दरेकरांचा ठाकरेंवर हल्ला: उद्धव ठाकरे राजकारणातले टाइमपास, फक्त टीका एवढंच त्यांना जमतं

माजी मुख्यमंत्री उद्धव ठाकरे यांनी कालच्या दसरा मेळाव्यात केंद्र सरकार आणि राज्य सरकारवर जोरदार टीका केली. मुख्यमंत्री देवेंद्र फडणवीस यांच्यावरही त्यांनी निशाणा साधला. या टीकेला आता भाजपचे नेते प्रवीण दरेकर यांनी उत्तर दिले आहे. दरेकर हे एकेकाळी ठाकरे यांचे सहकारी आणि कट्टर शिवसैनिक होते. माध्यमांशी बोलताना त्यांनी ठाकरे यांच्यावर घणाघाती हल्ला चढवला.

उद्धव ठाकरे हे टिकोजी राव झाले आहेत, असे दरेकर म्हणाले. केवळ टीका करण्यापलीकडे त्यांना काही सुचत नाही आणि ते राजकारणातले टाइमपास आहेत, असा त्यांचा आरोप आहे. पंतप्रधान मोदी, अमित भाई आणि देवेंद्र फडणवीस यांच्यावर टीका करण्याशिवाय ठाकरेंकडे काही उरलेले नाही, असेही ते म्हणाले.

फडणवीस यांचे मुख्यमंत्री म्हणून मोठे योगदान आहे, त्यावर ठाकरेंनी बोलावे, असे दरेकर यांनी सांगितले. अमित शाह यांनी देशहितासाठी घेतलेल्या निर्णयावरही बोलावे, असे ते म्हणाले. विकासाच्या मुद्द्यावरून केंद्र आणि राज्य सरकारवर टीका करता येत नाही, म्हणून नॉन इश्यू उकरून काढले जात आहेत, असा त्यांचा दावा आहे. आयजीच्या जीवावर बायजी होण्याचा हा प्रकार आहे, अशी टीकाही त्यांनी केली.

टायगर श्रॉफ प्रकरण असो की पूर्णेकर प्रकरण, यात कोणीही असेल तर त्याला माफ करणार नाही, असे मुख्यमंत्र्यांनी आधीच स्पष्ट केले आहे, असे दरेकर म्हणाले. हल्लेखोरांना पकडण्याचे काम सुरू आहे, पण इकडे तोंडाची वाफ दवडली जात आहे, असे ते म्हणाले. गुन्हेगार कोणीही असो, कारवाई करण्याची भूमिका आम्ही घेतली आहे, असेही त्यांनी सांगितले. ठाकरे यांच्या कानाखालून आमदार निघून गेले आणि त्यांचा हिंदुत्वाचा विचारही निघून गेला. जे घर सांभाळू शकले नाहीत, ते रेजिम काय बदलतील, असा खोचक सवाल दरेकर यांनी केला.

मनोज जरांगे पाटील यांनी एकनाथ शिंदे यांना 500 कोटींच्या मुद्द्यावरून घेरले आहे. या प्रकरणाची चौकशी झाली पाहिजे, असे ठाकरे गटाचे नेते संजय राऊत म्हणाले. अनिल देशमुखांना समन्स बजावला जातो, मग एकनाथ शिंदेंना ईडी समन्स का बजावत नाही, असा सवाल राऊत यांनी केला. त्यावर दरेकर म्हणाले की, अनिल देशमुख गृहमंत्री असताना त्यांना कोणत्या कारणाने जावे लागले हे राऊतांना माहीत आहे. भ्रष्टाचारामुळे देशमुख यांना जावे लागले. जरांगे यांनी जो आरोप केला तसे काही असेल असे वाटत नाही, आणि राऊत केवळ निराधार बोलत आहेत, असेही ते म्हणाले.

कॅबिनेटमध्ये बिश्नोई गँगचे मेंबर असल्याचा आरोप संजय राऊत यांनी केला आहे. त्यावर दरेकर यांनी संतप्त प्रतिक्रिया दिली. राऊत काहीही बोलत आहेत आणि त्यांच्यावर हक्कभंग येऊ शकतो, असे ते म्हणाले. हा राज्य सरकारचा अपमान आहे. वाटले तर आम्ही राऊतांच्या विरोधात हक्कभंग आणू शकतो, असा इशाराही त्यांनी दिला.

पाणीपुरवठा मंत्री गुलाबराव पाटील यांनी कालच्या दसरा मेळाव्यात एकनाथ शिंदे यांना पुढच्या वेळी मुख्यमंत्री करणार असल्याचे म्हटले. त्यावरही दरेकर यांनी भाष्य केले. आपल्या पक्षाचा नेता मुख्यमंत्री झाला पाहिजे, असे बोलणे हा प्रत्येकाचा अधिकार आहे. पण एकमेव व्यक्तीच मुख्यमंत्री व्हावी आणि इतरांचे वाटोळे व्हावे, असे बोलणे चुकीचे आहे, असे ते म्हणाले. राजकीय महत्त्वाकांक्षा असणे ठीक आहे, पण वाटोळे होईल वगैरे बोलायला नको होते. मुख्यमंत्री बदलाचा विषय सध्या कुठेच नाही, असे सांगतानाच मुख्यमंत्रीपदासाठी 145 जागा निवडून याव्या लागतात, असा चिमटाही त्यांनी काढला.