चारकोपमधील १०० झाडांचे त्याच परिसरात पुनर्रोपण होणार

कांदिवली पश्चिममधील सेक्टर ८, चारकोप भागात कोस्टल रोड नॉर्थ प्रकल्प येणार आहे. या प्रकल्पामुळे तिथली सुमारे १०० झाडे बाधित झाली आहेत. ही झाडे तोडून मुंबईबाहेर पुनर्रोपणासाठी नेण्याचे आधी ठरले होते. आता मात्र ती झाडे त्याच परिसरात पुन्हा लावली जाणार आहेत.

स्थानिक पर्यावरण कार्यकर्ते, महापालिका आणि म्हाडाचे अधिकारी यांनी केलेल्या प्रयत्नांतून हा उपक्रम शक्य झाला आहे. प्रकल्पामुळे बाधित होणाऱ्या भागांत हिरवाई टिकवून ठेवण्याच्या दृष्टीने स्थानिक लोक हे मोठे यश मानत आहेत.

या उपक्रमाचा पहिला टप्पा बुधवारी सकाळी १०.३० वाजता दत्ता गुरू उद्यान येथे सुरू होईल. पायाभूत सुविधांचा विकास होत असतानाही परिसरातली हिरवळ टिकवणे आणि पक्षी तसेच शहरातील इतर वन्यजीवांच्या अधिवासांचे संरक्षण करणे, हा या उपक्रमाचा उद्देश आहे. झाडांना शहराबाहेर हलवण्याऐवजी परिसरातच त्यांची पुनर्लागवड केली, तर आत्ता असलेली हिरवळ टिकून राहण्यास मदत होईल.

कोस्टल रोड नॉर्थ प्रकल्प वर्सोवा-भाईंदर लिंक रोड म्हणूनही ओळखला जातो. हा मुंबई कोस्टल रोड प्रकल्पाचा दुसरा टप्पा आहे. या मोठ्या प्रकल्पासाठी १०३.६५५४ हेक्टर वन (खारफुटी) जमिनीचे वळण करावे लागणार आहे. त्याचा परिणाम ४५,००० हून अधिक खारफुटीच्या झाडांवर होणार आहे. त्याची भरपाई म्हणून मुंबईबाहेर एकूण २५५ हेक्टर जमिनीवर १.३७ लाख खारफुटीची झाडे लावली जातील.

महापालिकेला जुलैमध्ये पर्यावरण, वन आणि हवामान बदल मंत्रालयाकडून (MoEFCC) दुसऱ्या टप्प्याची अंतिम मंजुरी मिळाली. तर बीएमसीच्या वृक्ष प्राधिकरणाने जूनमध्ये या प्रकल्पासाठी सुमारे १,९०० झाडे तोडण्यास मंजुरी दिली होती. या मंजुरींमुळे अधिकाऱ्यांना खारफुटी आणि झाडे हटवण्याच्या तसेच बांधकामाच्या कामांना गती देता आली आहे. त्यामुळे डिसेंबर २०२८ पर्यंत हा प्रकल्प पूर्ण करता येईल.