विसापूर टोल नाक्याजवळ बिबट्याने ९ वर्षांच्या कार्तिकला उचलले; टाळी वाजवून त्याने जीव वाचवला

चंद्रपूर जिल्ह्यातील बल्लारपूरजवळ विसापूर टोल नाक्याजवळ शनिवारी रात्री बिबट्याने ९ वर्षांच्या कार्तिकवर हल्ला केला. माता महाकालीच्या दर्शनासाठी पायी निघालेल्या कुटुंबासोबत तो होता. प्रत्यक्षदर्शींनी सांगितल्यानुसार, बिबट्याने त्याला उचलून नेले. सुमारे तासाभराने झुडपातून टाळी वाजल्याचा आवाज आला आणि त्या आवाजामुळे जखमी कार्तिक सापडला. त्याला जिल्हा सामान्य रुग्णालयात दाखल करण्यात आले असून त्याच्यावर उपचार सुरू आहेत.

नवरात्रोत्सवात चंद्रपूरचे आराध्य दैवत असलेल्या माता महाकालीच्या दर्शनासाठी वेगवेगळ्या जिल्ह्यांतून आणि राज्यांतून भाविक मोठ्या संख्येने येतात. श्रद्धेपोटी अनेक जण पायी प्रवास करून चंद्रपुरात पोहोचतात.

कार्तिक संजय जाधव हा हैदराबादहून बल्लारपूर येथे आपल्या आत्याकडे आला होता. १७ ऑक्टोबर रोजी रात्री सुमारे १० वाजता तो आत्या आणि इतर कुटुंबीयांसोबत बल्लारपूरवरून पायी निघाला. सर्वजण विसापूर टोल नाक्याजवळ पोहोचले, तेव्हा अंधारात दबा धरून बसलेल्या बिबट्याने अचानक कार्तिकवर हल्ला केला. त्याला जबड्यात धरून तो घेऊन गेला.

या घटनेनंतर परिसरात एकच गोंधळ उडाला. तिथे उपस्थित असलेल्या नागरिकांनी लगेच धाव घेतली आणि आरडाओरडा करत बिबट्याचा माग काढला. थोड्याच वेळात वनविभाग आणि पोलिसांचे पथकही घटनास्थळी आले. नागरिक आणि प्रशासन यांनी मिळून आजूबाजूच्या भागात शोध घेतला. मात्र अंधार असल्यामुळे कार्तिकचा पत्ता लागला नाही.

घटनेनंतर साधारण एक ते दोन तासांनी, घटनास्थळापासून थोड्या अंतरावरच्या दाट झुडपातून नागरिकांना टाळी वाजवल्याचा आवाज आला. कोणीतरी थट्टा करत असावे, असे सुरुवातीला लोकांना वाटले. पण टाळीचा आवाज सतत येत राहिल्याने संशय आला आणि लोक त्या दिशेने धावले.

झुडपात गेल्यावर कार्तिक रक्ताने माखलेल्या अवस्थेत पडलेला दिसला. बिबट्याच्या हल्ल्यात त्याच्या गळ्याला आणि मानेला गंभीर जखम झाली होती. त्यामुळे त्याला बोलता येत नव्हते, मोठ्याने ओरडताही येत नव्हते. इतक्या कठीण आणि वेदनादायी परिस्थितीतही तो घाबरला नाही. स्वतःचा जीव वाचवण्यासाठी त्याने टाळी वाजवून नागरिकांचे लक्ष वेधण्याचा प्रयत्न केला होता.

नागरिकांनी त्याला लगेच झुडपातून बाहेर काढले आणि उपचारासाठी जिल्हा सामान्य रुग्णालयात नेले. तिथे त्याच्यावर वैद्यकीय उपचार सुरू आहेत. या थरारक प्रसंगात लहानग्या कार्तिकने दाखवलेले धैर्य आणि प्रसंगावधान याचे परिसरात कौतुक होत आहे.

या घटनेमुळे विसापूर आणि बल्लारपूर परिसरातील नागरिकांमध्ये भीतीचे वातावरण आहे. वनविभागाने बिबट्याचा तातडीने बंदोबस्त करावा, अशी मागणी नागरिकांकडून होत आहे.