एसटी कर्मचाऱ्यांची दिवाळी गोड, प्रत्येकी 10 हजार रुपये सानुग्रह अनुदान, प्रताप सरनाईक यांची घोषणा

महाराष्ट्र राज्य मार्ग परिवहन महामंडळाच्या (ST) अधिकारी आणि कर्मचाऱ्यांची दिवाळी गोड करण्यासाठी एक मोठी घोषणा करण्यात आली आहे. परिवहन मंत्री आणि एसटी महामंडळाचे अध्यक्ष प्रताप सरनाईक यांनी हा महत्त्वाचा निर्णय जाहीर केला.

या निर्णयानुसार महामंडळाच्या 83 हजार अधिकारी व कर्मचाऱ्यांना प्रत्येकी 10 हजार रुपये सानुग्रह अनुदान मिळणार आहे. पात्र कर्मचाऱ्यांना 12500 रुपये सण उचल दिली जाणार आहे. याशिवाय महागाई भत्ता 58 टक्क्यांवरून 60 टक्के करण्याचा निर्णयही सरनाईक यांनी जाहीर केला आहे.

एसटी महामंडळातील विविध कर्मचारी संघटनांच्या प्रतिनिधींसोबत झालेल्या बैठकीत हा निर्णय जाहीर करण्यात आला. महामंडळ आर्थिक अडचणींचा सामना करत असतानाही कर्मचाऱ्यांच्या दिवाळीचा आनंद हिरावून घेता येणार नाही, असे सरनाईक यांनी यावेळी सांगितले.

सरनाईक म्हणाले, "एसटीचे अधिकारी आणि कर्मचारी अहोरात्र मेहनत करून लाखो प्रवाशांना सुरक्षित प्रवासाची सेवा देतात. त्यांच्या कष्टाची जाणीव ठेवून दिवाळीच्या सणानिमित्त त्यांना सानुग्रह अनुदान देणे हे केवळ औदार्य नसून त्यांचा हक्क आहे. या निर्णयामुळे महामंडळावर सुमारे 160 कोटी रुपयांचा आर्थिक भार पडणार असला, तरी कर्मचाऱ्यांची दिवाळी आनंदात साजरी व्हावी, हे आमचे आद्य कर्तव्य आहे."

मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि उपमुख्यमंत्री सुनेत्रा पवार यांच्या खंबीर पाठबळामुळे एसटी महामंडळाचे भविष्य उज्ज्वल आहे, असा विश्वास सरनाईक यांनी यावेळी व्यक्त केला.

कर्मचाऱ्यांनी आंदोलन किंवा संपाचा मार्ग स्वीकारू नये, असे आवाहनही मंत्री सरनाईक यांनी केले. ते म्हणाले, "एसटी ही सर्वसामान्य प्रवाशांची जीवनवाहिनी आहे. कोणत्याही आंदोलनामुळे प्रवाशांची गैरसोय होऊ नये. कर्मचारी आणि प्रवासी हे एसटीचे दोन महत्त्वाचे घटक आहेत. कर्मचाऱ्यांच्या प्रश्नांवर संवादातून मार्ग काढण्यास आम्ही सदैव तयार आहोत."

कर्मचाऱ्यांच्या हिताचे निर्णय घेत असतानाच प्रवाशांना चांगल्या दर्जाची सेवा देणे आणि एसटी महामंडळाला आर्थिकदृष्ट्या सक्षम करणे, या दोन्ही उद्दिष्टांसाठी शासन आणि महामंडळ बांधील आहे, असा विश्वासही प्रताप सरनाईक यांनी व्यक्त केला. कर्मचाऱ्यांशी संबंधित अन्य काही निर्णय मात्र आता दिवाळीनंतर घेतले जाणार आहेत.

थोडक्यात, सानुग्रह अनुदान, सण उचल आणि महागाई भत्त्यातील दोन टक्क्यांची वाढ, या तीन गोष्टी सरनाईक यांनी केलेल्या या घोषणेत आहेत. या निर्णयामुळे महामंडळावर सुमारे 160 कोटी रुपयांचा आर्थिक भार पडणार असल्याचे त्यांनी सांगितले आहे.