बंगालच्या उपसागरातील कमी दाबामुळे विदर्भ, मराठवाड्यात मुसळधार पावसाचा अंदाज, अनेक जिल्ह्यांना अलर्ट

राज्यातील अनेक भागांत पावसाने सध्या विश्रांती घेतली असली, तरी हवामानाचं चित्र पुन्हा एकदा बदलण्याची शक्यता आहे. बंगालच्या उपसागरात तयार झालेल्या कमी दाबाच्या क्षेत्रामुळे विदर्भ आणि मराठवाड्यात पावसाचा जोर वाढणार असल्याचं समोर आलं आहे. काही जिल्ह्यांत मुसळधार पावसासोबत मेघगर्जना आणि विजांचा कडकडाट होण्याचा अंदाज असून, त्यामुळे हवामान विभागाने काही जिल्ह्यांसाठी यलो तर काही जिल्ह्यांसाठी ऑरेंज अलर्ट जारी केला आहे.

24 सप्टेंबर 2026 रोजी या कमी दाबाच्या क्षेत्राच्या प्रभावामुळे विदर्भ आणि मराठवाड्यात वादळी वारे, मेघगर्जना आणि विजांसह जोरदार पाऊस पडण्याची शक्यता आहे. पूर्व विदर्भात मुसळधार पावसाची शक्यता जास्त असल्यानं तिथं दक्षतेचा इशारा म्हणजेच ऑरेंज अलर्ट देण्यात आला आहे.

दरम्यान, देशातून मॉन्सूनचा परतीचा प्रवास सुरू झाला आहे. वायव्य भारतातून मॉन्सून आधीच परतला असून, उत्तर प्रदेशात समुद्रसपाटीपासून 1.5 ते 3.1 किलोमीटर उंचीवर चक्राकार वाऱ्यांची स्थिती तयार झाली आहे. बंगालच्या उपसागरातील वादळी प्रणालीपासून अंदमान समुद्र ते थायलंडच्या आखातापर्यंत हवेचा कमी दाबाचा पट्टा तयार झाला असून, अरबी समुद्रापर्यंत असलेला आधीचा कमी दाबाचा पट्टा मात्र आता निवळला आहे. या बदलत्या हवामान प्रणालींमुळे राज्यातील काही भागांत पावसाचा जोर वाढण्याची शक्यता वर्तवली जात आहे.

विदर्भातील यवतमाळ, नागपूर, चंद्रपूर आणि गडचिरोली या चार जिल्ह्यांना मुसळधार पावसाची शक्यता असल्यानं ऑरेंज अलर्ट देण्यात आला आहे. हिंगोली, नांदेड, वर्धा, भंडारा आणि गोंदिया जिल्ह्यांत जोरदार पाऊस पडण्याचा अंदाज आहे, तर जालना, बीड आणि धाराशिवमध्ये वादळी वाऱ्यांसह पाऊस होण्याची शक्यता आहे. उर्वरित विदर्भ आणि मराठवाड्यात विजांसह पावसाचा अंदाज असल्यानं तिथं यलो अलर्ट देण्यात आला आहे.

कोकणातील पालघर, ठाणे, मुंबई आणि रायगड जिल्ह्यांत हलक्या पावसाची शक्यता असून तिथं पावसाचा जोर तुलनेनं कमी राहील. सिंधुदुर्ग जिल्ह्याला मात्र यलो अलर्ट देण्यात आला असून तिथल्या नागरिकांनी हवामानातील बदलांकडे लक्ष ठेवावं, असं सांगण्यात आलं आहे.

उत्तर महाराष्ट्रात धुळे आणि नंदुरबार जिल्ह्यांत हवामान कोरडं राहण्याचा अंदाज आहे. नाशिकमध्ये विजांसह हलका पाऊस होण्याची शक्यता असून, नाशिकच्या घाटमाथा परिसरात विजांच्या कडकडाटासह हलका ते मध्यम पाऊस पडू शकतो. अहिल्यानगरमध्येही विजांसह हलक्या पावसाचा अंदाज आहे.

पश्चिम महाराष्ट्रातील पुणे, पुणे घाटमाथा आणि सातारा घाटमाथा परिसरात विजांसह हलका ते मध्यम पाऊस पडण्याचा अंदाज असून तिथं यलो अलर्ट देण्यात आला आहे. सांगली आणि सोलापूर जिल्ह्यांतही विजांसह हलक्या पावसाची शक्यता आहे.

मराठवाड्यातील छत्रपती संभाजीनगर, जालना, परभणी, बीड, हिंगोली, लातूर आणि धाराशिव या जिल्ह्यांना पावसाचा यलो अलर्ट देण्यात आला आहे. या भागांत पावसासोबत मेघगर्जना आणि विजांचा कडकडाट होण्याची शक्यता असल्यानं नागरिकांनी खबरदारी घ्यावी, असं आवाहन करण्यात आलं आहे.

विदर्भातील अकोला, अमरावती, भंडारा, बुलढाणा, गोंदिया आणि वर्धा या जिल्ह्यांत यलो अलर्ट देण्यात आला आहे, तर नागपूर, गडचिरोली, यवतमाळ आणि चंद्रपूर या जिल्ह्यांत ऑरेंज अलर्ट देण्यात आला आहे. या भागांत मुसळधार पावसाची शक्यता असल्यानं नागरिकांनी विशेष काळजी घ्यावी, असं सांगण्यात आलं आहे. एकूणच 24 सप्टेंबर रोजी राज्यातील हवामानात विभागनिहाय बदल दिसणार असून, विदर्भ आणि मराठवाड्यात पावसाचा जोर वाढणार आहे, कोकणात हलका पाऊस, उत्तर महाराष्ट्रात काही ठिकाणी कोरडं हवामान, तर पश्चिम महाराष्ट्रातील घाटमाथ्यावर विजांसह पावसाचा अंदाज आहे. नागरिकांनी स्थानिक हवामान विभागाच्या सूचनांकडे लक्ष ठेवावं.