त्यांनी उपस्थित केला.

देशपांडे आणि अविनाश जाधव यांनी रविवारी रात्री कर्जतमध्ये जाऊन, जिथे वृक्षतोड सुरू आहे त्या ठिकाणाची पाहणी केली. तिथले दृश्य अतिशय विदारक होते, असे देशपांडे म्हणाले. 150 वर्षे जुनी झाडे तोडण्यात आली आहेत, असे त्यांनी सांगितले. झाडे तोडली जात आहेत, हा कोणता विकास, असा प्रश्न विचारून एवढ्या मोठ्या प्रमाणात वृक्षतोड करण्याची गरज नाही, असे ते म्हणाले. या "झाडखाऊ" सरकारने झाडे का तोडली, असेही त्यांनी विचारले.

पाहणीत त्यांना जो आकडा दिसला, तो 2075 पर्यंतचा होता. मात्र 32 हजार झाडे तोडण्याची परवानगी देण्यात आली आहे, असे देशपांडे यांनी सांगितले. स्थानिक ग्रामपंचायतीत गेल्यावर तिथल्या लोकांनी, वृक्षतोडीसाठी कोणतीही परवानगी घेतलेली नाही, असे सांगितल्याचेही त्यांनी नमूद केले.

पुढील कार्यक्रमाचीही माहिती त्यांनी दिली. राज ठाकरे 28 तारखेला सकाळी त्या ठिकाणी जाऊन पाहणी करतील आणि संध्याकाळी कर्जतमध्ये सभा घेतील, असे संदीप देशपांडे यांनी सांगितले.