न अडखळता संपूर्ण हनुमान चालीसा म्हणणाऱ्या परदेशी तरुणाचा व्हिडिओ व्हायरल

एका गोऱ्या परदेशी तरुणाचा व्हिडिओ सध्या सोशल मीडियावर जोरात व्हायरल झाला आहे. या तरुणाने संपूर्ण हनुमान चालीसा म्हटली आहे. एखाद्या भारतीयालाही लाज वाटावी, इतक्या स्पष्ट शब्दात तो चालीसा म्हणतो. कुठेही न अडखळता आणि तोंडपाठ केलेली चालीसा ऐकून व्हिडिओ पाहणारे थक्क झाले आहेत.

हा व्हिडिओ 'neurodivergent_nick' नावाच्या इन्स्टाग्राम अकाउंटवरून शेअर करण्यात आला आहे. व्हिडिओत दिसणाऱ्या तरुणाचं नाव निक आहे. तो हेल्थ कोच आणि होलिस्टिक ट्रेनर म्हणून काम करतो. योगसाधना आणि ब्रीदिंग एक्सरसाइज यांची त्याला खूप आवड आहे. गेल्या काही वर्षांपासून तो भारताच्या अध्यात्माशी जोडला गेलाय, आणि त्यामुळे त्याने हनुमान चालीसा पूर्ण पाठ केली आहे.

बऱ्याच लोकांना पूर्ण चालीसा पाठ नसते, अनेकदा ते मोबाईलवर पाहून म्हणतात. पण या परदेशी मुलाने ती पूर्ण लक्षात ठेवली आहे. त्याचे उच्चारही एकदम साफ आणि स्पष्ट आहेत. म्हणूनच भारतीय लोकही त्याचं कौतुक करत आहेत.

हा व्हिडिओ आतापर्यंत एक लाखापेक्षा जास्त लोकांनी पाहिलाय. कमेंट बॉक्समध्ये लोक भरभरून कमेंट करत आहेत. एका युजरने लिहिलंय, "भाऊ तू भारी काम करतोयस. निगेटिव्ह कमेंट्सकडे लक्ष देऊ नको. चालीसा म्हणताना एखादा शब्द चुकला तरी काही हरकत नाही. हनुमानाला तुझी भावना समजते, तुझी भक्ती समजते."

दुसऱ्या एका नेटकऱ्याने थोडी गंमत केली आहे. तो म्हणतो, "एका विदेशी माणसाच्या तोंडून हनुमान चालीसा ऐकून खूप भारी वाटलं. पण हे पाहून आपले आजोबा पंजोबा नक्कीच गोंधळून गेले असते."

आणखी एका युजरने लिहिलंय, "प्रत्येकाच्या भक्तीचा आदर केला पाहिजे. कोण कुठल्या देशाचा आहे यापेक्षा त्याच्या मनातली श्रद्धा महत्वाची आहे. आपण दुसऱ्याला जज करण्यापेक्षा आपली भक्ती किती खरी आहे हे पाहिलं पाहिजे."

हनुमान चालीसा १६ व्या शतकात संत तुलसीदासांनी लिहिली, असं सांगितलं जातं. त्यात हनुमानाची ताकद, त्याची बुद्धी, रामावर असलेलं त्याचं प्रेम आणि त्याचा पराक्रम यांचं वर्णन आहे.

लोकांचं म्हणणं आहे की रोज हनुमान चालीसा म्हटल्याने मनातली भीती निघून जाते, आत्मविश्वास वाढतो आणि मनाला शांती मिळते. निगेटिव्ह एनर्जी दूर होते, असंही ते म्हणतात. निकनेही सांगितलं की चालीसा म्हणायला लागल्यापासून त्याला खूप पॉझिटिव्ह वाटतंय आणि मन शांत राहतंय.

आजकाल परदेशातले लोक भारतीय संस्कृतीकडे जास्त आकर्षित होत आहेत. योग, आयुर्वेद, श्लोक आणि प्रार्थना त्यांनाही खूप आवडू लागल्या आहेत. मंत्र आणि श्लोकांमध्ये त्यांना खरी शांती मिळते. भक्तीला कोणतीही भाषा किंवा देशाची सीमा नसते, हेच हा व्हिडिओ दाखवतो, असं नेटकरी म्हणतात.